Iesu mesuaꞌ i Ierusale, hai ratóiá tauna to handaꞌ
11
Iesu hai topeguruNa hungkuꞌmoheꞌ i kótá Ierusale,
haweꞌmoheꞌ i wánuá Betania hai Betepagea i Buluꞌ Saitu.b
Ionoꞌ,
Iesu mohuoꞌ miꞌi rodua topeguruNac moioru,
2 Nahángáꞌáheꞌ,
“Mesuaꞌmokou i wánuá to ina taduuꞌ.d
Ane haweꞌmokou ionoꞌ,
ina niꞌita hambaꞌa kalide to maleheꞌ mani ratakaꞌ,
to tiꞌara mani haweꞌ hangkani rapesaweꞌi.
Nikekehi haneꞌi niántiáꞌAꞌ mai.
3 Ane ara tauna to mekuneꞌ i kómu moapa riꞌi haneꞌi nikekehi,
nihániki node:
‘Pueꞌ moparaluu,
hai ina Napopesuleꞌá pekou deiná.’ ”
4 Kalaoraꞌ miꞌi topeguruNa to rodua iti,
ralámbiꞌ mpuꞌu miꞌi hambaꞌa kalide to maleheꞌ mani ratakaꞌ i wiwi rárá i lindoꞌ támbi.
Tangaꞌraꞌ mokekehi kalide iti hangko i potakaꞌána,
5 tauna to meángkáꞌheꞌ ionoꞌ mekuneꞌ i hira,
“Moapa riꞌi haneꞌi nikekehi kalide iti?”
6 Rahániki nodo to nahángáꞌáheꞌ Iesu ininá.
Karahádina laluitaraꞌ topeguruna Iesu iti,
rapatodáhiheꞌ moala kalide iti.
7 Hangko ionoꞌ,
topeguruna Iesu moánti mpuꞌu miꞌi kalide iti lao i Hia,
haneꞌi ralámpiꞌi kumbáraꞌ.
Upu ralámpiꞌi,
mesaweꞌ miꞌi Iesu,e
8-9 haneꞌi laoheꞌ i Ierusale.
Handaꞌ tauna meuláꞌ i Hia.
Araheꞌ to moioru,
araheꞌ woꞌo to i bókóꞌ.
Handaꞌheꞌ to mowálá kumbáraꞌ i tangaꞌ rárá to napoliui Iesu,
hai araheꞌ woꞌo to lao moala taweꞌ to potarangke hangko i hinoe haneꞌi ratale i tangaꞌ rárá,
tandaꞌ pampomahileraꞌ i Iesu.
Tauna to handaꞌ iti mohoraꞌ-horaꞌheꞌ oaꞌ,
rauliꞌ:
“Hosana!
Tatóiá miꞌi Pueꞌ Ala!
Pueꞌ Ala mowátiꞌ Tauna to haweꞌ
to mewaliꞌ HuoꞌáNa!
10 Pueꞌ mowátiꞌ popárentáNa.
Ia ina mepárentá nodo Datu Daudiꞌ,
toioruntaꞌ hangkoia.f
Tatóiá miꞌi Pueꞌ Ala to i surugáꞌ!”g (Sura Petóiá 118:25-26)
11 Kahaweꞌraꞌ i kótá Ierusale,
Iesu liliu mesuaꞌ i lalu tangabaa Támbina Pueꞌ Ala.
Ionoꞌ Napáresáꞌ mantoleli.
Roo onoꞌ,
láwiꞌ ina káindi miꞌi,
mesuleꞌmoheꞌ hingkakani hai topeguruNa to hampuloꞌ hai rodua laoheꞌ i wánuá Betania.
Iesu mokambo kau ara
12 Kahalona,
pohuꞌ wopaheꞌ Iesu hai topeguruNa hangko i Betania lao i Ierusale.
I tangaꞌ rárá,
marimi miꞌi Iesu.
13 Karaoꞌ mani,
Ia moita hampóꞌá kau ara to marumbu taweꞌna.
Lao miꞌi i tóáꞌna mampeita ba arai wuaꞌna,h
agáiáná tiꞌara ara haweꞌ hambuaꞌ,
láwiꞌ tiꞌara mani tempóna mowuaꞌ.
14 Onoꞌ miꞌi haneꞌi Iesu mokambo kau iti,
Nauliꞌ,
“Mantepuꞌu deꞌe-deꞌe,
tiꞌara piꞌi ara to ina mandeꞌ wuaꞌmu.”
Hai topeguruNa mohádi laluitaNa iti.
Iesu mowura tauna to mobaluꞌ-baluꞌ i Támbina Pueꞌ Ala
15 Iesu hai topeguruNa haweꞌ wopaheꞌ i Ierusale,
haneꞌiheꞌ mesuaꞌ i tangabaa Támbina Pueꞌ Ala.
Ionoꞌ,
Iesu mowuraheꞌ tauna to mobaluꞌ-baluꞌ.
Ia modungká mejáraꞌ toposuláꞌ dóiꞌ,i
hai pehodaꞌáraꞌ topobaluꞌ-baluꞌ tádáhi manggebodoꞌ.
16 Tiꞌara woꞌo mopaliu tauna moánti párewáraꞌ moliu i tangabaa Támbina Pueꞌ Ala.
17 Roo onoꞌ,
Nahángáꞌáheꞌ,
“Tiꞌara paꞌi niꞌisá apa to teukiꞌ i lalu Sura Magasaꞌ?
Pueꞌ Ala manguliꞌ node:
‘TámbiNgkuꞌ hangaa-ngaa mewaliꞌ támbi pekakaeá to rapakeꞌ tauna hangko i humalele duniáꞌ.’
Agáiáná kómu,
‘nipopewaliꞌ riꞌi támbi kahirámpuá topanako!’ ”j
18 Karahádina kapalaꞌ-kapalaꞌ tadulako menómbá hai guru-guru agama apa to nabábehi Iesu,
mampeliꞌmoheꞌ rárá ina rapapate.
Agáiáná malááꞌheꞌ i Hia,
láwiꞌ raisá upu-upu tauna moundeꞌ mampehádingi paturoꞌNa.
19 Ina káindi miꞌi,
Iesu hai topeguruNa pohuꞌmoheꞌ hangko i kótá Ierusale.k
Mepoináláimokou i Pueꞌ Ala
20 Kahalona mepulo-pulo,
Iesu hai topeguruNa tangaꞌraꞌ mesuleꞌ lao i kótá Ierusale.
Moitaheꞌ kau ara to nakambo Iesu iamáindi mate miꞌi,
bangi haweꞌ i kálándána.
21 Nabuhinao miꞌi Peturuꞌ laluitana Iesu,
onoꞌ miꞌi haneꞌi nahángáꞌá,
“Guru!
Peita kau ara to Nukambo iti,
bangi miꞌi!”l
22 Nahániki Iesu,
“Mepoináláimokou i Pueꞌ Ala.
23 Toꞌu ntepuꞌu to Kuꞌuliꞌ hai Kuhángáꞌákou:
rápáꞌna ane nipohawaꞌá buluꞌ iti,
‘Teángkáꞌmokoꞌ hai manawoꞌkoꞌ i tahiꞌ!’m
bateꞌna ina mewaliꞌ,
asalaꞌ tiꞌara bata-bata lalumi hai nipoinálái ntepuꞌu,
apa to niuliꞌ iti ina mewaliꞌ.
24 Nipehádingi laluitaNgkuꞌ deꞌe.
Ane mekakaekou membiáꞌ ba apa-apa,
hangaa-ngaa nipoinálái kaꞌina naweꞌimi Pueꞌ Ala,
hai bateꞌna ina nitarima apa to nipembiáꞌ iti.
25 Ane mekakaekou hai ara mani rángámi to nipokóiꞌ inao,
hangaa-ngaa niámpungi sieruꞌ,
bona Umámi to ara i surugáꞌ ina moámpungi woꞌo salaꞌmi. [
26 Agáiáná ane tiꞌara niámpungi rángámi,
Umámi to i surugáꞌ tiꞌara woꞌo ina moámpungi salaꞌmi.]”n
Tadulako agama Iahudiꞌ mekuneꞌ i Iesu hangko iumbá kuasaꞌNa
27 Haweꞌ wopaheꞌ Iesu hai topeguruNa i kótá Ierusale.
I tempóraꞌ molulumao i tangabaa Támbina Pueꞌ Ala,
haweꞌmoheꞌ kapalaꞌ-kapalaꞌ tadulako menómbá,
guru-guru agama hai totosaeraꞌ toIahudiꞌ to ntániꞌna.
28 Mekuneꞌheꞌ i Iesu,
rauliꞌ,
“Nuhángáꞌáꞌangkaiꞌ,
heáná to moweꞌiKoꞌ kuasaꞌ {mowura topobaluꞌ-baluꞌ hangko i Támbina Pueꞌ Ala iamáindi hai mopaturoꞌ tauna to handaꞌ}?”o
29 Nahániki Iesu,
“Ara woꞌo hampákáꞌ pekuneꞌKuꞌ i kómu.
Ane nihánikiAꞌ,
hangko Kuhángáꞌárakou kaheánána to mampoweꞌiAꞌ kuasaꞌ mobábehi upu-upuna iti.
30 Heáná to moweꞌi kuasaꞌ i Iohane Toperiu moriu tauna?
Pueꞌ Ala,p
ba tauna?”
31 Molaluitamoheꞌ tadulakoraꞌ toIahudiꞌ iti hadua hai hadua,
rauliꞌ,
“Noumbá miꞌi katahánikiNa?
Ane tauliꞌi Pueꞌ Ala to moweꞌi kuasaꞌna,
ina nahángáꞌákeꞌ Iesu,
‘Ane noꞌonoꞌi,
moapa riꞌi haneꞌi tiꞌarakou mampoinálái apa to nauliꞌ Iohane?’
32 Agáiáná mapári woꞌo ane tauliꞌi tauna peá to moweꞌi kuasaꞌna.”
Tadulakoraꞌ toIahudiꞌ iti malááꞌheꞌ mopakóiꞌ Iohane Toperiu i lindoꞌraꞌ tauna to handaꞌ,
láwiꞌ handaꞌ tauna mampoinálái Iohane iti hadua nabiꞌ.
33 Mewaliꞌ rahániki,
“Tiꞌara kiꞌisá.”
Onoꞌ miꞌi haneꞌi nahángáꞌáheꞌ Iesu,
“Ane noꞌonoꞌi,
tiꞌarakou woꞌo ina Kuhángáꞌá heáná to moweꞌiAꞌ kuasaꞌKuꞌ iti.”