Sadoomwa Gamooraawwa kat'amiyaan
19
01 Imalak imalu himniit Sadoom eeyaan.
Luut tumadiinaati dheefaay iist'a.
Bareeh rhiyanihoob,
Luut yakiyaayt toobuut kuuramee y'ashish.
02 Baruuh <<Yhaana!
Ani kishiyaayookna.
M'aana oogaw w'aniib shuumaana.
Iragadaayeekna shaagwidhna whawaad oon naayaana,
malyaab fajir giigaana.>>
idi.
Baraah <<Abadan,
hinin tumadiinaati bitik oongwaabiib diwaa niyad.>>
idiin.
03 Laakiin baruuh winneet hooy yhariwihoob,
baraah oogaw geeb ibeen.
Baruuh m'ariit dehaay shagaamiya,
fitra tam dehaay itkwiit tamiyaan.
04 Baraah diwaab baakaay akay,
uudehay tumadiina Sadoomeeb iifiin uuwwinwa uudiswa kassaah oogaw ikwilalna.
05 Baraah Luut waliikiyaana,
<<Aanda igeebook naayaab keeyaana?
Tooy haay m'aa eenda m'at niikwasi niyad,
geeb diwni niyad.>>
idiin.
06 Luut ifir'a,
udheefa hooy assiya id'i.
07 Malya baruuh <<Bak baasakaana y'arawaan.
Bak baashagaamaana!
Tuun maagnaaytu.
08 Ani maloot arit abari masi han d'art baakayt,
dehookna waliikat toona baraak tehariwneet geeb shagaamaana.
Een eenda laakiin amaag baaweerna!
Aan baraah anii iibaabkina,
anii hasiibi ikatiin.>>
idi.
09 Baraah <<Hineeb usalal hooy bidh'a!>>
idiin.
Malya baraah masi,
<<Baruuk uknaayuuk girba takwa.
Hinin sootniyee dehaay whaggiib kitbariya,
hoon iittar bitdiyeek bareesoohka amaagkaana hook niid'a niyad.>>
idiin.
Baraah akraab Luut bhaliisamiyaan.
Malyaab udheefa ookiik dhaabiyaaniit kat'itiib yhariwna.
10 Laakiin imalak imalu ugawiib iifiin ifir'aniit Luut diiseet isikwniit oogaw tehooy shuumisiyaan.
11 Baraah oodehay dis win kasseeh ithaab'ana hamasheesiyaan,
udheefa ookna irhiti adgiraab kiikeen.
12 Aanda imalu Luutii dehaay,
<<Tooy weer dehay ayaydaak:
areek,
hamaayeek,
tari dehay weer tumadiina hooy tibariyeek,
oon umhiinii mhalaa.
13 Hinin oon oomhiin kwidhsi niyad.
W'ankwana toon tumadiinaatii akraat maagnaayt maasiwaabuuyt,
tumadiina kat'inayi jillaay diigwatiya hoon.>>
idiin.
14 Oont'a Luut ifir'a,
eenda t'arteeh daasaab ibaayt,
<<W'ankwana tumadiina kat'i indi.
Willa oon oomhiin hooy fir'ana!>>
idi.
Laakiin t'arteeh daasaab aanda baruuh mileemiyeeb hiisiin.
15 Fajir oomb'i ooraaw,
imalak <<Willa,
willa tutakatookwa t'arteek timalu tooy eefeenwa yaksaa,
een bitweeriyeek tumadiinaati geeb jasami tindiya.>>
idiin.
16 Baruuh eetehakiyani door,
aanda baroohwa tutakatoohwa,
t'arteehwa y'ayi y'aabikniit diiseet tumadiinaatii luuliyaani mhaliyaan.
W'ankwana bareeyooh dehaay n'akw manaayi akay ishidhhan.
17 Imalak bareeh isfar'ani har'ii,
gaal bareesooh <<Baruuk uknaayuuk foora!
Har'a baanakama,
t'abaatiib mhiin han baangaada!
Eerba ookiik foora beentooy m'asig imaar tindiya.>>
idi.
18 Laakiin Luut bareeyooh dehaay,
<<Y'ankwanaayaan!
Anaahookna bak kiiki!
19 Ani ukishiyaayuukna gwidaat daayiinaayt hookna miraabi.
Baraakna tishidhhanna hoon,
laakiin eerba ookiik baadhaabsaana hoon,
aarba winneet sagiiba ani ka'adgiran.
Hinin eerba kitimaab baakaay tumadiina kat'amee iinkab hoon tindi,
nituudir niyad.
20 Shibibna!
Tooy madiinaat dawit teefi,
hinin batooh beeti dhaabi niyad.
Batuuh winneet dist madiinaati,
bak kiiki han?
Aflaay midhhan imaar andi.>>
idi.
21 Umalak bariiyooh dehaay,
<<Daayiitu,
been tooy beena.
Baraak beet tumadiina tikatimneeb ookiik kat'i kaadi.
22 Laakiin baruuk ashshigaa,
dhaabaa!
Baruuk been tooy asgaa kantiimeeb ookiik ani naat han iigwibib kaadi.>>
idi.
Oon usabbii beet tumadiina Soo'ara titoosaam.
23 Luut tumadiina Soo'ar iktimihoob,
tuuyin gayii far'at akay tiifi.
24 Been oodoor W'ankwana Sadoomwa Gamooraaywa kehii teebreewwa toobuutwa balooliint mindi kehii isiisiyaam.
25 Shaawti Ukwaasana teen timadiina kasteeh kat'iya id'i,
kassooh oodehay hooy iifiin idaar,
idaruur whaashiib yakaab han kassooh kwidhsiya.
26 Laakiin Luutiit tutakat har'ooh tishbib akay miilaki aamuud tiki.
27 Karuumaab fajir Ibraahiim yakiyaayt,
suur W'ankwanaay geeb hooy ingadeeb oomhiin beeti y'agar.
28 Baruuh Sadoomwa Gamooraawwa n'ati ishibib,
kassooh whaashi ingwaab ishbibihoob,
eedhaab ukwaraar t'iiteeb whaashii itfir'a rhiya.
29 Ukwaasana w'atmuuriit madiina kwidhsiyanihoob,
Ibraahiim sh'iya.
Luut hooy ikwiireet timadiinaateeb barooh han tooyattii ishidhhan.
30 Luutwa t'artaah timalu Soo'ar y'ishniit eerba askiniyaan.
Baruuh Soo'areeb ookwiraay irkwi.
Baruuhwa t'artaah timalu amariib askiniyaan.
31 Yint gaat t'oor tuuwin toodisnaatii dehaay,
<<Baabuun oont'a eegrimu,
kassaah aanda id'aneet t'aadaateet,
tooy y'iit hini geeb diwiini tak kiihaay.
32 Baaboon haab gw'asni,
malya geeb diwni,
shaawti hinin bariisooh ar nifaar niyad.>>
tidi.
33 Been whawaad bataah ubaaba haab gw'asiyaan,
t'oor tuuwin oon'aaliib geeb diwta.
Laakiin baruuh winneet ashkira iifi akay,
batuuh tuukna tiifiyeeb bitehaayiib igam.
34 Oomb'i ooraaw t'oor tuuwin masi tookwa toodisnaatii dehaay,
<<Afa ani baabiyoon geeb diwan.
Amsi whawaad han yakii haab gw'asni,
malya batuuk geeb imb'ii,
uufraayuun baabiisoon ba'iikti.>>
tidi.
35 Been whawaad masi ubaaba haab gw'asiisiyaan.
T'oor tuudis yaktaayt ubaabaay geeb diwta.
Baruuh nhoob batuuh geeb diwtaneeb tib'areeb kanaab kiiki.
36 Malya Luutiit t'arit mhalloota baabiisoohna inkwiina.
37 T'oor tusuurkina oor tifri,
barooh Moo'aab tiisim.
Moo'aab,
indhiwa amsi eefeen Imoo'aabaayi hooba ikati.
38 T'oor tuudis han oor tifri,
barooh Bin Aammii tiisim.
Bin Aammii,
amsi eefeen Y'ammoonaayi hooba ikati.