Pampetudeꞌá i uwai Tigiri
10
I pare katálu Datu Koresia mepárentá i Peresia,
hampákáꞌ ngkóráꞌ rapatongawaꞌ i Danieli,
to rauliꞌ woꞌo Beletasaꞌ.
Ngkóráꞌ iti toꞌu,
hai mopatongawaꞌ kaꞌina árána kapári to rumihi.
Onoꞌ miꞌi haneꞌi napailalu ntepuꞌu ngkóráꞌ iti,
hai napeliꞌ apa tunggáiána.
Mewaliꞌ rapatongawaꞌá mpuꞌu miꞌi apa lempóna moliu pampetudeꞌá.
2 I tempó iti,
kódóꞌ Danieli tálu mingguna kamaruena masusa ntepuꞌu lalungkuꞌ mampekiri hángká toSáráeliꞌkuꞌ.
3 Mewaliꞌ tálu mingguna kamaruena tiꞌaraꞌaꞌ mandeꞌ pandeꞌ to matamaꞌ,
tepasuaꞌ bauꞌ,
hai tiꞌaraꞌaꞌ woꞌo mainu anggoroꞌ,
tandaꞌ kamengkaiwóiꞌkuꞌ i Pueꞌ.
Hai tiꞌaraꞌaꞌ woꞌo mekakarabiꞌ ba mopakeꞌ mina-mina to mawongi.
4 Imbaꞌna rompuloꞌ hai iba wulá kaꞌisáꞌ,b
kódóꞌ meángkáꞌaꞌ i wiwi uwai Tigiri to maeláꞌ.
5 Tempóngkuꞌ i wiwi uwai Tigiri,
iaperái hangkaꞌ kuita hadua tauna to mopakeꞌ badu to meálu hai bulá ntepuꞌu,
hai pámpouna rabábehi hangko i buláwá to magasaꞌ to hangko i tampoꞌ Upa.
6 Wátána mewangkaꞌ nodo watu tarsis to mengkilaꞌ ntepuꞌu,
lindoꞌna makaaꞌ nodo kiláꞌ,
mátána roreꞌ nodo api,
taena hai bitina mengkilaꞌ nodo tambaga,
hai wambaꞌna nodo pohewona tauna to handaꞌ.
7 Kódóꞌ peá haduduángkuꞌ to moita pampetudeꞌá iti.
Upu-upu tauna to hingkakani hai kódóꞌ,
tiꞌara raita,
agáiáná malááꞌ ntepuꞌuheꞌ haneꞌi melangkaheꞌ lao mentabuni.
8 Mewaliꞌ haduduángkuꞌ perái.
Pampetudeꞌá to metingkáráki iti kupeita oaꞌ,
onoꞌ haneꞌi upu róhóngkuꞌ hai lindoꞌkuꞌ mewaliꞌ mabádáꞌ.
9 I kakuhádina wambaꞌ iti,
kásáliu malimpuaꞌ haneꞌiaꞌ tepámbáká i tampoꞌ.
10 Hangko ionoꞌ,
ara to maiaꞌ mampekamaꞌ haneꞌi pempaaꞌaꞌ,
onoꞌ haneꞌi kubuku mpuꞌu miꞌi mearó,
agáiáná moboboulá peaꞌ.
11 Nauliꞌ,
“Danieli!
Io miꞌi hadua tauna to napokaꞌahiꞌ Pueꞌ Ala.
Meángkáꞌmokoꞌ haneꞌi nupehádingi maroꞌa laluitangkuꞌ deꞌe.
Kódóꞌ miꞌi deꞌe to nahuoꞌ Pueꞌ mai i hio.”
Kanauliꞌna peá noꞌonoꞌ,
kásáliu meángkáꞌaꞌ hai moridiꞌaꞌ ánti kamalááꞌkuꞌ.
12 Hangko ionoꞌ,
nauliꞌ wopiꞌi,
“Ineeꞌkoꞌ malááꞌ,
Danieli,
láwiꞌ Pueꞌ Ala mampehádingi miꞌi upu-upu pekakaemu,
mantepuꞌu hangko i rungu-rungumu mengkaiwóiꞌ hai nupári-pári moisá apa to Natudeꞌáꞌákoꞌ iti.
Mewaliꞌ kahaweꞌkuꞌ deꞌe,
ánti pembiáꞌmu moliu pekakaemu.
13 Malaꞌekac to mokámpái kadatuá Peresia moewaꞌaꞌ rompuloꞌ hai hangalo kamaruena.
Agáiáná Mikaeli,
hadua hangko i oloꞌraꞌ tadulako malaꞌeka,
mai motulungiaꞌ.
Hangko ionoꞌ,
kupálehi Mikaeli ionoꞌ mampombelindoꞌá datu-datu to ara i Peresia.
14 Tunggáiána kahaweꞌkuꞌ deꞌe,
bona kuhángáꞌáꞌákoꞌ apa to ina mewaliꞌ i toSáráeliꞌ i alo to ina haweꞌ,
láwiꞌ pampetudeꞌá deꞌe mokana i alo iti.”
15 Kaupuna nahángáꞌáꞌaꞌ upu-upuna iti,
liliuaꞌ motóngkóꞌ hai tiꞌara piꞌi kuisá apa to ina kuꞌuliꞌ.
16 Agáiáná haweꞌ hadua to nodo tauna,
mai motóbóꞌ humengkuꞌ,
hangko peisáraꞌaꞌ molaluita wopiꞌi.
Mewaliꞌ kuꞌuliꞌ i to tangaꞌna meángkáꞌ i lindoꞌkuꞌ,
“Tuá!
Ánti pampetudeꞌá deꞌe,
haneꞌi tiꞌara kulalu hai tiꞌara ara róhóngkuꞌ.
17 Kódóꞌ hadua hawiꞌ to tepaiwóiꞌáꞌaꞌ.
Tiꞌaraꞌaꞌ hintotoꞌ molaluita hai io.
Róhóngkuꞌ upu hai maꞌángkárá kuhádi meinao.”
18 Kaupungkuꞌ molaluita,
natibaaꞌ wopaꞌaꞌ karongkánina,
haneꞌi mewaliꞌaꞌ huleꞌ maróhó.
19 Nauliꞌ,
“Io miꞌi hadua to napokaꞌahiꞌ Pueꞌ Ala,
mewaliꞌ ineeꞌ bata-bata lalumu hai ineeꞌkoꞌ malááꞌ.
Deꞌe-deꞌe hangaa-ngaa maróhókoꞌ.”
Kaupuna peá nauliꞌ noꞌonoꞌ,
kuhádiá kamantámbáina róhóngkuꞌ haneꞌi kuꞌuliꞌ,
“Tuá,
kupembiáꞌ bona io molaluitakoꞌ i kódóꞌ,
láwiꞌ nupoweꞌimoꞌ róhó.”
20 Mewaliꞌ nauliꞌ wopiꞌi,
“Ba nuisá tunggáiángkuꞌ haneꞌiaꞌ mai i hio?
Tiꞌara marue ina mesuleꞌaꞌ huleꞌ lao mampombealaꞌá malaꞌeka to mokámpái Peresia.
Hai ane upu miꞌi,
malaꞌeka to mokámpái tampoꞌ Iunani ina haweꞌ.
21 Agáiáná kehapiꞌ miꞌi noꞌonoꞌ,
bateꞌna kuhángáꞌákoꞌ apa to teukiꞌ i lalu Sura to peisá rapoinálái.
Bona nuisá,
tiꞌara ara haweꞌ hadua to tándáꞌ i kódóꞌ,
ngkáliꞌna peá Mikaeli tadulakomu.”