23
Kahaweꞌna Paulu i Támbi Pogómbóá Topepáresáꞌ Mahile Agama Iahudiꞌ,
ia motótóiheꞌ upu-upu tadulako to ara ionoꞌ,
nahángáꞌáheꞌ,
“Halalungkuꞌ upu-upu!
I kabulána lalungkuꞌ,
mengkoruꞌaꞌ i Pueꞌ Ala duuꞌna deꞌe-deꞌe.”
2 Roo Paulu manguliꞌ noꞌonoꞌ,
Tadulako Menómbá Mahile Ananiaa mohuoꞌheꞌ tauna to i hintáiꞌna Paulu bona motampedaꞌheꞌ humena.
3 Nauliꞌ Paulu i Tadulako Menómbá Mahile,
“Pueꞌ Ala ina motampedaꞌkoꞌ woꞌo,
io to mampe to maroꞌa pekoꞌ!
Hangaa-ngaa nubutusi kárá-kárángkuꞌ hiolaꞌ hai áturá-áturá to teukiꞌ i Paturoꞌna Musa,b
agáiáná io haduduámu to moliungi áturá-áturá iti,
láwiꞌ nuhuoꞌheꞌ tauna motampedaꞌaꞌ!”
4 Hangko ionoꞌ,
ara tauna i hintáiꞌna Paulu to mohángáꞌá,
“Pebáiꞌ ntepuꞌukoꞌ mopakóiꞌ Tadulako Menómbá Mahile to mampopolumao bágóꞌna Pueꞌ Ala!”
5 Nahániki Paulu,
“Ó,
tiꞌara wongkódóꞌá kuisá kaꞌiana Tadulako Menómbá Mahile.
Kupembiáꞌ ámpu,
láwiꞌ kuisá ara mpuꞌu to teukiꞌ i lalu Sura Magasaꞌ node:
‘Ineeꞌkou mopakóiꞌ tadulakomi.’ ”c
6 Naisá miꞌi Paulu,
i oloꞌraꞌ tadulako iti,
araheꞌ to mouláꞌ paturoꞌraꞌ toSaduki,
araheꞌ woꞌo to mouláꞌ paturoꞌraꞌ toParisi.
Onoꞌ miꞌi haneꞌi ia molaluita i upu-upu Topepáresáꞌ Mahile,
napasimbuku nauliꞌ,
“Halalu-halalu!
Kódóꞌ deꞌe toParisiaꞌ,
hai pemuleꞌánaꞌaꞌ woꞌo toParisi.
Onoꞌ miꞌi haneꞌi rapáresáꞌ kárá-kárángkuꞌ ieneꞌ,
láwiꞌ kupoinálái,
tauna to mate bateꞌna ina tueꞌ huleꞌ!”
7 Karahádina toParisi hai toSaduki laluitana iti,
mombeheheꞌ-heheꞌheꞌ hai tiꞌarapoheꞌ hintuwuꞌ.
8 To rapombeheheꞌi iti,
láwiꞌ toSaduki tiꞌara mampoinálái tauna ina rapatueꞌ huleꞌ,
hai tiꞌaraheꞌ woꞌo mampoinálái kaꞌárána malaꞌeka ba tánuánáꞌ.
Agáiáná toParisi,
bateꞌraꞌ mampoinálái upu-upuna iti.
9 Kahópóꞌána,
rumihi ntepuꞌu posisalaꞌraꞌ.
Bahangapa guru agama to meuláꞌ i toParisi meángkáꞌheꞌ hai molaluitaheꞌ rapasimbuku,
rauliꞌ,
“Mouláꞌ polámbiꞌkiꞌ,
tiꞌara ara salaꞌna tauna deꞌe.
Babilaꞌ ara malaꞌeka ba tomate to mampolaluitaꞌá.”
10 Hangko ionoꞌ,
mantámbái karumihina pombeheheꞌ-heheꞌraꞌ,
duuꞌna kapalaꞌ tadulako surudadoꞌ iti mampokalááꞌ Paulu ina radulu.
Onoꞌ miꞌi haneꞌi nahuoꞌheꞌ surudadoꞌna lao moala Paulu hai moánti huleꞌ lao i támbi surudadoꞌ.
11 I karombengina Paulu i támbi surudadoꞌ iti,
hangkaꞌ-hangkaꞌ perái Pueꞌ Iesu meángkáꞌ i hintáiꞌna,
Nauliꞌ,
“Nupakaróhó lalumu.
Noumbá kaKuposabiꞌmu ieneꞌ i Ierusale,
noꞌonoꞌ woꞌo hangaa-ngaa mewaliꞌkoꞌ sabiꞌKuꞌ i kótá Roma.”
ToIahudiꞌ moliwoheꞌ ina mopapate Paulu
12 Kahalona,
bahangapaheꞌ toIahudiꞌ mogómbóheꞌ ngkániiꞌ-niiꞌ.
I pogómbóraꞌ iti,
modándiheꞌ tiꞌara maniheꞌ ina mandeꞌ ba mainu ane Paulu tiꞌara mani rapapate.
13 Kahandaꞌraꞌ to mogómbó iti,
iba puloꞌraꞌ lábi.
14 Mewaliꞌ,
laomoheꞌ i kapalaꞌ-kapalaꞌ tadulako menómbá hai totosaeraꞌ toIahudiꞌ,
rauliꞌ,
“Modándimongkaiꞌ,
tiꞌaraꞌangkaiꞌ sieruꞌ ina mandeꞌ ba mainu ane tiꞌara maniangkaiꞌ mopapate Paulu.
15 Mewaliꞌ,
kipembiáꞌ i umaꞌ-umaꞌ hai tadulako-tadulako i Pogómbó Mahile Agama,
bona nipembiáꞌ i tadulako surudadoꞌ toRoma moánti huleꞌ Paulu mai i lindoꞌmi,
bona ina nipáresáꞌ wopiꞌi kárá-kárána.
Hai ina timamaꞌangkaiꞌ mepapate hangko tiꞌara mani haweꞌ ieneꞌ.”
16 Agáiáná pinoánáꞌna Paulu mohádi tunggáiáraꞌ iti,
onoꞌ miꞌi haneꞌi nagagu lao i támbi surudadoꞌ mopahaweꞌ poliworaꞌ iti i Paulu.
17 Hangko ionoꞌ,
Paulu mokióꞌ hadua tadulako surudadoꞌ,
nauliꞌ,
“Nuánti ánáꞌntomoane deꞌe lao i kapalaꞌmi.
Ara to paraluu ina napahaweꞌ.”
18 Surudadoꞌ iti moánti mpuꞌu miꞌi ánáꞌntomoane iti lao i kapalaꞌna,
nauliꞌ,
“Tuá,
Paulu to ratarungku ieneꞌ,
membiáꞌ bona kuánti ánáꞌntomoane deꞌe i hio.
Ara to paraluu napahaweꞌákoꞌ.”
19 Mewaliꞌ kapalaꞌ tadulako surudadoꞌ iti motibaaꞌ taena ánáꞌntomoane iti,
naꞌánti karaoꞌ hantódiꞌ haneꞌi napekuneꞌ ngkábuni,
“Ánáꞌkuꞌ,
apa to ina nuhángáꞌáꞌáꞌaꞌ?”
20 Nahániki ánáꞌntomoane iti,
“Tuá,
aramoheꞌ toIahudiꞌ to mogómbó.
Himpudumoheꞌ ina membiáꞌheꞌ i hio bona kahalo pinoumángkuꞌ raꞌánti i lindoꞌraꞌ Topepáresáꞌ Mahile,
nodoheꞌ to ina mopáresáꞌ mpuꞌu wopiꞌi kárá-kárána.
21 Mewaliꞌ kupembiáꞌ tuá,
ineeꞌ nubukeki pembiáꞌraꞌ iti,
láwiꞌ araheꞌ iba puloꞌna lábi tauna to ina meáwungá i tangaꞌ rárá.
Modándimoheꞌ bona tiꞌaraheꞌ sieruꞌ ina mandeꞌ ba mainu ane tiꞌara maniheꞌ mopapate pinoumángkuꞌ.
Timamaheꞌ deꞌe-deꞌe,
mampegiá peramoheꞌ pehániꞌmu.”
22 Nauliꞌ kapalaꞌ tadulako surudadoꞌ iti,
“Ineeꞌ nupolaluita i heáná peá kanuwungkeꞌna miꞌi tunggáiáraꞌ iti.”
Roo onoꞌ,
ánáꞌntomoane iti nahuoꞌ miꞌi mesuleꞌ.
Paulu raꞌánti lao i Mágáuꞌ Peliꞌ
23 Roo onoꞌ,
kapalaꞌ tadulako surudadoꞌ iti mokióꞌ rodua tadulako surudadoꞌ,
nahángáꞌáheꞌ,
“Nirámpuheꞌ rongatu surudadoꞌ to molumao,
pitu puloꞌna surudadoꞌ to modárá,
hai rongatu surudadoꞌ to metawalaꞌ.
Deiná káindi tintiꞌ hahioꞌ,
pohuꞌmokou upu-upu lao i kótá Kaisarea.
24 Nipatimama woꞌo dárá to peisá napesaweꞌi Paulu,
hai niánti lao i Mágáuꞌ Peliꞌ bona tiꞌara marugiꞌ i rárá.”
25 Roo onoꞌ,
kapalaꞌ tadulako surudadoꞌ iti moukiꞌ sura i Mágáuꞌ Peliꞌ,
to manguliꞌ node:
26 “Molámbiꞌ to kubiláꞌ Mágáuꞌ Peliꞌ
i kótá Kaisarea
Tabeá hangko i kódóꞌ,
Laudiu Lisia.
27 Tauna deꞌe rahakaꞌ toIahudiꞌ hai ina rapapate,
agáiáná kuhádi ia toRoma,
onoꞌ miꞌi haneꞌi laoangkaiꞌ hai surudadoꞌ moala hangko i oloꞌraꞌ.
28 Ánti kakupoinaona moisá apa to rasalaꞌiá,
onoꞌ miꞌi haneꞌi kuánti i lindoꞌraꞌ Topepáresáꞌ Mahile Agama Iahudiꞌ.
29 Rapáresáꞌ miꞌi,
agáiáná tiꞌara ara salaꞌna to hintotoꞌ bona rahukuá mate ba ratarungku.
Rasalaꞌi peá mokana i ádá ágámáraꞌ.
30 Roo onoꞌ,
kuhádi kaꞌárána tunggáiáraꞌ toIahudiꞌ to kadake i hia,
onoꞌ miꞌi haneꞌi kupopeánti mai i hio Tuá Mágáuꞌ.
Hai kuhángáꞌáheꞌ ewálina ieneꞌ,
hangaa-ngaa laoheꞌ mopabuáꞌ i lindoꞌmu.
Ierusale
Kapalaꞌ tadulako surudadoꞌ
Laudiu Lisia”
31 Karoona sura iti naukiꞌ,
surudadoꞌ iti pohuꞌ mpuꞌumoheꞌ mampeuláꞌi hawaꞌna kapalaꞌ tadulakoraꞌ.
Káindi iti,
Paulu raꞌánti lao i kótá Antipari.d
32 Kahalona,
surudadoꞌ to molumao mesuleꞌheꞌe lao i támbi surudadoꞌ i kótá Ierusale.
Surudadoꞌ to modárá moántiheꞌ Paulu liliu lao i kótá Kaisarea.f
33 Kahaweꞌraꞌ ionoꞌ,
sura iti rapeweꞌi i Mágáuꞌ Peliꞌ,
hai Paulu woꞌo rahuhuꞌ i hia.
34 Karoona mágáuꞌ mobásá sura iti,
napekuneꞌ miꞌi i Paulu ba hangko i poropensi apai kaꞌaraꞌána.
Kanaisána mágáuꞌ Paulu iti hangko i poropensi Kilikia,
35 nauliꞌ,
“Ane noꞌonoꞌi,
ina kupáresáꞌ kárá-kárámu ane haweꞌmoheꞌ to mosalaꞌikoꞌ.”
Roo onoꞌ,
nahuoꞌ miꞌi surudadoꞌna mokámpái Paulu i lalu támbi mahile to naꞌaró Datu Herode Mahile hangkoia.