Ukwaasana Abraam waliikiya
12
01 W'ankwana Abraamii dehaay,
<<Whaashookwa,
udehayookwa,
baabiyeek dhiwaawwa ishaat,
ani mityaayi andiyook whaash bayaa!
02 Winneet win dehay iikwasi hook andi,
baaraki hook andi,
oosmook tageegsi andi,
malya gwidaat baraka iikti tindiya.
03 Barook indehiir oodehay kassooh ani baaraki andi,
barook in'iit oodehay han ani ii'at andi.
Kassuuh uudehay toobuutiib eefeen bariisook adehiraab iiktiin eeyadna.>>
idi.
04 Aflaay Abraam W'ankwana sooyaneet toonaatiit giigiya.
Luut aree bariiyooh geeb giigiya.
Abraam asarama tamuunwa ay hawlaab iiktiyihoob,
Haaraanee giigiya.
05 Baruuh tutakatooh Saaraaywa,
usaniyooh w'oor Luutwa,
kassooh irabi w'iibriineebwa,
kassooh oodehay Haaraaneeb imriineebwa,
Kan'aaneeb whaash ookiik giigiyaan.
Beentooy aree iktimna.
06 Abraam Shakiimeeb iifiib whindi oowwin Moorah ookiik kassooh whaashiib sakiya.
Beenhoob Ikan'aani whaashiib ikwiirna.
07 W'ankwana Abraamii dehaay lawiya,
<<Bariiyook oofiraay oon whaash iyaaw andi.>>
idi.
Aflaay bariiyooh dehaay lawiyaab W'ankwana karaamaati mhiin dehaay id'ir.
08 Beentooysii giigiya.
Beet Eeli oomhii dehaay iifiin eerba marii idif.
Beet Eeli yiindhibiib,
Aay ittiyoodi mhiin ugawooh id'ir.
Beentooy W'ankwanaay dehaay karaamaati mhiin id'ir.
Aree been oomhiin W'ankwana y'abid.
09 Malyaab Abraam oos'iid ookiik beeriya.
Abraam Masireeb
10 Oont'a whaash hargwiit hooy daata.
Abraam beentooy tehargwi hassiyeet areeya akay Masir ookiik hoogiya.
11 Masri shuumti idawilhoob,
Saaraay tutakatiyooh dehaay,
<<Batuuk daawriit tikatiyeet toona akteen!
12 Imasri batook rheenhoob,
<Tuun batuuh takattoostu.>
iyaad iyadna.
Malyaab aneeb idaarheeb iyadna,
batook laakiin dhhanii in'iishna hooki.
13 Batuuk <Oon barooh ani kwaatooh akati!>
dii!
Baraah aneeb batiiyook sabbii daayiib hoosu sakeen.
Idaarheeb han kiidiin.>>
idi.
14 Abraam Masir eeyani door,
Imasri tutakat winneet daawriit akay rhiyaan.
15 Masreeb whad'a Far'uuni daabta batooh rhiyaanihoob,
batooh whad'aay suurii yhamidna aree whad'aay gaw istoobna.
16 Whad'a batiiyooh jillaay Abraam daayiib iweer.
Abraam anootwa,
sh'aabwa,
mak kwaabwa rabaabwa,
kishiyaabwa,
kishiyaatwa,
kamitwa rayiimiya.
17 Laakiin W'ankwana Abraamiit tutakat Saaraayi sabbii,
whad'aawwa indhiwaayeehwa kehii akraat lhanaayt ifdig id'i.
18 Shaawti whad'a Far'uun Abraam waliiksiya,
<<Baruuk aneeb naan hoosu tid'iya?
Tuun batuuh takatook tiiktiyeet toona naanhooy sooyaayi kitta?
19 Naanhooy <Batuuh kwaatootu> tidiya.
Een tidiyeek ani takati akwaas nuun bak kaaweer.
Oont'a laakiin tutakatuuk tuun tikati haay giigaa!>>
idi.
20 Malya Far'uun <<Abraam oomraayoohwa tutakatoohwa hiinaat giigsaana!>>
idiit ikajareeh sooya.