Abraamwa Luutwa imshammaadhna
13
01 Abraam Masree tutakatoohwa oomraayoohwa iiyhaayt Oos'iid beeti giigiya.
Luut han barooh iram.
02 Abraam dim'araabwa ashteetwa reewwa winneet gabiya.
03 Baruuh oos'iidii Beet Eel iktimeeb ookiik,
mhiin mhiiniika babeeriya.
Whaash suur ugawooh hooy d'iraab iiktiyeeb Beet Eelwa Aaywa eebtik iifiinaay dehaay eeya.
04 Been oomhiin baruuh awwal W'ankwanaay deha karaamaati mhiin hooy d'iraab iiktiyeebu.
jillaay d'iraab iiktiyeeb eeya.
Beentooy Abraam W'ankwana y'abid.
05 Luut Abraami geeb iibaabiya.
Baruuh han anootwa,
yaatwa,
sh'aabwa gawaabwa iibri.
06 Laakiin ureewuuhna gwidaabuuyt,
uusyaam bareeh mhat irib.
Hiddaab ookwiraay adgiraab kiikeen.
07 Abraamiib ishakwaawwa Luutiib ishakwaawwa imhassaayna.
Beentooy Ikan'aaniiwwa Ifarasiiwwa han beenhoob whaashiib ikwiirna.
08 Abraam Luutii dehaay,
<<Hinin ayaydaaba bin'amhassaayu,
ishakwaayaan han bii'amdeeraraayna,
kassaan sanaaba.
09 Kassuuh whaash suurook kiihaay han?
Aflaay hinin nimshimmidh.
Baruuk umaygwad tiniineek,
ani utarhagwad iyaay andi.
Baruuk utarhagwad tiniineek,
ani umaygwad iyaay andi.>>
idi.
10 Luut asa whaash ishbibi oodoor kassuuh w'atmuur W'uurduni bhari bireeya rhiya.
Kassuuh usalal Suuhar marii iifiib W'ankwanaayt tudir'aatiitwa,
Masreeb whaashiitwa sootaay akay iifi.
Beet tuuna W'ankwana timadiina Sadoomwa Gamooraabwa kwidhsaab baakaay tiikti.
11 Luut kassooh W'uurduni haashi atmuur igarooyooh deha yhayid.
Malya baruuh oomhi beeti yakiya.
Shaawti aanda imalu gaalka jhatii yakiyaan.
12 Abraam Kan'aaneeb whaashiib ikwiri.
Luut aree w'atmuuriit timadiina dawil mhiin igawaayeeh iid'ir.
Been uumhiin Sadoom dawil haashi.
13 Sadoomeeb uudehay imagna.
W'ankwanaay kehii akra danib ikwaasna.
14 Luut giigiyana har'ii,
Ukwaasana Abraamii dehaay,
<<Baruuk oomhiin hooy teefiyeeb asa nakama,
kasteeh teejha shibiba.
15 Kassooh whaash irhitniyeeb,
ani barookwa y'areekwa iyaaw hookna andi.
Uun diimaab bariiyook haash iikti indi.
16 Oofraayook w'issi t'iiteena gwidaab iikwasi andi.
W'issi gaal han dhangwii?
W'issi itdhagwgwiyeek,
y'araak han itdhagwgwiin.
17 Giigaa!
Barook hiiyyaabu kasteeh tijhaatee whaashi kehii hiirareeraa!>>
idi.
18 Aflaay Abraam tikheemaatee beersiya.
Habaruuneeb iifiin Maamreeb yhindi itageegaani daraag tikheemaatee y'aatim.
Beentooy baruuh W'ankwanaay deha karaamaati mhiin id'i.