Buulus Algudus ibi
21
01 Bareesooh oogiig ribee nimshamaadhiit har'ii,
markabtii Koos nibi.
Tooyin tooraaw Roodees niktim,
beentooysii aree ubharii Baataraab nibi.
02 Fiiniigiyaab tiibiit markabt nimriit kehii n'amaayt iibaabna.
03 Kubiroos rhinani mhiin niktimihoob,
utarhagwadii hasamnaayt Tiroos niktimeeb ookiik Suuriyaab nibi.
Beentooy tumarkab irabeeyooh tikwisti jillaay tiibi.
04 W'akwanaay aamanana nimriit bareeyooh geeb asaramaat yina nis'a.
Aashuuk Itageega bareeh sooyaaniit,
Buulus Algudus biibaayeet toona sooyaan.
05 Laakiin t'asaramaat yina ingadnihoob,
t'iibaabtoon nisoorarim.
Y'aamanana kassaahwa,
tim'ateesoohwa y'areesoohwa tumadiinaatii oobhari dar ookiik geeboon hiireeriyaan.
Beentooy iyami daraag nignafaayt siileelna.
06 Malya taktakee dehaay usalaamiib nimsiyoodaayiit,
hinin tumarkab n'am,
aree baraah igawaayeehna beeti y'agarna.
07 Tiroosee giignaayt Butoolaayis beeti oobharii giigna.
Beentooy y'aamanana shoobnaayt b'eeb geeb nhagit.
08 Tooyin tumalya yaknaayt,
Gaysariyaab niktim.
Fiilibus ubhaliiyanaay ugawiib amnaamna.
Baruuh eenda y'asarama ilinguumiya ishamneeb gaalu.
09 Baruuh fadhigt arit saardiyaat d'art baakayt iibri.
10 Hinin Gaysariyaay yinaat gat nis'a.
Beentooy Nabiib Agaabuus iidneeb Yahuudaay whaashii eeya.
11 Baruuh eeyaayt hoon,
Buulusiib whaba yakisiya.
Baruuh uukna y'ayeehwa iragadaayeehwa haay yhaakwir.
Malya <<Oon whabaay kina,
Alguduseeb Yahuudi suurkina bak yhiikwar iyadneet toona Aashuuk Itageega sooyeen.
Masi barooh Ijintiili nuuni iyadna.>>
idi.
12 Hinin eeen ibhali nimaasiwihoob,
hininwa y'aamanana beentooy iifiinwa Buulus Algudus biibaayeet toona hooy nhariw.
13 Laakiin Buulus <<Naanhooy waawteenaka oogin'u tikat'ana?
W'ankwana Yasuu'i jillaay oosjini shuumtii dehaay oobhaat amaar kaaki,
laakiin Alguduseeb bariiyooh jillaay tooyat dehaay amaaru!>>
idi.
14 Hinin bariiyooh w'aguur adgirat niribihoob,
tim nikaayt,
<<W'ankwana yharriiweet tuuna batiikti!>>
nidi.
15 Beenaay har'ii,
nimaraayt Algudus nibi.
16 Aamanana gali Gaysariyaay geeboon giigiyaaniit,
Minaasooniib oogaw haay ibeen hoon.
Baruuh Kubiroosaayiibu aree sh'iika iifi aamanana.
Bariiyooh geeb aamnaamna.
Buulus Algudus iktim
17 Algudus niktimihoob,
y'aamanana daayiib y'ashishna hoon.
18 Tooyin tooraaw Buuluswa hinin aarawwa Yaaguub niishbibi jillaay giigna.
Kassaah tikaniisaati eegrima han iifiin.
19 Buulus bareeh dabaay dalhasamiyaayt har'ii,
Ukwaasana bariiyooh geebii Ijintiili bitik ikwaaseet teena bareeh sooya.
20 Baraah beet toona imaasiwnihoob,
Ukwaasana yhamidna.
Malya baraah Buulusii dehaay,
<<W'araawuun,
naaka alfa Yahuudi aamananaab ikeeneet toona oont'a shibiba.
Kassaah aree Muusa Whag isnaakiirneet toona winneet yhariwna.
21 Laakiin baruuk Ijintiili bitik ikweer Iyahuudi kasseeh Muusaay Whag biisnaakiirneet toona soota diyee imaasiwna.
Baruuk bareeyooh dehaay,
<Y'areekna baashikwaashiibna,
Yahuudiit aada han baad'iina!>
tidiya diyee imaasiwna.
22 Udehayuun bariiyook w'aay maaswaaba.
Aflaay kak niwari hook?
23 Baruuk hinin niyadeet toona sakaa.
Fadhig da hineeb Ukwaasanaay deha waadiyaab abkaaba.
24 Bareeyooh geeb oodiini gaw shuumaa,
aree ateharama.
Aanda tehamtooteehna haay eeminneeb imhallaga dehaay kwisiya.
Shaawti uudehay kassuuh bariiyook maasiwaab iiktiineeb ibhali gwisir ikatiineet toona iikan iyadna.
Malya baruuk Muusaay Whag haay shagaamtiniyeet toona han iikan iyadna.
25 Suur door gaal Ijintiili aamanana hinin nhirweet id'aneet toona han sooyaaba.
Isanamaayee deha fir'aab ikatiineet toona biitamayneet deha sooyaaba.
Toosha uubooy kehii eefiyeet tari sikuutii aya reewiit sha biitamayneet toona han sooyaaba.
Masi biijakiinneet toona han sooyaaba.>>
idiin.
26 Tooyin tooraaw Buulus eenda ifadhig iyhaayt bareeyooh geeb ateharamiya.
Malya Buulus tutahaaraatiit t'asarama hooy tingideeb oomb'i iiktibi jillaaywa,
gaalka aree karaamaat iifir'ani jillaaywa,
oodiini gaw shuumiya.
27 Baliit t'asaramaat yina ingadnihoob,
Aasyaay y'aab Yahuudi gali Buulus oodiini gawiib rhiyaan.
Baraah kassooh oodehay isbibniit,
Buulus y'abikna.
28 Baraah han waliikiyaan,
<<Yaa Y'israa'iili,
aween hoon!
Uun uutak kasseeh yhasheeb indhiwaayeenwa,
Muusaay whagwa,
oon oodiini gawi kehiiwwa oodehay amaagna allamiini.
Ijintiili han haay eeyaayt oon oodiini gaw utageega najjasiya.>>
idiin.
29 Baraah suur Turoofiimuus W'afasoosaayi tumadiinaatiib Buulusi geeb rhaa iifiin akay,
Buulus barooh geebooh oodiini gawiib shuumsaab iiktiyeeb hiisiyaan.
30 Kastuuh tumadiina ribshaaytiib tiifi.
Uudehay han dhadhaabsamee eeyaaniit Buulus y'abikna.
Buulus y'abikniit oodiini gawii irfifni mhaliyaan.
Malya gaalhoob idheefa assamiyaan.
31 Uudehay Buulusi madar jarrabiyaan.
Kastuuh tumadiina Algudus ribshaaytiib daatanihoob,
Iroomaani dheeshi daabit yhabar imaasiw.
32 Baruuh willa shalik kajarwa daabtaabwa iyhaayt,
uudehay ammarariyaab iiktiyeeb oomhiin ookiik dhaabiya.
Uudehay udaabitwa ikajarwa rhiyaanihoob,
Buulusi ithib'i isingadna.
33 Udheeshi daabit eeyaayt barooh yhaakwir,
maloot shinshilaatee yhakwirneet toona ikajareeh sooya.
Malya Buulus aab iiktiyeebwa naan gwibbaab iiktiyeebwa kanaant yhariw.
34 Oodehayii gali naat hadiidiyaan,
aaraw aree weena hadiidiyaan.
Baraah laakiin winneet tageega hissaayee bhaliiyiin akay,
udaabit naat han hooy kanaab kiiki.
Malya Buulus um'askar haay eebiineet toona ikajar sooya.
35 Buulus iragadaayee hiireeree usillim iktimihoob,
uudehay winneet amaagkaab waliikiyaan.
Aflaay ikajar barooh ifiyakna.
36 Uudehay har'ii sakiin,
waliikiin <<Barooh dirnaa!>>
iidna.
Buulus oodehay infaraad
37 Ikajar Buulus um'askar shuumsiineeb oodoor,
baruuh udaabit raatiya,
<<Naat andi hooka?>>
idi.
Udheeshi daabit bariiyooh dehaay,
<<Baruuk Yoonaani ibhali tikteena?>>
idi.
38 Udheeshi daabit masi,
<<Baruuk Umasri fadhig alfa madooraab yakisiyaayt,
suur tusabbootiib ribshaayt ikwaas barook kittaa han?>>
idi.
39 Buulus <<Aneeb kaaki!
Ani Yahuudiib Kiiliikiyaayt toomadiina toowin Tarsuusi taku.
Anaahook oodehay bhaliisaaheeb.>>
idi.
40 Udheeshi daabit oodehay bhaliiamiyeet toona sooya.
Malya Buulus usillimi kehii ingadaayt w'ayooh y'as y'abik,
uudehay diniyaaneet tumasaafa,
Araami bhali bhaliiya.