22
01 Buulus <<Yaa isanaayaanwa ifarooyaanwa,
toona tutikeet dehookna hadiidi andi sinaakirnaheeb!>>
idi.
02 Uudehay Buulus Araami bhali bhaliiyee imaasiwnihoob,
diniyaaniit isnaakirna.
Malya Buulus,
03 <<Ani Yahuudiibu,
Kiiliikiyaay whaashiib tumadiina Tarsuuseeb faraayu.
Laakiin Alguduseeb hamaayu.
Ani Gamaal'eeli whii agriiyan,
yhoobeeteen t'aada aree kasteeh agriiyan.
Oon bareetookna amsi,
ani han Ukwaasana asnaakiireet toona winneet ihiriw.
04 Ani kassooh oodehay W'ankwana aamaniib gwirhaab kehii ad'i,
galib adaar,
daabwa m'atwa warib han aree aabikaayt oosjin ad'i.
05 Ufagiiri uuwinwa,
kassaah umajlisi suurkinaawwa han beet toona ibadehana.
Baraah Yahuudi suurkina Dimashgeeb iifiinnee dehaay jawab han yhiinheeb.
Beentooy oodehay aabiktiit Algudus haay y'eetiit jasamiineet toona yhiriwna.
06 Yint gaat nabhoob,
ani Dimashig dawil mhiin aktim.
Tibreetee gaalhoob eera talaw kehi talawiya.
07 Ani whaashi kehii dhiban,
malya hiss aneeb raatiib amaasiw,
<Shaawil,
Shaawil,
naanhooy amaag tiwariyaheeb?>
idi.
08 Ani aree <Baruuk aabwa?>
adi.
Baruuh aree <Ani Yasuu'a Annaasiraayu!
Ubaruuk amaag tiwariyeebu.>
idiheeb.
09 Aanda geebu iibaabiin utalaw rhiyaan,
laakiin whiss aneeb infirid maasiwaab kiikeen.
10 Ani raatan,
<W'ankwanaay,
naan sakani?>
adi.
Baruuh aree <Yakaat Dimashig bayaa!
Beentooy kantiimihoob,
naan saki tindiyeeb kastooh soomami tindiya.>
idiheeb.
11 Utalaw winneet eeraabuuyt irhiti adgiraab kaaki.
Aanda aaraw w'ayi y'abikniit Dimashig ookiik salooliyaanheeb.
12 Beet tumadiinaatiib Hanaaniya iidni tak iifi.
Baruuh Muusaay whaggii aamani taku.
Kassaah Iyahuudi beentooy ikwiir aree winneet barooh hamooysiin.
13 Baruuh aneeb beeti eeyaayt,
<Shaawil usanuun,
oont'a shaawti masi rhi tindiya!>
idiheeb.
Gaalhoob aree rhan.
14 Malya Hanaaniya sooyiheeb,
<Ukwaasana hoobaan suur y'ibidneeb whankaay waasiya hook,
t'eeteeh sookintook harriiw.
Ooshiboob Oongaal rhistiyook harriiw,
whissooh teemsiiweet toona iseharriiw hook.
15 Toona turhitaneetwa tutimaasiweetwa kassooh oodehayi suurii bariiyooh baadehi tikatiya.
16 Baruuk oont'a naan hangiita?
Yakaa!
Atoomaasa!
Bariiyooh oosim waliikaa,
idinuubeek shaagwidha.>
idiheeb.
17 Beenaay har'ii,
ani Algudus beeti agar.
Ani oodiini gawiib siileelee han'aariib atoogaad aree hawsooyan.
18 Tehawsooteeb W'ankwana dehu lawiya,
<Willa Algudusee giigaa!
Aniib tindiyeeb ibhali uudehay sinaakir hook kiidiin.>
idiheeb.
19 Ani han <W'ankwanaay,
ani gwida diini gawaayeeb oodehay barook aamaniin thaab'aabwa haakwiraabwa akatiyeet toona baraah ikteenna.
20 Istifaanuus bariiyeek ibhaliiyi sabbii itoodaar,
ani oodoor beeb beentooy ingid imadar d'am hooy miraa iifi.
Barooh idir eenda halaaka han agw'ad.>
adi.
21 Laakiin W'ankwana <Giigaa!
Sagi mhiin Ijintiili haash istuub hook andi.>
idiheeb.>>
idi Buulus.
22 Uudehay Buulus een ibhali idiyeeb ookiik isnaakirna.
Malya waliikiyaan,
<<Oon ootak diraa!
Midhhan ka'astehaliya.>>
idiin.
23 Baraah masi waliikiyaan,
yhalaakaayeehna ilwiiniit falfuut asti geediyaan.
Buuluswa Iroomaani dheeshi daabitwa
24 Iroomaani dheeshi daabit Buulus um'askar istoobiineet toona ikajareeh sooya.
Kwirbaajii imeethib'eet toonaawwa raatamamiiniyeet toonaawwa ikajar sooya.
Baruuh bak haay iid'eeb usabab aree uun uudehay Buulusiib naanhooy waliikiineeb kanaant yhariw.
25 Ikajar Buulus jasaatii deha y'ayi yhaakwirnihoob,
baruuh beentooy ingid dheeshi suurkina raatiya,
<<Tak Roomaaniib gwabab anu,
tumhakama na baasitoob jasaamiiniyeet tuuna gaanuunu?>>
idi.
26 Udheeshi suurkina een ibhali imaasiwihoob,
udheeshi daabit ibaayt,
<<Naan daatniya?
Uun uutak Roomaaniibu!>>
idi.
27 Udheeshi daabit Buulusii dehaay eeyaayt,
<<Sooyaaheeb,
baruuk Roomaaniibwa?>>
idi.
Buulus han <<Awooh>> idi.
28 Udheeshi daabit <<Ani Roomaaniib iiktiyi jillaay gwida mhallaga fir'aabu.>>
idi.
Buulus laakiin <<Ani timifraytii Roomaaniibi.>>
idi.
29 Aanda Buulus raatamiin willa hooy giigiyaan.
Udheeshi daabit han tak Roomaaniib shinshilaatee sehaakwiraab iiktiyeet toona ikanihoob,
winneet irkwi.
30 Tooyin tooraaw udheeshi daabit aan Iyahuudi eegrima Buulus naan hooy yhiriwneeb iktiineet yhariw.
Malya Buulusii tishinshila fadagiya,
ifagiiriya iwawinwa kassuuh umajliswa immarriineet toona sooya.
Malya Buulus haay eeyaayt,
bareeyooh suurii isingad.