Bábehiá to hintotoꞌ i tauna to mepoinálái (12:1–15:13)
12
Mewaliꞌ halalu-halalu,
ánti kamahilena ahiꞌna Pueꞌ Ala i kitaꞌ,
onoꞌ miꞌi haneꞌi kupembiáꞌ bona nihuhuꞌ katueꞌmi i Pueꞌ Ala mewaliꞌ popenómbá to tueꞌ.a
Ane iti to nibábehi,
lempóna magasaꞌ katueꞌmi i peitána Pueꞌ Ala,
láwiꞌ iti to mopagóeꞌ laluNa,
hai iti miꞌi popenómbámi to hintotoꞌ ntepuꞌu i Hia.
2 Ineeꞌmokou mampeuláꞌi bábehiáraꞌ hai ádáraꞌ tauna i duniáꞌ to tiꞌaraheꞌ mengkoruꞌ i Pueꞌ Ala,
agáiáná nipatodáhi miꞌi Pueꞌ Ala mopawoꞌu pekirimib bona tebáliki pambiárámi.
Láwiꞌ ane nibábehiꞌi noꞌonoꞌ,
ina niꞌisá ntepuꞌu peundeꞌána Pueꞌ Ala,
ia miꞌi:
apa to maroꞌa nibábehi,
apa to mopagóeꞌ laluNa,
hai apa to tiꞌara ara katesalaꞌiána.
Kapánde to naweꞌikeꞌ Pueꞌ Ala hangaa-ngaa tapopobunduꞌ mouláꞌ peundeꞌáNa
3 Ánti kabulána laluNa,
Pueꞌ Ala mowátiꞌaꞌ bona mewaliꞌaꞌ suroNa,
onoꞌ miꞌi haneꞌi kupahaweꞌákou laluita deꞌe:
ineeꞌkou mampepemahile.
Hangaa-ngaa manótó lalumi mampekiri mokana i katueꞌmi hadua-hadua,
hintotoꞌ hai pewátiꞌ to nagáláꞌ-gáláꞌákou Pueꞌ Ala ánti pepoináláimi i Hia.c
4 Pándiriꞌ,
i wátántaꞌ handaꞌ pákáꞌna,
agáiáná hambuaꞌ peá wátántaꞌ.
Hampákáꞌ-hampákáꞌ montaniꞌ-ntaniꞌ bunduꞌna.
5 Noꞌonoꞌ woꞌo kitaꞌ to mepoinálái i Kerisitu:
handaꞌkeꞌ,
agáiáná hampepekirikeꞌ ánti pohintuwuꞌtaꞌ hai Kerisitu,
hai mohintuwuꞌkeꞌ upu-upu hadua hai hadua.
6 Hadua-haduakeꞌ molámbiꞌ kamapánde to montaniꞌ-ntaniꞌ,
mouláꞌ apa to naweꞌikeꞌ Pueꞌ Ala hangko i kabulána laluNa.
Heáná to molámbiꞌ kapánde mopahaweꞌ laluitana Pueꞌ Ala,
hangaa-ngaa napolaluita hintotoꞌ hai pepoináláina.
7 Heáná to molámbiꞌ kapánde motulungi hángká rángána,
hangaa-ngaa metulungi hangko i laluna ntepuꞌu.
Heáná to molámbiꞌ kapánde mepaguru,
hangaa-ngaa mepaguru mpuꞌu i katoꞌu-toꞌuána.
8 Heáná to molámbiꞌ kapánde mopakaróhó laluna hángká rángána,
hangaa-ngaa bateꞌna napopolumao i katoꞌu-toꞌuána.
Heáná to molámbiꞌ kapánde mogáláꞌ-gáláꞌ apa to ara i hia,
hangaa-ngaa napeweꞌi mpuꞌu hangko i kabulána laluna.
Heáná to molámbiꞌ kapánde metadulakoi,
hangaa-ngaa mewaliꞌ mpuꞌu tadulako to madota.
Hai heáná to molámbiꞌ kapánde metulungi,
hangaa-ngaa metulungi mpuꞌu i kagóeꞌ-góeꞌ.
Hangaa-ngaa mobábehikou to maroꞌa i upu-upu tauna
9 Nipokaꞌahiꞌ rángámi hangko i lalumi ntepuꞌu.
Nikábáhá bábehiámi to kadake,
hai nibábehi oaꞌ bábehiá to maroꞌa.
10 Mombepokaꞌahiꞌkou hai mombeádáikou hadua hai hadua nodokou topohalalu.
11 Hangaa-ngaa madotakou mobágóꞌ,
ineeꞌkou lohe.
Nipopolumao bágóꞌna Pueꞌ hangko i lalumi ntepuꞌu.
12 Hangaa-ngaa góeꞌkou ánti pehárungámi i upu-upu to ina nabábehiákou Pueꞌ Ala.
Mantahakou i lalu kapári.
Madotakou mekakae.
13 Nitulungiheꞌ halalu hampepepoináláimi to ara kamakuraꞌraꞌ.
Hangaa-ngaa góeꞌkou motarima torare.
14 Ane ara tauna to mampopeahiahiꞌkou,
ineeꞌheꞌ nitundaꞌ,
ngkáliꞌna riꞌi hangaa-ngaa nipembiáꞌ i Pueꞌ Ala bona Nawátiꞌheꞌ.
15 Hangaa-ngaa góeꞌkou hingkakani hai tauna to góeꞌ,
teriaꞌkou hingkakani hai tauna to teriaꞌ.
16 Hangaa-ngaa hintuwuꞌmokou hai upu-upu tauna.
Ineeꞌkou mampepemahile,
ngkáliꞌna riꞌi timamakou mampopolumao bágóꞌ nodo to rabágóꞌ tauna to i wóiꞌ tueꞌraꞌ,d
hai ineeꞌkou mampe to mapánde.
17 Ane araheꞌ to mobábehi to kadake i kómu,
ineeꞌheꞌ niháwángi.
Nibábehi apa to maroꞌa i peitáraꞌ upu-upu tauna.
18 Nipári-pári i lalu katueꞌmi bona modamekou oaꞌ hai upu-upu tauna.
19 Halalu-halalu to kupokaꞌahiꞌ:
ineeꞌ niháwángi kakadakena tauna ntániꞌna.
Nipatodáhi Pueꞌ Ala mohukuheꞌ,
láwiꞌ i lalu Sura Magasaꞌ,
nauliꞌ Pueꞌ Ala node:
“Kódóꞌ to makuasaꞌ moháwángi.
Kódóꞌ to makuasaꞌ mehuku.” (Pohuleki 32:35)
20 Mewaliꞌ,
nipeuláꞌi miꞌi paturoꞌ i lalu Sura Magasaꞌ to manguliꞌ:
“Ane ewálimi marimi,
nipaꞌandeꞌheꞌ.
Ane mangkadoꞌuheꞌ,
nipopainuheꞌ.
Ane nibábehiꞌi noꞌonoꞌ,
ina masandaꞌheꞌ hai rapokahili bábehiáraꞌ i kómu.”e (Sura Paturoꞌ 25:21-22)
21 Mewaliꞌ ineeꞌkou nanangi bábehiá to kadake,
ngkáliꞌna riꞌi bábehiáraꞌ to kadake ninangi hai bábehiá to maroꞌa.