Paulu i lindoꞌna Mágáuꞌ Petusi
25
Tálu miꞌi alona rapomágáuꞌ,
Petusi pohuꞌ hangko i kótá Kaisarea lao i kótá Ierusale.
2 Kahaweꞌna ionoꞌ,
kapalaꞌ-kapalaꞌ tadulako menómbá hai tadulakoraꞌ toIahudiꞌ laomoheꞌ i Petusi mopahaweꞌ pesalaꞌiraꞌ i Paulu.
3 Membiáꞌ ntepuꞌuheꞌ i Petusi bona hangko i kamaroꞌana laluna,
ia mohuoꞌ tauna bona moánti Paulu lao i Ierusale,
láwiꞌ tunggáiáraꞌ bona Paulu rapapate peá i tangaꞌ rárá.
4 Agáiáná nahániki Petusi,
“Paulu deꞌe-deꞌe ratarungku i Kaisarea hai tiꞌara marue ina mesuleꞌaꞌ lao ionoꞌ.
5 Rángina miꞌi nipileꞌi hangko i oloꞌmi tauna to makuasaꞌ,
to ina meuláꞌ i kódóꞌ lao i Kaisarea,
bona kupehádingi laluitami,
ba ara mpuꞌu bábehiána to salaꞌ.”
6 Uwalu ba hampuloꞌ mani alona Petusi ara i Ierusale,
hangko mesuleꞌ riꞌi lao i Kaisarea.
Kahalona,
ia mokióꞌheꞌ upu-upu tadulakoraꞌ toIahudiꞌ to meuláꞌ i hia,
bona mogómbóheꞌ,
hai napehawaꞌiá bona Paulu raꞌánti i pogómbóáraꞌ.
7 I kahaweꞌna Paulu,
toIahudiꞌ to haweꞌ hangko i Ierusale meángkáꞌ motolelingi Paulu,
hai mesalaꞌiheꞌ.
Handaꞌ pákáꞌna pesalaꞌi to matimi rapahaweꞌá,
agáiáná katoꞌuna popahaweꞌraꞌ iti tiꞌara ara katongawaꞌána.
8 Roo onoꞌ,
Paulu mopahaweꞌ i katoꞌu-toꞌuána,
nauliꞌ,
“Tiꞌara ara salaꞌkuꞌ!
Tiꞌaraꞌaꞌ moliungi áturáraꞌ toIahudiꞌ,
ba motitibei Támbina Pueꞌ Ala,
ba moewaꞌ Datu Mahile i Roma!”
9 Ánti kanapoinaona Petusi moala laluraꞌ toIahudiꞌ,
napekuneꞌ i Paulu,
“Ba nupokana lao i Ierusale,
bona kárá-kárámu rahoda-hoda i lindoꞌkuꞌ ionoꞌ?”
10 Nahániki Paulu,
“Deꞌe-deꞌe,
meángkáꞌaꞌ i lindoꞌna mágáuꞌ to mosulewátái Datu Mahile Roma.
Hai bateꞌna topopárentá Roma to hintotoꞌ mobutusi kárá-kárángkuꞌ.
Nuisá ntepuꞌu mágáuꞌ,
katiꞌárána ara salaꞌkuꞌ i toIahudiꞌ.
11 Ane toꞌu-toꞌu ara salaꞌkuꞌ to hintotoꞌ rahukuáꞌaꞌ mate,
timamaꞌaꞌ rapapate.
Agáiáná ane tiꞌara toꞌu popahaweꞌraꞌ toIahudiꞌ deꞌe,
tiꞌara ara hadua tauna to peisá mohuhuꞌaꞌ i lalu kuasaꞌraꞌ.
Hangaa-ngaa kárá-kárángkuꞌ kubuáꞌ i Datu Mahile i Roma!”
12 Kanahádina Petusi laluitana Paulu iti,
mopolaluita miꞌi i taunána to mopatente,
haneꞌi nauliꞌ i Paulu,
“Ánti pembiáꞌmu bona kárá-kárámu nabutusi Datu Mahile,
hangaa-ngaa laokoꞌ i kótá Roma molindoꞌ Datu Mahile iti.”
Paulu i lindoꞌna Datu Agaripa hai Beanike
13 Bahangapa alona hangko ionoꞌ,
Datu Agaripaa hai Beanike ádina towawine,
laoheꞌ i kótá Kaisarea moweoꞌ Petusi bona mopahaweꞌ tabeáraꞌ ánti karaꞌángkáꞌna miꞌi mewaliꞌ mágáuꞌ.
14 Láwiꞌ bahangapa aloraꞌ ionoꞌ,
Petusi molaluita i Datu Agaripa mokana i kárá-kárána Paulu,
nauliꞌ,
“Ara ieneꞌ hadua tauna to ratarungku i tempóna popárentána Peliꞌ,
hai ia ratarungku mani.
15 I tempóngkuꞌ ara i Ierusale,
kapalaꞌ-kapalaꞌ tadulako menómbá hai totosaeraꞌ toIahudiꞌ mopahaweꞌáꞌaꞌ pesalaꞌiraꞌ i tauna iti,
hai membiáꞌheꞌ bona ia rahuku.
16 Kuhánikiheꞌ node:
Mouláꞌ áturángkiꞌ toRoma,
tauna to rasalaꞌi tiꞌara peisá kásáliu rahuhuꞌ i to mesalaꞌi.
Ia hangaa-ngaa rahoda-hoda sieruꞌ mombelindoꞌ hai to mesalaꞌi iti,
hai hangaa-ngaa raweꞌi woꞌo tempó mampeámpárái wátána haduduána.
17 Hangko ionoꞌ,
bahangapa tadulakoraꞌ toIahudiꞌ maiheꞌ hingkakani hai kódóꞌ hangko i kótá Ierusale.
Kahaweꞌkiꞌ ieneꞌ,
tiꞌara kupegiá marue.
Kahalona,
kupehuoꞌá bona Paulu raꞌánti mai haneꞌi kihoda-hoda kárá-kárána.
18 Upu-upu tauna to mesalaꞌi iti araheꞌ woꞌo i lindoꞌkuꞌ bona mopahaweꞌheꞌ pesalaꞌiraꞌ.
Kuꞌuliꞌ riꞌi ara bábehiána Paulu to kadake ntepuꞌu to rasalaꞌiá,
mole tiꞌaranto.
19 To kulámbiꞌ,
mamposisalaꞌi peheꞌ ágámáraꞌ.
Mampombeheheꞌi peheꞌ hadua tauna to rahangaꞌ Iesu.
Tauna iti mate miꞌi,
agáiáná nauliꞌ Paulu,
bateꞌNa tueꞌ miꞌi huleꞌ.
20 Mewaliꞌ wuliaꞌ noumbá rárána mobutusi kárá-kárána iti,
onoꞌ miꞌi haneꞌi kupekuneꞌ i Paulu ba napokana lao i Ierusale,
bona kárá-kárána rahoda-hoda ionoꞌ.
21 Agáiáná napembiáꞌ bona kárá-kárána rabuáꞌ i Datu Mahile,
hai napembiáꞌ woꞌo bona rakámpái duuꞌna haweꞌ i lindoꞌna Datu Mahile.
Onoꞌ miꞌi haneꞌi kupehuoꞌá bona Paulu ratarungku mani duuꞌna peisá raꞌánti lao i Datu Mahile i Roma.”
22 Hangko ionoꞌ,
nauliꞌ Datu Agaripa i Petusi,
“Kupoinao woꞌo mohádi polaluitana tauna iti.”
Nauliꞌ Petusi,
“Kahalo rái ina nuhádi polaluitana.”
23 Kahalona,
haweꞌ wopaheꞌ Datu Agaripa hai Beanike ádina,
hai radupaꞌheꞌ hai handaꞌ pákáꞌna pepomahile.
Mesuaꞌheꞌ i lalu lintuꞌ pogómbóá hingkakani hai kapalaꞌ-kapalaꞌ tadulako surudadoꞌ hai totosae i kótá.
Petusi mampehuoꞌá bona Paulu raꞌánti lao i lindoꞌraꞌ.
24 Hangko ionoꞌ,
molaluita miꞌi Petusi,
nauliꞌ,
“Datu Agaripa to kubiláꞌ,
umaꞌ-umaꞌ hai upu-upu to ara ieneꞌ!
Nipeita tauna deꞌe!
Ia rasalaꞌi upu-upu toIahudiꞌ,
maroꞌa to i Ierusale,
maroꞌa to ieneꞌ i Kaisarea.
Molaluitaheꞌ rapasimbuku,
rapembiáꞌ i kódóꞌ bona tauna deꞌe rahukuá mate.
25 Kehapiꞌ noꞌonoꞌ,
tiꞌara ara salaꞌna to kulámbiꞌ to hintotoꞌ rahukuá mate.
Agáiáná ia membiáꞌ bona kárá-kárána rabuáꞌ i Datu Mahile i Roma,
onoꞌ miꞌi haneꞌi kupakanótó bona raꞌánti lao ionoꞌ.
26 Agáiáná tiꞌara mani manótó apa to hangaa-ngaa kuꞌukiꞌ i lalu surangkuꞌ i Datu Mahile.
Mewaliꞌ,
onoꞌ miꞌi haneꞌi kupehuoꞌá bona Paulu raꞌánti mai i lindoꞌmi,
pelumbuꞌna miꞌi i hio Datu Agaripa to kubiláꞌ.
Tunggáiángkuꞌ,
bona karoona rapáresáꞌ ieneꞌ,
ara miꞌi to peisá kuꞌukiꞌ,
27 láwiꞌ mouláꞌ polámbiꞌkuꞌ,
tiꞌara hintotoꞌ tauna raꞌánti lao i pebutusiá Datu Mahile ane tiꞌara ara sura to mopakanótó apa salaꞌna.”