Abraam Luut ishidhhan
14
01 Amraafil whad'a Ibaabilyooni,
whad'a Aryook Alaasaari,
whad'a Kadarla'oomeer W'eelaami,
whad'a Tid'aal Goo'iimi,
aan baraah kassaah been udamaaniib had'aaba.
02 Baliin baraah aree Sadoomeeb whad'a Baar'aawwa,
Birsha Gamooraay whad'aawwa,
Shiinaab Adamaay whad'aawwa,
Shim'eebar Sabooyiimi had'aawwa,
Baal'aay had'aawwa finaasamiyaana.
Whad'a Baal'a Suugar han ituusim.
03 Aan kassaah yhad'a yhar'i Siddim oobhar imiilakiyaayiib idheeshoosna ishaawna finaab imarna.
04 Baraah tamna malu hawlaab Kadarla'oomeeriit tehad'aayeeti whii iifiin.
Laakiin whawil utamna mhayaay been whad'a imooth'ana.
05 Whawil utamna fadhiga Kadarla'oomeerwa yhad'a aaraw geeb iifiinwa yakiyaaniit,
Irafaaya Ashtaaroot Karnaa'imiib iifiinwa,
Isuusi Yhaamiiwwa,
Y'iima Shaafa Garyataayimiibwa ith'aniit igribna.
06 Malya Yhuuriiya eerbaayi haash Sa'iireeb iifiin han igribna.
Kassooh whaash Iil Faaraaniib umingaay dawil mhiin ookiik ith'ana.
07 Malyaab baraah har'a y'agarna Een Mishbaat (Gaadish) marii idifniit,
Y'amaaliiki haash kassooh y'abikna.
Masi Hasassuun Taamaar ikwiir Y'amuuriya haash han y'abikna.
08 Malyaab Sadoomi whad'aawwa,
Gamooraay whad'aawwa,
Adamahaay whad'aawwa,
Sabooyiimwa Baal'ay yhad'aawwa gadh'amiyaaniit,
Siddim t'abaatiib finaaysamiyaan.
09 Kadarla'oomeer Eelaami whad'aawwa,
Tiid'aal Goo'iimi whad'aawwa,
Amraafil Shiin'aari whad'aawwa,
Aryook Alaasaari whad'aawwa finaayaan.
Fadhig had'a ay had'a imooth'ana.
10 Siddimeet t'aba oont'a kwitraani deelaab titab.
Sadoomwa Gamooraay yhad'a ifoornihoob,
daab gwadi deelaay dhadhibiyaan wari eerba ookiik dhaabiyaan.
11 Yhad'a ifadhig Sadoomwa Gamooraay iifiin,
oomraaywa tim'ariiwwa kastooh ikwilalniit iyheen.
Malya y'ishna giigiyaan.
12 Sadoom iifiib Abraamiib usani oor,
Luutwa kassooh oomraayoohwa han haay giigiyaan.
13 Foora y'a tak gaal toon toona Abraam W'ibraani sooya.
Beenhoob Abraam Maamar Y'amuuriya yhindi eegwimadi haashi dar ikwiir.
Maamariib isana Aashkoolwa Aanarwa Abraam araweesamiyaan.
14 Abraam usaniyuuh oor abaak iiktiyeet toona imaasiw.
Beenhoob,
baruuh mhay sheebwa tamna asimhay shagaamana winneet finaayanaab y'ayaydeeh waliikiya.
Daan tumadiina ookiik aree geeb giigiya.
15 Whawaad beeb Abraam daayiib finaayiini jillaay eendeeh kasteeh teejhaateeb ibrir id'i.
Y'ashooyee gali fooraa iifiin akay,
Diimashgeet tugiblaatiib iifi haash Hoobaa iidneeb ookiik aree bareeh iskwi.
16 Baruuh kassooh oomraay w'ameesilbaabwa w'ayaay takooh Luutwa iiyhaayt eeya.
Teem'atwa oodehay ooraawwa han haay eeya.
Malkisaadik Abraam idehar
17 Abraam,
whad'a Kadarla'oomeerwa yhad'a eerawwa igribeenaay har'ii y'agar.
Malya Sadoomeeb whad'a Shaafeeh t'abaatiib y'anshiishi jillaay giigiya.
Been whaash <<Whad'aayt aba>> han iidna.
18 Malya Malkisaadik Saalimi had'a hadhiibwa haabwa dehaay haay eeya.
Baruuh Ukwaasana Utageegaay fagiiri iikti.
19 Baruuh Abraam idehar,
<<Abraam Ukwaasana Utageega,
toobuutwa teebireewwa ikwaasnaayt tubaraka hooy badaati.
20 Whamaad Ukwaasana Utageeganaay ba'iikti.
Ukwaasana bariiyeek y'ashu w'ayook id'iib.>>
idi.
Malya Abraam kassooh oomraay haay eeyaneenaay tutamnaat takwi oon whad'a yhii.
21 Sadoomeeb whad'a Abraamii deha,
<<Oodehay aneeb hiiyyaheeb,
oomraay ooraaw baruuk ahaaya.>>
idi.
22 Laakiin Abraam <<Ani w'ayu Ukwaasanaay dehaay asa abkaabi,
toobuutwa teebreewwa ikwaas Ukwaasana Utageegaab dehaay halafooyaabi.
23 Ani bariitookna gaat han iyaay kaadi.
<Abraam ani gabsan!>
batdiyi jillaay,
gaal luul tari gidh'ati m'adhab ikatiyeek han bariisook iyaay kaadi.
24 Aniib w'adhidh,
aniib aanda tamiyaaneet tim'ari batiikti.
Laakiin Aanirwa,
Ashkoolwa,
Maamarwa geebu iifiin,
toona haay y'aab nikatiyeetii w'adhdhoosna hiiyya.>>
idi.