Paulu mopahaweꞌ Ngkóráꞌ Marasa hangko i kuasaꞌna Inao to Magasaꞌ
2
Halalu-halalu,
i kahaweꞌkuꞌ i kótámi hangkoia,a
kupahaweꞌámokou bámbári to hangko i Pueꞌ Ala.
I tempó iti,
tiꞌara kupakeꞌ básá to maꞌángkárá,
ba laluita to mouláꞌ kamapándengkuꞌ haduduángkuꞌ.
2 Kupolaluita noꞌonoꞌ,
láwiꞌ kupakanótó miꞌi i lalungkuꞌ,
tiꞌaraꞌaꞌ ina mampolaluita to ntániꞌna,
bateꞌna peá Iesu miꞌi Datu Topehómpóꞌ to rapakuꞌ i kau mombehape duuꞌna mate.
3 Tangaꞌkuꞌ mani ara hingkakani hai kómu maledeꞌaꞌ,
hai moridiꞌaꞌ ánti kamalááꞌkuꞌ.
4 Bámbári to kupahaweꞌákou iti,
tiꞌara kupahaweꞌ mouláꞌ kamapándengkuꞌ haduduángkuꞌ,
agáiáná kuasaꞌna Inao to Magasaꞌ to mopatongawaꞌ katoꞌuna Ngkóráꞌ Marasa iti,
5 bona mepoináláikou.
Hai pepoináláimi iti tiꞌara mentóáꞌ hangko i kamapándena tauna,
agáiáná mentóáꞌ hangko i kuasaꞌna Pueꞌ Ala.
Inao to Magasaꞌ to mampopaisáꞌákeꞌ paturoꞌ to hangko i Pueꞌ Ala
6 Kehapiꞌ noꞌonoꞌ,
ane mampolaluitaꞌangkaiꞌ mokana i kapánde i tauna to maróhó miꞌi pepoináláiraꞌ i Kerisitu,
kapánde iti tiꞌara mentóáꞌ hangko i duniáꞌ deꞌe,
ba hangko i to makuasaꞌ i duniáꞌ,
láwiꞌ to makuasaꞌ i duniáꞌ deꞌe ina mokahópóꞌá.
7 Agáiáná to kipahaweꞌákou,
ia miꞌi kapánde to hangko i Pueꞌ Ala.
Kipahaweꞌ tunggáiáNa Pueꞌ Ala mampoweꞌikeꞌ katueꞌ to meawaꞌ i alo bókóꞌna.
Hangkoia,
tunggáiáNa iti tewuniángi mani,
tiꞌara raisá tauna.
Agáiáná hangko tiꞌara mani Napopewaliꞌ duniáꞌ deꞌe,
Pueꞌ Ala mopakanótó miꞌi ami kaꞌina Naweꞌintaꞌ katueꞌ to maroꞌa bona meawaꞌkeꞌ woꞌo.b
8 Agáiáná tadulako i duniáꞌ deꞌe,
tiꞌara raisá tunggáiána Pueꞌ Ala,
láwiꞌ ane keraisái,
ketiꞌaraheꞌ mopakuꞌ Pueꞌtaꞌ to meawaꞌ tueꞌNa i kau mombehape.
9 Agáiáná nodo to teukiꞌ i lalu Sura Magasaꞌ:
“Heáná tauna to mampokaꞌahiꞌ Pueꞌ Ala,
Napopatimamaꞌámoheꞌ to maroꞌa ntepuꞌu,
to tiꞌara mani raita ba rahádi tauna,
hai to tiꞌara mani haweꞌ hangkani mesupaꞌ i pekiri tauna.”c
10 Kitaꞌ deꞌe,
taisá miꞌi tunggáiána Pueꞌ Ala,
láwiꞌ tunggáiáNa iti napopaisáꞌámokeꞌ Pueꞌ Ala moliu Inao to Magasaꞌ.
Hai tiꞌara ara to tewuniángi hangko i Inao to Magasaꞌ,
láwiꞌ Ia to mopáresáꞌ hinángkáꞌna,
tepasuaꞌ tunggáiána Pueꞌ Ala to tiꞌara mani raisá tauna.
11 Láwiꞌ to moisá apa to ara i pekirina hadua tauna,
ia peá haduduána.
Noꞌonoꞌ woꞌo,
to moisá apa to ara i pekirina Pueꞌ Ala,
bateꞌna peá Inaona Pueꞌ Ala haduduáNa.
12 Hai kitaꞌ deꞌe,
tiꞌarakeꞌ molámbiꞌ pekiri hangko i duniáꞌ deꞌe,
agáiáná molámbiꞌkeꞌ pekiri hangko i Inaona Pueꞌ Ala bona taisá apa to naweꞌikeꞌ Pueꞌ Ala hangko i kabulána laluNa.
13 Mewaliꞌ,
ane mepaturoꞌangkaiꞌ mokana i Ngkóráꞌ Marasa,
tiꞌarakou kipaturoꞌ mouláꞌ kamapándengkiꞌ haduduángkiꞌ,
agáiáná mepaturoꞌangkaiꞌ hai laluita to hangko i Inao to Magasaꞌ,
i tauna to molámbiꞌmoheꞌ Inao to Magasaꞌ.
14 Tauna to tiꞌara moisá Pueꞌ Ala,
tiꞌaraheꞌ mampokana paturoꞌ to hangko i Inaona Pueꞌ Ala,
láwiꞌ rauliꞌ riꞌi,
“Paturoꞌ iti tiꞌara mesuaꞌ i akala.”
Tiꞌara rabuku motarima paturoꞌ to hangko i Inaona Pueꞌ Ala,
láwiꞌ Inao to Magasaꞌ iti tiꞌara mokale i laluraꞌ.
15 Kitaꞌ to molámbiꞌmokeꞌ Inao to Magasaꞌ,
manótó miꞌi laluntaꞌ mopáresáꞌ hinángkáꞌna:
ba maroꞌai ba tiꞌara.
Agáiáná tauna to tiꞌara moisá Pueꞌ Ala,
tiꞌara rabuku mopáresáꞌ apa to ara i laluntaꞌ,
16 láwiꞌ teukiꞌ miꞌi i lalu Sura Magasaꞌ:
“Heáná paꞌi to moisá pekirina Pueꞌ Ala?
Heáná paꞌi to peisá mopaturoꞌ Pueꞌ Ala?”
(Iesaia 40:13)
Agáiáná kitaꞌ deꞌe, naweꞌimokeꞌ Pueꞌ Ala pekiri to hibali hai pekirina Kerisitu.d