Haajirwa Ismaa'iilwa
16
01 Beenhoob Saaraay Abraamii dehaay ar firaat kitti.
Laakiin kishiyaat Masriit Haajir iidneet tiibri.
02 Oon usabbii,
Saaraay Abraamii dehaay,
<<Ukwaasana ufiraayii y'abikeheeb.
Baruuk difaa,
beet tukishiyaati geeb diwaa.
Batuuh oor farriyeek ani oor iikati indi.>>
tidi.
Abraam Saaraay tidiyeet toona gabbalamiya.
03 Abraam tamin hawla Kan'aaneeb id'iyi har'ii,
Saaraay tutakatuuh tukishiyaatooh Tumasri Haajir,
takatooh iikwsiyee dehaay barooh tehii.
04 Abraam Haajiri geeb diwiya,
malya batuuh tinkwi.
Haajir nakwalaayt tiiktiyeet toona tikanihoob,
t'ankwanaatooh Saaraay abaabta aree tirib.
05 Malyaab Saaraay Abraamii dehaay,
<<Tuun tutakat anii kehii dan'iyeet toona baruuk har'ii teefiya.
Tukishiyaatu bariiyook whii ad'i.
Oont'a batuuh nakwalaayt tikatiyeet toona tikanihoob,
aneeb abaabtini.
W'ankwana aneebwa barookwa bayhikim hoon.>>
tidi.
06 Abraam <<Tukishiyaatuuk w'ayyook teefi.
Hanyiis tindiyeet toona geeb d'iyi.>>
idi.
Malya Saaraay Haajir amaag waraab hooy tid'ihoob,
batuuh hooy dhaabtaay tiyha.
07 Shuur ookiik iibi salaliib,
Haajir yami thaw iifiyi mhiin tisabbootiib tingadaayt fiinti.
Batuuh beentooy haayee Ukwaasanaay malaktaayi dehaay eeya.
08 Umalak batiiyooh dehaay,
<<Haajir,
Saaraayt tukishiya,
naamhiinii eetaayi,
naamhiin aree teebii?>>
idi.
Batuuh <<Ani t'ankwanaatu Saaraay afoor.>>
tidi.
09 Umalak batiiyooh dehaay,
<<T'ankwanaatiyook deha agarii ugarooyook batiiyooh whii daasii!>>
idi.
10 Umalak masi <<Ani y'areek gwidaab iikwasi andi.
Bareeh gaal biidhagwiyeeb iikwasi andi.>>
idi.
11 W'ankwanaay umalaktaayi masi t'a han batiiyooh dehaay,
<<Batuuk oont'a nikwaatuwii
oor ifaar tindii.
Barooh Ismaa'iil iisim tindii.
W'ankwana igwirhaayeek imaasiw.
12 W'ooruuk laakiin y'ayaydeesooh sigiit fidnaab ikwaar indi.
Umalaali meekiit ikeebka imdiir indi,
uudehay han barooh imdiir iyadna.>>
idi.
13 W'ankwana ubatooh infaraad,
oon oosim barooh tehii,
<<Baruuk Ukwaasana aneeb rhiiniibwa.
Been aneeb rhiiniib,
sidik oont'a barooh rhani.>>
tidi.
14 Toon toonaatii dehaay toori Beer Laahaay Rooy titoosiim.