Paulu molaluita i lindoꞌna Datu Agaripa
26
Roo onoꞌ,
nauliꞌ Datu Agaripa i Paulu,
“Deꞌe-deꞌe ara miꞌi tempómu mopahaweꞌ i katoꞌu-toꞌuána.”
Paulu moángkáꞌ miꞌi taena,
napakaniiꞌheꞌ haneꞌi mantepuꞌu miꞌi molaluita mopahaweꞌ i katoꞌu-toꞌuána,
nauliꞌ,
2 “Datu Agaripa to kubiláꞌ!
Ioru-oru kuꞌuliꞌ morasiꞌ ntepuꞌuaꞌ,
láwiꞌ peisáꞌaꞌ meángkáꞌ ieneꞌ i lindoꞌmu datu,
mopahaweꞌ i katoꞌu-toꞌuána,
mohániki upu-upu pesalaꞌiraꞌ toIahudiꞌ i kódóꞌ,
3 pelumbuꞌna mani láwiꞌ nuisánto datu,
ádántaꞌ toIahudiꞌ hai paturoꞌ to rapombeheheꞌi.a
Onoꞌ miꞌi haneꞌi kupembiáꞌ bona sabaraꞌkoꞌ mampehádingi laluitangkuꞌ.
4 Upu-upu toIahudiꞌ moisá noumbá katueꞌkuꞌ mantepuꞌu hangko i rungu-runguna,
i tempóngkuꞌ maleheꞌ mani hai toroꞌ i oloꞌraꞌ hangka toIahudiꞌkuꞌ i Ierusale.
5 Marue miꞌi toIahudiꞌ moisá bábehiángkuꞌ.
Ane raundeꞌ,
peisáheꞌ mampodarita noumbá katueꞌkuꞌ.
Kódóꞌ deꞌe tueꞌaꞌ mouláꞌ paturoꞌraꞌ toParisi to maróhó ntepuꞌu pampeuláꞌiraꞌ upu-upu áturá-áturá agama Iahudiꞌ.
6 Hai deꞌe-deꞌe,
ánti pehárungángkuꞌ i dándina Pueꞌ Ala i toioruntaꞌ hangkoia,
onoꞌ miꞌi haneꞌi bateꞌkuꞌ rapáresáꞌ ieneꞌ.
7 Dándina iti rapoinálái woꞌo upu-upu halaluntaꞌ toIahudiꞌ to hampuloꞌ hai rontina to mengkoruꞌ i Pueꞌ Ala.
Datu to kubiláꞌ,
ánti pehárungángkuꞌ iti,
onoꞌ miꞌi haneꞌi rasalaꞌiaꞌ toIahudiꞌ.
8 Hai kómu upu-upu,
moapa riꞌi haneꞌi tiꞌara nipoinálái kamakuasaꞌna Pueꞌ Ala mopatueꞌ huleꞌ tomate?
9 Hangkoia woꞌo,
kuꞌuliꞌ riꞌi hangaa-ngaa kuewaꞌ ntepuꞌu upu-upu tauna to meuláꞌ i Iesu toNasare.
10 Hai kuewaꞌ mpuꞌuheꞌ i Ierusale.
I tempó iti,
kutarima miꞌi sura kuasaꞌ hangko i kapalaꞌ-kapalaꞌ tadulako menómbá,
onoꞌ miꞌi haneꞌi handaꞌ toSarani to kutarungku,
hai kupokana ane hira woꞌo rahukuheꞌ mate.
11 Handaꞌ kánina kupopeahiahiꞌheꞌ i lalu támbi penómbáꞌá,
hai kupári-pári bona mosapuákaheꞌ pepoináláiraꞌ i Iesu.
Mabukoꞌ ntepuꞌuaꞌ moitaheꞌ,
onoꞌ miꞌi haneꞌi laoaꞌ woꞌo i bahangapa kótá to karaoꞌ bona mampopeahiahiꞌheꞌ.”
Paulu motuntu noumbá rárána haneꞌi mepoinálái i Iesu
12 Paulu mopaliliu wopiꞌi laluitana,
nauliꞌ,
“Datu to kubiláꞌ.
Onoꞌ miꞌi tunggáiángkuꞌ tempóngkuꞌ lao i kótá Damasiꞌ.
I tempó onoꞌ,
kapalaꞌ-kapalaꞌ tadulako menómbá mohuoꞌaꞌ hai moweꞌiaꞌ kuasaꞌ.
13 Mewaliꞌ laoaꞌ i Damasiꞌ,
agáiáná i kalialo i tangaꞌ rárá,
hangkaꞌ-hangkaꞌ perái kuita wangkaꞌ hangko i langiꞌ,
pewangkaꞌna rumihi mani hangko i pewangkaꞌna alo.
Pewangkaꞌ iti mowangkaꞌiaꞌ hai upu-upu tauna to meuláꞌ i kódóꞌ.
14 Madungkáꞌangkaiꞌ upu-upu,
hai ara wambaꞌ to molaluita i kódóꞌ i lalu básá Iberani,
nauliꞌ node:
‘Saulu,
Saulu,
moapa riꞌi haneꞌiAꞌ nupopeahiahiꞌ?
Mopamapári pekoꞌ wátámu haduduámu ane moewaꞌkoꞌ oaꞌ peteteꞌKuꞌ.’
15 Kupekuneꞌ,
‘Tuá,
heánáKoꞌ?’
Nahánikiaꞌ,
‘Kódóꞌ miꞌi Iesu,
to nupopeahiahiꞌ!
16 Meángkáꞌmokoꞌ!
Kupatongawaꞌámokoꞌ wátáNgkuꞌ,
láwiꞌ ara tunggáiáNgkuꞌ i hio:
Kupileꞌimokoꞌ mewaliꞌ topobágóꞌKuꞌ hai sabiꞌKuꞌ.
Hangaa-ngaa nupahaweꞌ i tauna ntániꞌna apa to nuita miꞌi i alo dehangaloá mokana i Kódóꞌ,
hai apa to ina Kupopaitaꞌákoꞌ i alo to ina haweꞌ.
17 Ina Kukábáhákoꞌ hangko i kuasaꞌraꞌ toIahudiꞌ hai hangko i kuasaꞌraꞌ tauna to tiꞌara toIahudiꞌ.
Kuhuoꞌkoꞌ lao moánti NgkóráꞌKuꞌ i hira.
18 Kuhuoꞌkoꞌ lao mopaturoꞌheꞌ tauna
to tiꞌara maniAꞌ moisá
bona mepoináláiheꞌ,
hai mopálehiheꞌ kamakáindi
lao i kamabaa,
bona tekábáháheꞌ
hangko i kuasaꞌna Datu Tokadake,
haneꞌi nakuasaꞌiheꞌ Pueꞌ Ala.
Kuhuoꞌkoꞌ lao
bona dósáraꞌ ina naꞌámpungi Pueꞌ Ala,
hai ina molámbiꞌheꞌ woꞌo gáláꞌraꞌ
i oloꞌraꞌ tauna to magasaꞌ ánti pepoináláiraꞌ i Kódóꞌ.’ ”
Paulu mampolaluita kana i pobágóꞌna
19 Roo onoꞌ,
Paulu mopaliliu wopiꞌi laluitana,
nauliꞌ,
“Datu Agaripa to kubiláꞌ.
Onoꞌ miꞌi haneꞌi kupári-pári mampeuláꞌi apa to nahángáꞌáꞌaꞌ Pueꞌ i lalu pampatongawaꞌNa i kódóꞌ.
20 Onoꞌ miꞌi haneꞌi kupahaweꞌ i upu-upu tauna,
hangaa-ngaa menosoꞌheꞌ hangko i dósáraꞌ hai mengkoruꞌheꞌ i Pueꞌ Ala,
hai hangaa-ngaa mobábehiheꞌ apa to maroꞌa bona tongawaꞌ penosoꞌraꞌ.
Rungu-runguna bámbári iti kupahaweꞌ i kótá Damasiꞌ,
roo onoꞌ i Ierusale hai i humalele tampoꞌ Iudá,
haneꞌi i tauna ntániꞌna to tiꞌaraheꞌ toIahudiꞌ.
21 Onoꞌ miꞌi haneꞌi rahakaꞌaꞌ toIahudiꞌ i Támbina Pueꞌ Ala hai rapoinao mopapateaꞌ.
22 Agáiáná kehapiꞌ noꞌonoꞌ,
duuꞌna deꞌe-deꞌe,
Pueꞌ Ala mokámpáiaꞌ,
hai peisá maniaꞌ meángkáꞌ ieneꞌ mampolaluita kana i posabikingkuꞌ Pueꞌ Iesu i upu-upu tauna,
maroꞌa i tauna to mapángkáꞌ lántiꞌna,
maroꞌa i tauna biásá.
Apa to kuꞌuliꞌ deꞌe,
bateꞌna hibali hai apa to rapahaweꞌ miꞌi ami Musa hai nabiꞌ-nabiꞌ hangkoia.
23 To ratunggái ia miꞌi:
Datu Topehómpóꞌ hangaa-ngaa rapopeahiahiꞌ hai rapapate,b
hai ánti kaꞌIana miꞌi to rungu-runguna tueꞌ huleꞌ hangko i kapate,
Ia to ina mopatongawaꞌ ngkóráꞌna Pueꞌ Ala to mowangkaꞌi laluraꞌ upu-upu tauna,
maroꞌa toIahudiꞌ,
maroꞌa to tiꞌaraheꞌ toIahudiꞌ.”
24 Tangaꞌna mani Paulu molaluita,
Petusi molaluita miꞌi napasimbuku,
nauliꞌ,
“Magilakoꞌ,
Paulu!
Kapándemu iti to mopamagilakoꞌ.”
25 Nahániki Paulu,
“Mágáuꞌ to kubiláꞌ,
tiꞌaraꞌaꞌ magila.
To kupolaluita iti,
toꞌu hai mesuaꞌ i akala.
26 Datu Agaripa woꞌo,
naisá miꞌi mokana i apa to kuꞌuliꞌ ininá,
onoꞌ miꞌi haneꞌi tiꞌaraꞌaꞌ malááꞌ molaluita noꞌonoꞌ i lindoꞌna.
Kupekiri tiꞌara ara to tiꞌara mani nahádi Datu Agaripa,
láwiꞌ upu-upu to mewaliꞌ iti,
tiꞌara ara to tewuniángi.
27 Datu Agaripa to kubiláꞌ!
Ba nupoinálái apa to rauliꞌ nabiꞌ-nabiꞌ hangkoia?
Kuisá nupoinálái apa to rauliꞌ!”
28 Nahániki Datu Agaripa,
“Ba nupekiri paꞌi ane kupehádingi apa to nupolaluita iti,
ina poloꞌaꞌ mewaliꞌ toSarani?”
29 Nahániki Paulu,
“Mekakaeaꞌ i Pueꞌ Ala bona,
kawiáꞌ ba marue,
datu hai upu-upu tauna to mampehádingi laluitangkuꞌ alo deꞌe,
ina mewaliꞌkou nodo kódóꞌ hai mepoináláikou i Pueꞌ Iesu,
ngkáliꞌna riꞌi tiꞌarakou nodo kódóꞌ,
ratimpuku hai rante deꞌe.”
30 Kahópóꞌána,
meángkáꞌmoheꞌ Datu Agaripa,
Mágáuꞌ Petusi hai Beanike,
hingkakani hai rángáraꞌ,
haneꞌi pohuꞌheꞌ hangko i lintuꞌ pogómbóá.
31 Haweꞌheꞌ i rawa,
molaluitamoheꞌ hadua hai hadua,
rauliꞌ,
“Tauna iti,
tiꞌara woia ara salaꞌna to hintotoꞌ rahukuá mate ba ratarungkuá.”
32 Hangko onoꞌ,
nauliꞌ Datu Agaripa i Mágáuꞌ Petusi,
“Kekatoꞌuána,
peisá miꞌi rakábáhá,
ane ketiꞌara mobuáꞌ kárá-kárána i Datu Mahile i Roma.”