Yaaguub y'areeh idehar
49
01 Yaaguub y'areeh hidda waliikiyaayt,
<<Kwilalnaheeb!
Har'ook y'eent tiyinaateeb naan dehookna iikti tindiyeeb sooyi hookna andi.
02 S'aanaat sinaakirna.
Yaaguubi ar,
Israa'iil baabookna sinaakirna!
03 Raa'oobiin baruuk usuurkinaawwa,
aniib umatuunwa,
y'akrireet alaama tikatiya,
hamooysama maalhiibwa.
04 Baruuk ukwaaniit tirgasa,
tutakatiyu geeb diwtaayt oon'aali neewista,
aflaay baruuk hamooysama mhiin ka'astehalta.
05 Shim'oonwa Laawiiwwa baraakna sanaabaana,
b'adhdhiisookna rookaat tikwasiina.
06 Umajlisookna shuumi kaadi,
umajlisookna han hadri kaadi.
Baraak hasyaaytiib sabab anu dehay tidaarna,
sabab anu yoob kayastaana.
07 Oont'a aniib w'aat kehookna eefi.
Baraak gadabteena hadaniyaatteena,
y'areekna iibrir andi,
Israa'iiliit tigabiilaati bitik iibrir andi.
08 Yahuuda,
barook isanaayaak yhimid hook iyadna,
suurook asjideena,
y'ashooyeek iigrib tindiya.
Baabiyaak y'ar dehook asjideena.
09 Yahuuda,
baruuk hadhaay kiluuswa,
w'ooruun,
tushookiitook diriit haay tit'agiira,
whadhaayt biruuraay imb'iini,
aaw ash'ariit barooh yaksiini?
10 Tehad'aayi Yahuudaab imshimidh kitdi.
Baruuk akrirwa hukwimwa iid'i tindiya.
Uudehay isnaakiir hook,
miyaaw haay y'een hook.
11 Baruuk whalkwiiyook daayi inabi hindiib hikwir tindiya.
Waasama inabiib hikwir tindiya,
imakwayeek oon whaay iishgwidh tindiya,
whalaakook aree w'inabi booyii iishgwid tindiya.
12 Igw'adaak whaayka hadalakaaba,
tikwileetaak tiy'aateeka eerakaata.
13 Sabaluun,
baruuk oobhari daraag kwarriya,
tikookanaytaak timaraakibti mingidi mhiin ikatiina,
yhiduudaak Saydaab ookiik itbariirna.
14 Yassaakir,
baruuk akra meekwa,
maloot noosaati bitik imb'iiniibwa.
15 Tifiinaniiti mhiin rhitiniyihoob dehook ishboobi,
whaash dehook ishboobi,
malya akra shaga daatiniya,
kishiyaab tikatiya.
Yharkaayi kehii rabeeb titfayiika.
16 Daan,
Israa'iileet tigabiila tirawteet,
udehayook kehii adil iid'i tindiya.
17 Baruuk usalali daraag eefi kwakwarwa,
usalali daraag eefi sammooma kwakwarwa,
whataayiit tookwilib fanniik ukwakwarwa.
Aflaay ootak w'amaab dhibsi tindiya.
18 Yaa W'ankwanaay,
ani bariiyook oomidhhan hangiit.
19 Jaad,
barook finaayana da iith'a hook iyadna.
Malya laakiin baruuk han naakibiit bareeh finaayi tindiya.
20 Ashiir,
barook tim'ariituuk winneet daayiiti.
Yhad'aayeet m'ari tikatiina isuumir tindiya.
21 Naftaali,
baruuk daawri malaali ganaaywa.
Nafir bhali hadiidtiniya.
22 Yuusif,
baruuk gwida firaay ibari inabwa,
w'inab iyami daraag yakiiniibwa.
Aafad teheeta rareeweeneeb whindiiwwa.
23 Y'ashooyaak hamiinaaytii eeth'ana hook,
rhamaat anu nashshaabtii winneet geedeen hook.
24 Laakiin akraa tingadiya,
bareeh willa geedtiniya.
Yaaguubiib Ukwaasana iishtam hook indi.
Ukwaasana W'akra ushakwa ittiyoodiib,
Israa'iileeb uliilaaw w'akraabi.
25 Baabiyuuk Ukwaasana eeshtiim hook,
Ukwaasana W'akra mhakwaliisii tibireeteet barakaatee baarakiini hook,
whiisii iyami thawaayee baarakiini hook.
Oonigwwa ooyaamwa dehook baarakiini.
26 W'ooru,
baabiyuuk idehara,
eerba tari ikambil y'atamnaayeeka hayiskaabu.
Yuusif,
baruuk isanaayeek suurkinaamtiniya,
uun idehara kantiimeetook toona aseharriiw.
27 Binyaamiin,
baruuk akra karaaywa,
fajir tishookiiteek tamtiniya,
himniit tiganiima andhiidha.>>
idi.
28 Taan bataah Israa'iileet tigabiila titamna maloota.
Whooba bateeh bak idehar.
Gabiilaatka idehara w'im'ariiwooh idehar.
Yaaguubiit tooyat
29 Yaaguub bareeyooh dehaay,
<<Ani shaawti willa ayaayi.
Hoobeeyi bitik Eefrooneeb w'amar Yhiitaayeet tudir'aatiib eefeenaay bisnaheeb.
30 W'amar Maakfeelaay tudir'aatiib eefeeb,
Maamari daraag Kan'aaneeb eefeeb,
oon barooh Ibraahiim Eefroon Whiitaayii dilba ahaabu,
miimashaayi mhiin aree iikti.
31 Beentooy Ibraahiimwa tutakatuuh Saaraabwa atoobsaaba.
Isehaagwa tutakatuuh Ribeekaabwa hooy atoobsaaba.
Beentooy aree ani Leeyahaab hooy abis.
32 Been w'amarwa tudir'aawwa Ibraahiim Yhiitaayee dilba ahaabu.>>
idi.
33 Yaaguub ibhaliiyeeh faayisiyanihoob,
iragadaayeeh oon'aali kehii ifaadhidh,
shaawti iya.
Yhoobaayi geeb aree itoobaas.