Iesu mopaꞌandeꞌ iba sábuna taunaa
8
Tiꞌara marue hangko ionoꞌ,
handaꞌ wopaheꞌ tauna to hirámpu.
Marimimoheꞌ láwiꞌ tiꞌara ara pandeꞌraꞌ,
onoꞌ miꞌi haneꞌi Iesu mokióꞌheꞌ topeguruNa,
Nahángáꞌáheꞌ,
2 “Maꞌahiꞌ laluNgkuꞌ moitaheꞌ tauna to handaꞌ deꞌe.
Tálu miꞌi aloraꞌ ieneꞌ,
tiꞌara piꞌi ara pandeꞌraꞌ.
3 Tiꞌara tuꞌu inaoNgkuꞌ ina mohuoꞌheꞌ mesuleꞌ tangaꞌraꞌ marimi.
Holoheꞌ paꞌi i rárá,
láwiꞌ araheꞌ to haweꞌ mai hangko karaoꞌ.”
4 Rauliꞌ topeguruNa,
“Iumbákeꞌ paꞌi ina molámbiꞌ pandeꞌ to magáná ina tapopaꞌandeꞌáheꞌ,
láwiꞌ karaoꞌkeꞌ hangko i wánuá hai kaꞌaraꞌántaꞌ deꞌe tiꞌara ara apa-apa?”
5 Nakuneꞌheꞌ Iesu,
“Hangapa wuaꞌna rótiꞌ to ara i kómu?”
Rahániki,
“Pitu peá wuaꞌna.”
6 Hangko ionoꞌ,
Iesu mohuoꞌmoheꞌ tauna to handaꞌ mehoda i tampoꞌ.
Ia moala miꞌi rótiꞌ to pitu wuaꞌna iti haneꞌi mekakae i Pueꞌ Ala.
Roo onoꞌ,
Nabiseꞌ-biseꞌ miꞌi haneꞌi Naweꞌiheꞌ topeguruNa bona ragáláꞌ-gáláꞌáheꞌ tauna to handaꞌ.
7 Ara woꞌo bahangapa báꞌána bouꞌ to kókóiꞌ.
Napekakaeá woꞌo haneꞌi Naweꞌiheꞌ topeguruNa bona ragáláꞌ-gáláꞌáheꞌ tauna to handaꞌ.
8 Mewaliꞌ mandeꞌmoheꞌ upu-upu duuꞌraꞌ mabuhu.
Karooraꞌ mandeꞌ,
pelábiána pandeꞌ rarámpu topeguruna Iesu,
pitu mani kárándina to mahile.b
9 Kahandaꞌraꞌ to mandeꞌ i tempó iti,
rekeꞌ-rekeꞌna iba sáburaꞌ.
Roo onoꞌ,
tauna to handaꞌ iti nahuoꞌmoheꞌ Iesu mesuleꞌ lao i támbiraꞌ,
10 haneꞌi Ia hai topeguruNa moduangaheꞌ lao i tampoꞌ Dalamanuta.
ToParisi membiáꞌheꞌ bona Iesu mobábehi tandaꞌ kuasaꞌ
11 Bahangapaheꞌ toParisi lao mampohidupaꞌá Iesu.
Mantepuꞌumoheꞌ mekuneꞌ-kuneꞌ láwiꞌ mampeliꞌ peheꞌ kamanawoꞌáNa i lindoꞌraꞌ tauna to handaꞌ.
Rahángáꞌá,
“Nupopaitaꞌangkaiꞌ tandaꞌ kuasaꞌ hangko i surugáꞌ bona tongawaꞌ i kaiꞌ kahangko i Pueꞌ AlaMu.”
12 Kanahádina Iesu laluitaraꞌ,
masusa laluna haneꞌi Nauliꞌ,
“Moapa riꞌi haneꞌi tauna to tueꞌ tempó deꞌe membiáꞌ tandaꞌ kuasaꞌ?
Kuhángáꞌákou,
tiꞌarakou ina Kupopaitaꞌá tandaꞌ kuasaꞌ nodo to nipembiáꞌ.”
13 Hangko ionoꞌ,
Napálehimoheꞌ hai mengkaheꞌ wopiꞌi i duanga lao tándáꞌ i hambali rano.
Paturoꞌraꞌ toParisi hai Datu Herode rapándiriꞌ nodo ragiꞌ
14 I kapohuꞌraꞌ iti,
topeguruna Iesu mokáláliꞌáheꞌ moánti boku,
bateꞌna peá hambuaꞌ rótiꞌ to ara i lalu duangaraꞌ.
15 Iesu mopahaweꞌ laluita deꞌe i hira,
Nauliꞌ,
“Maroꞌa-roꞌakou,
hai maingáꞌ-ingáꞌkou i ragiꞌraꞌ toParisi hai ragiꞌna Datu Herode!”
16 Agáiáná tiꞌara raisá tunggáiáNa molaluita noꞌonoꞌ,
onoꞌ miꞌi haneꞌiheꞌ molaluita hadua hai hadua,
rauliꞌ,
“Nauliꞌ noꞌonoꞌ láwiꞌ tiꞌarakeꞌ ara to moánti rótiꞌ.”
17 Naisá Iesu apa to rauliꞌ topeguruNa,
mewaliꞌ Nahángáꞌáheꞌ,
“Moapa riꞌi haneꞌi nipolaluita katiꞌárámi moánti rótiꞌ?
Tiꞌara mani niꞌisá lempóna apa to Kubábehi?
Tiꞌara paꞌi manótó i pekirimi mokana i Kódóꞌ?c
18 Handaꞌ kánimi mohádi paturoꞌKuꞌ,
hai handaꞌ kánimi moita kuasaꞌKuꞌ.
Pomata hai potalingantokou,
agáiáná tiꞌara niꞌisá apa lempóna to niꞌita hai to nihádi.d
19 Tiꞌara paꞌi nibuhinao?
TempóNgkuꞌ mopaꞌandeꞌ tauna to lima sáburaꞌ hangko i rótiꞌ to lima wuaꞌna to Kubiseꞌ-biseꞌ,
hangapa mani kárándina pelábiána to nirámpu?”
Rahániki topeguruNa,
“Hampuloꞌ hai rongkárándi.”
20 Napekuneꞌ wopiꞌi Iesu,
“Hai tempóNgkuꞌ mopaꞌandeꞌ tauna to iba sáburaꞌ hangko i rótiꞌ to pitu wuaꞌna,
hangapa mani woꞌo kárándina pelábiána to nirámpu?”
Rauliꞌ,
“Pitu kárándina.”
21 Nahángáꞌá wopaheꞌ,
“Mewaliꞌ moapa riꞌi haneꞌi tiꞌara mani niꞌisá apa tunggáiáNgkuꞌ?”e
Iesu mopakauriꞌ hadua tobilo i Besaida
22 Kahópóꞌána,
Iesu hai topeguruNa haweꞌheꞌ i wánuá Besaida.f
Ionoꞌ,
araheꞌ tauna to moánti hadua tobilo i Iesu,
rapembiáꞌ bona Napekamaꞌ.
23 Natibaaꞌ miꞌi Iesu taena tobilo iti,
haneꞌi Nateteꞌ lao i rawa wánuá.
Hangko ionoꞌ,
Natinuduhi mátána haneꞌi Nakamaꞌ.
Roo onoꞌ,
Napekuneꞌ,
“Ara to nuita?”
24 Tobilo iti mampehukáꞌ mampeita apa to ara i lindoꞌna,
hai nauliꞌ,
“Kuitaheꞌ tauna molumao,
agáiáná nodo peheꞌ kau,
láwiꞌ mowáá-wáá peheꞌ kuita.”
25 Haneꞌi Nakamaꞌ wopiꞌi Iesu mátána karongkánina.
Mauriꞌ mpuꞌu miꞌi.
Upu-upu to naita,
tongawaꞌ miꞌi.
26 Roo onoꞌ,
Nahuoꞌ miꞌi Iesu mesuleꞌ lao i támbina,
Nauliꞌ,
“Mesuleꞌmokoꞌ lao i támbimu,
agáiáná ineeꞌkoꞌ mesuaꞌ i lalu wánuá Besaida deꞌe-deꞌe.”
Peturuꞌ mopangákuꞌ kaꞌIesuna Datu Topehómpóꞌ
27 Iesu hai topeguruNa laomoheꞌ i wánuá-wánuá to hungkuꞌ i kótá Kaisarea Pilipi.g
I tangaꞌ rárá,
mekuneꞌ miꞌi Iesu,
Nauliꞌ,
“Mouláꞌ panguliꞌraꞌ tauna to handaꞌ,
Kódóꞌ deꞌe,
heánáꞌAꞌ?”
28 Mehániꞌheꞌ topeguruNa,
“Araheꞌ to manguliꞌ Iohane Toperiu to tueꞌ huleꞌ.
Araheꞌ woꞌo to manguliꞌ nabiꞌ Eliá to haweꞌ wopiꞌi hangko i surugáꞌ nodo to nadándi Pueꞌ Ala.h
Araheꞌ woꞌo to manguliꞌ Io hadua nabiꞌ hangkoia to tueꞌ huleꞌ.”
29 Nakuneꞌ wopaheꞌ,
Nauliꞌ,
“Ane kómu,
mouláꞌ polámbiꞌmi,
Kódóꞌ deꞌe,
heánáꞌAꞌ?”
Nahániki Peturuꞌ,
“Io miꞌi toMásehi,
Datu Topehómpóꞌ!”
30 Hangko ionoꞌ,
Nahángáꞌáheꞌ,
“Ineeꞌ riꞌi niuliꞌ-uliꞌ i heáná peá kaheánáNgkuꞌ.”i
Iesu mampolaluita kana i kaꞌina mateNa
31 Hangko ionoꞌ,
natepuꞌu miꞌi Iesu mopahaweꞌ i topeguruNa apa to hangaa-ngaa ina mewaliꞌ i wátáNa haduduáNa,
Nauliꞌ,
“Ánáꞌ Mánusiá hangaa-ngaa molámbiꞌ handaꞌ kapári.j
Ia ina rasapuáka kapalaꞌ-kapalaꞌ tadulako menómbá,
guru-guru agama,
hai totosaeraꞌ toIahudiꞌ to ntániꞌna,
hai ina rahuku mate.
Agáiáná i katáluna alona,
Ia ina tueꞌ huleꞌ.”k
32 Upu-upuna iti Napakanótóáheꞌ,
agáiáná Peturuꞌ modiiꞌ Iesu lao i hintáiꞌna haneꞌi nakámbáróá {láwiꞌ Iesu mampolaluita kaꞌina mateNa}.
33 Mehaileꞌ miꞌi Iesu motótói topeguruNa,
haneꞌi mokabukoꞌi Peturuꞌ,
Nahángáꞌá,
“Pobaeꞌ!
Io nodokoꞌ Datu Tokadake,
{láwiꞌ mampehukáꞌkoꞌ mokeloꞌAꞌ bona tiꞌaraꞌAꞌ mampeuláꞌi peundeꞌána Pueꞌ Ala}.l
Pekirimu iti pekiri tauna peá,
tiꞌara pekirina Pueꞌ Ala.”m
Iesu mampolaluita rárá mewaliꞌ topeguruNa
34 Roo onoꞌ,
Iesu mokióꞌ tauna to handaꞌ hai topeguruNa,
Nahángáꞌáheꞌ,
“Heáná to mampoinao meuláꞌ i Kódóꞌ,
hangaa-ngaa mokábáhá peundeꞌána haduduána hai hangaa-ngaa timama mantódihá kapári,n
haneꞌi meuláꞌ i Kódóꞌ.
35 Láwiꞌ heáná to mokábáhá peundeꞌána haduduána ánti peuláꞌna i Kódóꞌ hai ánti Ngkóráꞌ Marasa,
kehapiꞌ rapapate,
ia miꞌi to ina molámbiꞌ katehómpóꞌ.
Agáiáná heáná to mampeuláꞌi peundeꞌána haduduána,
tiꞌara ina molámbiꞌ katueꞌ to maroꞌa to tiꞌara mokahópóꞌá.
36 Apa bunduꞌna morámpukou upu-upu kapebuku i duniáꞌ,
agáiáná tiꞌarakou molámbiꞌ katehómpóꞌ i alo pobutusi?o
37 Tiꞌara ara apa-apa to peisá niweꞌi Pueꞌ Ala bona molámbiꞌkou katehómpóꞌ iti.
38 Tueꞌkou i oloꞌraꞌ tauna to kadake hai to tiꞌara meuláꞌ i Kódóꞌ.
Ane heáná to mahili mopangákuꞌ peuláꞌna i Kódóꞌ hai mampokahili woꞌo paturoꞌKuꞌ,
Kódóꞌ woꞌo ina mahiliAꞌ mopangákuꞌ kaꞌiana topeuláꞌKuꞌ ane haweꞌAꞌ huleꞌ hangko i surugáꞌ.
I tempó iti,
Ánáꞌ Mánusiá ina mendáulu mai hangko i surugáꞌ hingkakani hai malaꞌeka to magasaꞌ,
hai ina meawaꞌ ánti kuasaꞌna UmáNa.”