Kahópóꞌána duniáꞌ
12
Malaꞌeka to mewaruꞌ to bulá iti,
mopaliliu laluitana,a
nauliꞌ,
“I tempó onoꞌ,
ina haweꞌ Mikaeli,
malaꞌeka to mokámpái tampoꞌ Sáráeliꞌ.
Hangko ionoꞌ,
ina ara kapári to rumihi to tiꞌara mani hangkani mewaliꞌ,
mantepuꞌu i tempóna tauna mopakeꞌ básá to montaniꞌ-ntaniꞌ.b
Agáiáná i tempó iti,
upu-upu hángká toSáráeliꞌmu to teukiꞌ hangaꞌraꞌ i Surana Pueꞌ,
ia miꞌi Sura Ngkatueꞌ,c
ina rapelaeheꞌ.
2 Handaꞌ tauna to matemoheꞌ,
ina tueꞌheꞌ huleꞌ hai ina molámbiꞌheꞌ katueꞌ to maroꞌa to tiꞌara mokahópóꞌá.
Hai hantángáꞌheꞌ woꞌo ina tueꞌheꞌ huleꞌ hai molámbiꞌheꞌ kapári to meriringkuꞌi to tiꞌara mokahópóꞌá.
3 Tauna to manótó laluraꞌ ina mewangkaꞌheꞌ nodo pewangkaꞌna langiꞌ.
Hira to ina mopaturoꞌ handaꞌ tauna bona mobábehiheꞌ apa to manótó i peitána Pueꞌ Ala.
Peisáheꞌ woꞌo rapándiriꞌ nodo betue to mewangkaꞌ haweꞌ i rue-ruena.”
4 Nauliꞌ wopiꞌi malaꞌeka iti i kódóꞌ,
“Danieli,
nutuko miꞌi hampaiꞌ sura iti,
hai nutandaꞌi hai petándái bona óntóꞌna tewuniángi haweꞌ i kahópóꞌána duniáꞌ.
Handaꞌ tauna ina mampoinao mampegurui sura iti bona raisá apa to ina mewaliꞌ,
hai kapánderaꞌ tauna ina mantámbái.”
5 Hangko ionoꞌ,
kuita rodua tobaleilo.
Hadua meángkáꞌ i wiwi uwai tándáꞌ i kódóꞌ,
hai to haduána meángkáꞌ tándáꞌ i hambali.
6 To haduána mekuneꞌ i to mopakeꞌ báná to meálu hai bulá,d
to meángkáꞌ tándáꞌ i uluna uwai,
nauliꞌ,
“Impirá kaꞌina hópóꞌána upu-upu to metingkáráki deꞌe?”
7 Tauna iti moángkáꞌ taena rombali i langiꞌ,
modándi i lalu hangaꞌna Pueꞌ Ala to tueꞌ duuꞌna i rue-ruena,
nauliꞌ,
“Upu-upu to mewaliꞌ deꞌe,
ina mewaliꞌ tálu parena hantangaꞌ kamaruena.
Ane upu-upu taunána Pueꞌ Ala mehárungá i Hia,
tiꞌara piꞌi mehárungá i kuasaꞌraꞌ haduduáraꞌ,
hangko hópóꞌ riꞌi pepopeahiahiꞌ to metingkáráki iti.”
8 Upu-upu to nauliꞌ iti manótó kakuhádina,
agáiáná tiꞌara kuisá apa tunggáiána.
Mewaliꞌ kupekuneꞌ,
“Tuá,
noumbá kahópóꞌána upu-upuna iti?”
9 Agáiáná nahániki node:
“Deꞌe-deꞌe,
pohuꞌmokoꞌ Danieli,
láwiꞌ upu-upu laluita deꞌe hangaa-ngaa ratuko hai rawuniángi haweꞌ-haweꞌ i kahópóꞌána duniáꞌ.
10 Handaꞌ tauna ina rapampehukáꞌi pepoináláiraꞌ bona mewaliꞌheꞌ magasaꞌ.
Upu-upu tauna to kadake bábehiáraꞌ,
tiꞌara ina raisá tunggáiána Pueꞌ Ala i pampopeahiahiꞌ iti,
onoꞌ miꞌi haneꞌi ina mobábehi peheꞌ oaꞌ bábehiá to kadake.
Agáiáná tauna to kaladu pekiriraꞌ ina moisáheꞌ tunggáiána Pueꞌ Ala iti.
11 Mantepuꞌu hangko i karapopengkaroona pohuhuꞌ popenómbá alo-alona,e
hai poaróna lenggeꞌ ánitu to meriringkuꞌi,
to rauliꞌ woꞌo To Kadake to Megero,f
ara hasábu rongatu hai hahioꞌ puloꞌna alona.g
12 Morasiꞌheꞌ tauna to tetidaꞌ oaꞌ haweꞌ i alo kahasábu tálu átuna tálu puloꞌna hai lima.
13 Agáiáná io Danieli,
pohuꞌmokoꞌ i katinda lalu.
Io ina matekoꞌ,
agáiáná ina tueꞌkoꞌ huleꞌ,
hai ina nutarima háwángina i kahópóꞌána duniáꞌ.”