Isehaag Yaaguub idehar
27
01 Isehaag eegrimamiyaayt aagw'ad afreeyaanihoob,
w'oorooh oowin Iisaaw waliikyaayt,
<<W'ooruun Iisaaw!>>
idi.
W'oor <<Ani tooy eefi,>>
idi.
02 Isehaag <<Ani oont'a eegrimamaabu,
nhoob ayaayeeb kaakan.
03 Oont'a igadh'eek yaksaat m'aa!
Malya umingaay bayaat malaaliit dhhani diraat m'aa.
04 Beet tum'ari ani areeyaniyeet daayiib tikwiyaat haay m'aa.
Tamiit har'ii,
ani baayaay akay iidehar hook andi.>>
idi.
05 Ribeeka aree Isehaag w'oorooh bhaliisamiyeeb oodoor tiimsaw.
Iisaaw malaaliit dhhaniya shookiyi jillaay giigiya.
06 Batuuh Yaaguubii dehaay,
<<Baabuuk Iisaaw usaniyook dehaay iideeb ibhali amaasiw.
07 Baabuuk usaniyook dehaay,
<Daayiit m'ari tikwiyaat haay m'aa ani baayaay,
malyaab W'ankwanaay suurii iidehar hook andi> idi.
08 Oont'a w'ooruun,
daayiib sinaakira!
Ani andiyeetook d'iya.
09 Baruuk ooreew bayaat,
maloot n'ayt adhamiit dhhaat yaksaat haay m'aa.
Malya ani baabiyook dehaay daayiib itaakw andi.
Baruuh yharriiweet iikwasi andi.
10 Malya baabook haay bayaat tamsaa!
Aflaay baruuh baayaay iidehar hook indi.>>
tidi.
11 Yaaguub <<Usanu Iisaaw winneet hamooy taku,
ani laakiin winneet limsa garooy taki.
12 Baabu aneeb tehiiniyeek,
malya na ani antiileet toona ikteeniyeek,
ani deharaab hiisee n'alla kii'ateheeb!>>
idi.
13 Ribeeka tuundi aree <<W'ooru!
W'aat aneeb ba'iiktim,
baruuk ani andiyeet toona faaysa oobhaat,
giigaat toosha haay m'aa.>>
tidi.
14 Baruuh aflaay giigiya,
toosha imriit toondeetii dehaay haay eeya.
Tuundi toosha winneet daayiib titkwi,
Isehaag yhiriweet tikwaas.
15 Malya Ribeeka Iisaawiib yhalaaka idaayiib igawiib iifiin yaksitaayt,
Yaaguub w'oorooh oodis tistookw.
16 Masi batuuh Yaaguubiib ubashar ilimsaabwa,
y'ayeehwa,
t'alaawwa n'aayti sarii tikwibis.
17 Malya batuuh yhadhiiwwa tim'ariiwwa w'oorooh Yaaguub tehii.
18 Yaaguub ubaaba ibaayt,
<<Baab!>>
idi.
Ubaaba aree,
<<Ahaa,
w'ooruun,
aabwa?>>
idi.
19 Yaaguub <<Ani Iisaaw w'oorook usuurkina.
Toona baruuk tidiyeet faaysan.
Hindeeh asa s'aat tum'ari tamaa.
Malyaab ideharaayook aharriiw.>>
idi.
20 Isehaag w'oorooh raatiya,
<<W'ooruun,
kak willa dhhaniit timriya?>>
idi.
Yaaguub <<W'ankwana Ukwaasanaayuuk ansiryaheeb.>>
idi.
21 Isehaag <<W'ooruun,
diwla m'aa,
hindeeh tehatook,
Iisaaw tikatiyeeb bitkaayeeb iikan hook andi.>>
idi.
22 Yaaguub idwil eeya.
Ubaaba barooh tehiyaayt har'ii,
<<Whiss Yaaguubu hissu,
laakiin y'ayi Iisaawiiba.>>
idi.
23 Y'ayaah oosani ayeet hamooyaabayt ubaaba kanaab kiiki.
Oont'a Isehaag w'oorooh Iisaaw hiisee,
Yaaguub idehar.
24 Isehaag Yaaguub raatiya,
<<Baruuk sidik w'ooru Iisaawwa?>>
idi.
Yaaguub <<Awooh aneebi.>>
idi.
25 Isehaag <<Aflaay malaaliit dhhaniyaateet toosha oont'a hiyaheeb,
malya iidehar hook andi.>>
idi.
Yaaguub ubaaba shalikt sha yhi,
baruuh han tamiya.
Masi baruuh haab nuuniya,
wha han ubaaba gw'iya.
26 Malya Isehaag <<W'ooruun tooy m'aa f'aaheeb.>>
idi.
27 Yaaguub baabooh f'iya door,
Isehaag Yaaguubiib yhalaakaayi baraam shiikamiya,
<<W'ooriyu ubaraam
W'ankwana baarakaab ikatiyeeb
Taabri kehook basiifiin
Tuubuut dehook daruur dehook bayaksiti.
n'ati suurook kuuramiin ba'iiktiin.
Baruuk isanaayeek kehii had'aab akaa.
Deetiyaak y'ar iragaadaayeek whii kuurmiin ba'iiktiin,
barook in'iit,
atoo'ataab ba'iikti.
Barook baarakiiniib,
baarakamaab ba'iikti.>>
idi.
30 Igidiyeesooh Isehaag Yaaguub ideharaayt har'ii giigiya,
Iisaaw umingaayiit dhhaniyaati shooktii ikraf eeya.
31 Baruuh tum'ari tinafit daayiib itkwiit ubaabaay dehaay haay eeya.
Malya <<Baab!
Asa s'aat toosha ani haay y'aneetook tamaa!
Malya ideharaayook aharriiw.>>
idi.
32 Isehaag barooh raatiya,
<<Baruuk aabwa?>>
idi.
Iisaaw <<Ani Iisaaw w'oorook usuurkina.>>
idi.
33 Isehaag idhee <<Aflaay been dhhaniyaat shookiyaayt toosha haay eeyaab,
malya na toosha ani tamanaayt adehareeb aabu?
Sidik libaabi indi.>>
idi.
34 Iisaaw ubaabaay bhali imaasiwihoob winneet waawiyaayt,
ubaabaay yhariw,
<<Baab,
aneeb han deharaheeb!>>
idi.
35 Isehaag laakiin <<Usanuuk itilheeb,
bariiyook idehara igwhar iyha.>>
idi.
36 Iisaaw <<Usanu oosim Yaaguub sidik astehaliini.
Baruuh aneeb malu doora itliseheeb.
Oodoor oongaal isuurkinaay whaggi igwharheeb,
t'a aree idehara hoosu igwhar.>>
idi.
Malya baruuh <<Baabuun!
Naat deharaab weer ishaab kitta han?>>
idi.
37 Isehaag <<W'ooruun,
ani Yaaguub bariiyook had'a akwaas,
y'ayaydeeh aree kishiyaayeeh akwaas,
masi wharroowwa whaawwa haay adehar.
Oont'a mhiyaana naat kitehaay,
w'ooruun!>>
idi.
38 Iisaaw ubaaba raatiya,
<<Baabu,
baruuk gaal deharaab nuun weer kitbariya han?
Aneeb han deharaheeb!>>
idi.
Shaawti Iisaaw winneet milootiya.
39 Isehaag ubaaba idi:
<<Ugawuuk sagi mhiin daayi indi,
Been whaash iyadh'anaay sangi,
Tibreeti siif iiktim hook kiidi,
40 Baruuk y'akrireesook
b'adhdhiisook ikwaar tindiya.
Baruuk usaniyook kishiya iikti tindiya.
Laakiin baruuk fiduug niyaamtiniyihoob
fidagti iyaay tindiya.>>
idi.
41 Iisaaw oosan Yaaguub winneet irib.
Yaaguub bariiyooh idehara hooy igwhar akay winneet irib.
Malya ugarooyooh bhaliisamiya,
<<Baabu iyaayyeeni har'ii Yaaguub idaar andi.>>
idi.
42 Ribeeka,
Iisaaw Yaaguub oosan diraa iideet toona timaasiwihoob,
barooh waliiksita.
W'oorooh oodis Yaaguub tibaayt,
<<Iisaaw usanuuk bariiyeek madar hangiit,
idaar hook indi.
43 Oont'a baruuk ani andiyeeb ibhali sinaakira.
Baruuk aniib oosan Laabaan Haraaneeb eefeeb baya.
44 Middaat gaat geeb s'aa.
Iisaaw tehasiyaay fandiigihoob,
45 baruuk hooy tid'iyeet toona eebdhiinihoob,
diigwat dehook afandiig,
malya kirafa m'aa.
Y'ari mhallee gaat yintiib naanhooy kwidhsani?>>
tidi.
46 Ribeeka Isehaagii dehaay,
<<Taan Iisaawiit taam'a Tehiiti tuduniya n'eet deha ikwaasna!
Yaaguub Hiitaayiit ind'iireenaatiika aneeb tuuyat deha hanyiis.>>
tidi.