Ugalad Udaayim
17
01 Abraam ashshadhig tamuunwa ashshadhig hawlaab iibriyi door,
Ukwaasana masi dehaay lawiyaayt,
<<Ani Ukwaasana W'alyaabu.
Baruuk ani andiyeet toona dan'iyeek,
kassoohoob shiboot saktiniyeek,
02 bariiyook geeb galad ihikwir andi,
y'areek winneet guudsi andi.>>
idi.
03 Abraam ifiireeh deha dhibiya.
Ukwaasana aree bariiyooh dehaay,
04 <<Baruuk gwidaat gabiilaati hooba iikti tindiya.
Uun baruuh aniib ugalad bariiyook geeb daayiiniibu.
05 Baruuk shaawti Abraam ituusim kitdiya,
laakiin Ibraahiim ituusim tindiya.
Ani gwidaat gabiilaati hooba akwaas hooka.
06 Ani barook winneet gwida firaay ibariib iikwasi andi hook.
Bariisook gwida dehay tawaamiin iyadna,
yhad'a han bariiyeek y'areeh iikti iyadna.
07 Aniib ugalad door han baayaayu.
Barookwa aneebwa,
bariiyook har'ii y'areeyeek arwa aneebwa ibitikeen galad iikati indi.
Ani bariiyook Kwaasana.
Y'areeyeek ari Kwaasana.
08 Hallaay baruuk hooy girbaab tikatiyeeb kassooh Ikan'aani haash,
barookwa y'areeyeek arwa diimaab jab'ookna akwaas.
Ani bareeyooh Kwaasana iikti andi.>>
idi.
09 Masi Ukwaasana Ibraahiimii dehaay,
<<Baruuk aniib ugalad daayiib kaleewa.
Baruukwa y'areeyaak arwa,
har'ook y'iiniib uufiraaywa aniib ugalad daayiib kaleewaana.
10 Uun baruuh aniib ugaladu.
Barookwa y'areek har'ook y'eenwa daayiib abikna.
Kassaah irabaaba bareesookna ibakii itkwashiibna.
11 Baraak ibakii titkwashiibna,
uun baruuh aree ugaladiit alaama ikati.
12 Kasseeh idaman har'ook y'een uutaas,
inisrika itfariini har'ii tooyin t'asimha ibakii itkwashiibna.
Aan bariiyook udehayiib itfariin han itkwashiibna,
tari ikishiya idilba ahaab tikatiini han itkwashiibna.
13 Ugawiyook faray ikatiineek,
imhallagaayee dilba ahaab tikatiineek,
kassaah ibakii itkwashiibna.
Aniib ugalad ibashariyookna diimaab daayiini.
14 Aanda iraba ikwashab baakay,
ugalad ikit'ana akay baraah han udehayiisooh itkit'a iyadna.>>
idi.
15 Ukwaasana Ibraahiimii dehaay masi,
<<Tutakatook Saaraay shaawti Saaraay iyaad kitdiya,
Saara ituusim tindi.
16 Ani batooh baaraki andi.
Baruuk oont'a oor hooy ifaar tindiya.
Gwida dehay hootooh iikti tindi.
Yhad'a batiisooh itfir iyadna.>>
idi.
17 Ibraahiim ifiireeh dehaay dhibiya,
winneet ifaayidaayt,
<<Sheeb hawlaab ibari tak oor farri han?
Saara ashshadhig tamuun hawla barii oor farri han?>>
idi.
18 Ibraahiim Ukwaasanaay dehaay,
<<Baruuk Ismaa'iil oobhaat dehoon deharaab tiiktiyeek hayiskaat kitti han?>>
idi.
19 Ukwaasana aree <<Awooh baku,
laakiin tutakatuuk Saara oor dehook ifaar tindi.
W'oor Isehaag iisim tindiya.
Aniib ugalad udaayim geeb eefee,
bariiyeeh y'ari ari geeb han eefi.
20 Laakiin Ismaa'iil baaraki andi.
Bariiyeek ibhali han amaasiw.
Gwida firaay baa'adhdhagwgwiib iyaaw andi.
Baruuh tamna malu had'aayi baaba iikti indi.
Bariiyeeh indhiwa akra dehay iikwasi andi.
21 Laakiin ugaladi Saara whawil oont'a y'iiniib farriyeeb Isehaagi geeb iitkwikw andi.>>
idi.
22 Ukwaasana Ibraahiimi geeb ibhali faaysiyaayt har'ii,
y'ish hooy giigiya.
23 Beet tooyin Ibraahiim w'oorooh Ismaa'iilwa,
kasseeh irabaaba baliin ugawiyooh faray iiktiinwa,
imhallagaayee dilba ahaab iiktiyeebwa,
Ukwaasana sooyaneet toonaatiit kasseeh ikwaashib.
24 Ibraahiim ikwshabi door ashshadhig tamuunwa ashshadhig hawla iibri.
25 W'ooruuh Ismaa'iil aree tamna mhay hawla iibri.
26 Ibraahiimwa w'ooruuh Ismaa'iilwa mhallaah beet tooyin hiddaab ikwshabna.
27 Kassaah irabaaba Ibraahiimiib ugawiib faray y'ayaydaahwa,
ikishiya dilba ahaab iiktiineebwa han geeb ikwshabna.