Baabil oogaw utageegaab
11
01 Beenhoob kassuuh uudehay gal bhaliib iibriina,
gal bhali hadiidiin.
02 Laakiin uudehay oomhi beeti giigiyaaniit,
Shiin'aar iktimna.
Beentooy atmuur imriiniit hooy kookiyaan.
03 Baraah taktakee dehaay,
<<M'aana,
toob nid'aka daayiib nikaam.>>
imsiyoodaayna.
Malya y'aweewwa oothiinwa kwitraanii is'abbikniit toob id'iin.
04 Malya baraah <<M'aana,
hinin igarooyoon deha madiinaat shagaamni,
tageega gaw teebiri kantiim niid'a.
Shaawti nitoosiim,
kastooh toobuuti kehii han nitbirir kindi.>>
idiin.
05 Laakiin W'ankwana uudehay shagaamiineet tumadiinaawwa oogawwa iishbibee dehaay ikwibar eeya.
06 W'ankwana <<Aan baraah gal bhali hadiideen akay hiddaab shagaameen.
Oont'a bak badooyaaba.
Shaawti bareeh anfiina daayi kitdi,
yhariwneenaaka shagaamiin iyadna.
07 Yakaana,
bareeh beeti tikwni,
een bareeh taktak baa'afhamayaab niikwasi.
Gwida bhali niishaaw shaawti taktak ka'afhamiyaan.>>
idi.
08 Aflaay Ukwaasana bareeh kastooh toobuuti kehii ibrir id'i,
baraah tumadiinaati d'uur han isingadna id'iin.
09 Toon toonaatii dehaay,
Ukwaasana beentooy oodehayi bhali ishaawawi id'i akay tumadiina Baabilyoon atoosmaati.
Shaawti Ukwaasana bareeh kastooh toobuuti kehii ibrir id'i.
Saamiib y'ar
10-11 Aan baraah aree Saamiib y'ara.
Malu hawla ukwaani har'ii,
Saam sheeb hawla iibri.
Beenhoob,
baruuh oor Arfakshaad iidneeb iibri.
Masi gwida arwa aritwa iibri,
iyanihoob aree asagwir shi hawlaab iibri.
Aan baraah aree ifraayooh ikatiin:
12 Arfakshaad mhaytamuunwa ay hawla iiktiyihoob Shaalahaab ifri.
13 Arfakshaad Shaalahaab ifriyeenaay har'ii,
fadhig sheebwa mhay hawla ikwiri,
masi wari arwa aritwa ifri.
14 Shaalaha mhay tamuun hawlaab id'iyi har'ii,
Aabir ifri.
15 Shaalaha Aabir ifriyeenaay har'ii,
fadhig sheebwa mhay hawla ikwiri,
masi wari arwa aritwa ifri.
16 Aabir mhay tamuunwa fadhig hawlaab iiktiyihoob,
Faalag ifri.
17 Aabir Faalag ifriyeenaay har'ii,
fadhig sheebwa mhay tamuun hawla ikwiri,
masi wari arwa aritwa ifri.
18 Faalag mhay tamuun hawlaab iiktiyihoob,
Ra'uub ifri.
19 Baruuh Ra'uub ifriyeenaay har'ii,
malu sheebwa ashshadhig hawla ikwiri,
masi wari arwa aritwa iibri.
20 Ra'uu mhay tamuunwa malu hawlaab iiktiyihoob,
Saruug ifri.
21 Baruuh Saruug ifriyeenaay har'ii,
malu sheebwa asarama hawla ikwiri,
masi wari arwa aritwa iibri.
22 Saruug mhay tamuun hawlaab iikwiyeenaay har'ii,
Naahuur iidna oor ifri.
23 Saruug Naahuur ifriyeenaay har'ii,
malu shi hawla ikwiri,
masi wari arwa aritwa ifri.
24 Naahuur tagwgwu ashshadhig hawla iiktiyeenaay har'ii,
Taarahaab ifri.
25 Naahuur Taarahaab ifriyeenaay har'ii,
sheebwa tamna ashshadhig hawla ikwiri,
masi wari arwa aritwa ifri.
26 Taaraha asarama tamuun hawla iid'eenaay har'ii,
Abraamwa,
Naahuurwa,
Haaraanwa ifri.
27 Aan baraah aree Taarahaay y'ara:
Abraamwa,
Naahuurwa,
Haaraanwa ittiyoodiin.
Haaraan aree Luut ifri.
28 Haaraan,
ubaaba Taaraha masi dhhaniib akay,
whaash whooy faraay iiktiyeeb Uur Ikaldaaniyaayiib iya.
29 Abraamwa Naahuurwa mhalloobaah id'irna.
Abraamiit tutakat Saaraay iidna,
Naahuuriit tutakat aree Milkaab iidna.
Milka Haaraaniit ootu.
Haaraan,
Milkaabwa Iiskaabwa baaba ikati.
30 Saaraay giduudiit tikee ar kitbari.
31 Taaraha w'oorooh Abraamwa,
w'ooriyooh oor Luut Haaraanwa,
w'oorooh Abraamiit tutakat Saaraaywa iiyhaayt,
kassaah hiddaab Uur Ikaldaaniya iidneeb whaash beeti giigiyaan.
Kan'aan hadiit idifna.
Malya baraah Haaraan iktimnihoob beentooy kookamiyaan.
32 Taaraha malu sheebwa ay hawla id'iit malya Haaraaneeb iya.