W'ankwana Abraami geeb galad id'i
15
01 Toon toonaati har'ii,
W'ankwana Abraamii dehaay hawsooteeb eeyaayt:
<<Abraam baarikwiya!
Ani geebook eefee,
w'ijiruuk aree win iikati indi.>>
idi.
02 Laakiin Abraam <<W'ankwana W'alya,
ani oor kwasaamanaab han anu amhiyeek baruuk naan iyaawheeb tindiya?
Al'asaar Udiimashgi kassooh oomraayu kwasaami indi.>>
idi.
03 Masi Abraam <<Baruuk aneeb ar han hiyaayi kitta,
malya ukishiyaayu indhiwaay abariyeeb kwasaamheeb indi.>>
idi.
04 W'ankwana aree bariiyooh dehaay,
<<Uun uutak kwasaami hook kiidi,
abiiyeek farriyeeb w'oor kwasaami hook indi.>>
idi.
05 Malya W'ankwana Abraam haay nageemiyaayt,
<<Teebri asa shibiba,
adgirtiniyeek baliin yhayikw dhigwiya!
Een bareeh t'iiteeb y'araak iikatiin iyadna.>>
idi.
06 Abraam W'ankwana aamaniya.
Ukwaasana han toon toona tushbootiit dehaay iyhi.
07 Malya baruuh Abraamii dehaay,
<<Ani W'ankwana.
Barook oon whaash iyaaw hook miyaadiib Uur Ikaldaani haashii haay y'an hooka.>>
idi.
08 Laakiin Abraam <<W'ankwanaay,
uun whaash aniib iikati indiyeet toona kak akteen?>>
idi.
09 Malya W'ankwana bariiyooh dehaay,
<<Anii deha lagaabwa,
n'aaytwa,
arginwa gaalka mhay hawlaab ibariin haay m'aa!
Masi hamaamwa adhamiit kwibheeriiwwa haay m'aa!>>
idi.
10 Abraam kasseeh een dehaay haay eeya.
Gaalka malu mhiin ikit'a,
gaal tarabka itarab eeraw ishoodh'aka suurii daasiya,
teekilay nuun.
Teekilay kat'aab kiiki.
11 Malya aakilay ooreew w'ayaanaay kehii kwimiyaan.
Abraam een eekilay giigsiya.
12 Tuuyin dhibtanihoob Abraam akraat n'ariitiib daaya,
winneet hadal thibin kehii idbal.
13 Malyaab W'ankwana bariiyooh deha,
<<Baruuk ibakii kanaa!
Y'araak weer haashiib girbaab iikati iyadna,
masi fadhig shi hawla kishiyaab iiktiin iyadna,
amaag itweerna iyadna.
14 Laakiin ani bareeh kishiyaab ikwasiin oodehay amaag jasaayi andi.
Malyaab har'ii baraah been whaash rayiimaa hooy giigi iyadna.
15 Baruuk asgaa iiyyi tindiya,
eegrimamiit iiyyi tindiya aree ituubis tindiya.
16 Ootaas ufadhigaay y'araak tooy kirafa y'aa iyadna.
Y'ammooraayeet tuumaag masi oomooy katimt kitti.>>
idi.
17 Tuuyin dhibtaayt whaash thibnamiyanihoob,
kwaraartiit w'aatwa hindiib balooliinwa lawiyaan.
Malya tooshaati tarabi bitkeesii hasamiyaan.
18 Beet tooyin W'ankwana Abraami geeb galad id'iit,
<<Y'areeyeek ar oon whaash aniiw,
Masreeb oobharii Furaat ookiik aniiw.
19 Igiinaayi haashwa,
Iganasaayi haashwa,
Igaadmoonaayi haashwa,
20 Yhittaayi haashwa,
Ifarasaayi haashwa,
Irafaa'iimi haashwa,
21 Y'ammooraayi haashwa,
Ikan'aani haashwa,
Ijiirjaashaayi haashwa,
Iyabuusaayi haashwa,
een bareeh kasseeh aniiw.>>
idi.