Balɨ́ágǎ Dhipóbho Dhɛ́pɛpɛ́ ndɨ́ka Azapana
4
Mámʉsá nzɨka Azapana, na mámʉsá nzike Kílísitó Yezu, ɨ́yɔ atɨ́nǎká u'bhélé kɛ́-gʉlʉ́ yó bhombi-mbá bha bha'wɨ̌sɨ na-mbá bhésíi-ndɛ́mʉ, na kɨ́sɨkɛ́ sɨbhʉ́ndá dhɛ́ dhɨsá-ndɨ́nɨkɛnɔwɔ́ ndyasɨ, na dhé dhikúmú ndyasɨ, nàkákʉ̀bala u'bhélé-mbʉ no'sisó bhɔ̂: 2 balɨ́ágǎ Dhipóbho ndɨ́ka Azapana, ké bhɔ́bhɛ́lɛ́ kɛ́ nɛdhɛ̀ngɛ-yɔ a wanzá, tɛndɛ́ kɛ́ nɛdhɛ̀ngɛ-yɔ ásɨ́ wanzá. Mɛnɨ́ɛ́, gbɔ̌mɨ́ɔ́gɔ̌, bhʉ́wá bhombi matʉ́wa na mʉ̌ma-nda u'bhomu palěmotí nɛ dhɨ́pànʉ. 3 Képosa adhalǎká nɛdhɛ̀ngɛ-yɔ bhombi bhásɨ́ká matá vekese mʉ̌ma kɔ́kɔnɨɔ dhɨ́panʉ dháyǎngu, píi kɛ́bhɛ̀lɨɛgɛ afěfé wa kʉmɨlɨ́ma kʉ́kɔ́wɔ mombólóbhi, bhakábhǎká kéke na bhamalimo bhenéni, képosa bha no motói-mbá akázʉ̌kʉza kɔ́kɔ mopóbho-mbá bhakʉ́nda. 4 Bhadhakǎká motói mbɔ́kɔ́wɔ bhɔ́ bhǎkɔnɨ́ mopóbho má yǎngu, na bhangíkeněká ké kugyěgyení kwá'tʉ́tʉ. 5 Píi ɨwʉ, wakení na nalɨ́lɔ ké kímbó, vekésé mʉ̌ma kɨ́sɨká magali, zǎ kʉtɨ́ká ɨ́kʉka abalɨagǎ we Dhipóbho Dhɛ́pɛpɛ́, télélísé kʉtɨ́ká kwákʉ́ kubhomu.6 Képosa ɨmɨ gěgenzí nà matá kásʉwa ubhomu mbʉ́kamɨ átʉkʉ́ u'súkú ɨgʉlʉ́ yɛ́ dhɨngɔsɔ-ndɨ́ bhawága-ndɛ́ kʉ́ka Azapana, nɛ́dhɛngɛ kámɨ wakanɔwɔ́ kó nokúnzi etélélító. 7 Nòkwónìga ʉ'kandʉ́ wɛ́pɛpɛ́, nèpipító dhɨzɨnda ndɨ́kamɨ, nòbhólòliga ʉbhɨ́sɨa mbʉ́kamɨ wánza. 8 Gěgenzí Azapana enibǐsíító gbǒndóló, ɨ́yɔ amʉ́ uyǎngua ɨ́mbʉ Ngámá, Zǒzi wa uyǎngu anʉwábhá kɛ́ dhɨsá-ndɨtɨ́nɔwɔ́ u'bhélé kɛ́-gʉlʉ́ yó nokúnzi. Ásɨ́bhánʉwá ɨmɨ gbǎgbǎ, píi no bhombi bhobhomu-mbá bhakákʉ́nda bhɔ́ Ngámá ɛ́nɨ́kɛ́nɨ́.
Mopóbho-mbá Pɔlɔ aká'tɨ́kɨa Timotei bhɔ́ á'zɨ̌ɨ́
9 Zǎ ʉkpɛ́ kódiko nɨtákana gagala. 10 Képosa Dɛ̌ma énìbiitágě-nìbie, kákʉ́nda ɨzɛzɛ yé gěgenzí yó nokúnzi-nzɔ, éndi-tága kɔ́ gbɔ̌tɔ́ we Tesalonika. Klɛskɛ* éndìga ká dhʉdhʉ́ yá Galatia, no Tito éndìga ká dhʉdhʉ́ yá Dalamatia, 11 Luka gbǎgbǎ hɨ̌yɔ a palěmotí nɛmɨ. Ʉ'vǎ Malɨkɔ dikó nayɨ́, képosa a kʉ́kamɨ wɛtɛ́lɛlɛ ká kʉtɨ́ká. 12 Nò'tíkìga Tikiko* kɔ́ gbɔ̌tɔ́ wɛ Ɛfɛsɔ. 13 Kɛ́ nɛdhɛ̀ngɛ-yɔ wadikobhá-pɔ́wɔ, nìdikíó no kóti-yɔ ně'bii-ndɛ́ kɔ́ gbɔ̌tɔ wɔ Tɔlɔ́wa kʉ́ka Kálɨpɔ, kâ bhobhúku, vǎ-pɔ́ bhuí bhobhúku yá kʉsɨ́nzɨ́.
14 Alɛgzǎnda*, ɨ́yɔ a'túwo-ndɛ́ abʉgʉ̌lʉ́, ónìziiga mopóbho mówówo badi. Ngámá a'sisiebhá ngbangá na matandá mbasɨ. 15 Na-wʉ tàla ɨndá yánza kó mombi-yɔ, képosa ódhóngòsiga u'bhélé mbukosú wɛ́kpɛ́ badi.
16 Kɛ́ nɛdhɛ̀ngɛ-yɔ nòsómbí-pɔ́ mala yámámʉsá, ásɨ́ no mombi-yɔ odikí nɨtákaná, bhombi bhobhomu bhènibié-nìbie. Bhavanɨ́ dhikita kámá-ndyɛyɛ mámʉsá nzɨka Azapana. 17 Píi Ngámá omolí palěmotí nɛmɨ, na onuwú ʉkpɛ́ dhɨtɛ́dhɨ́ bhɔ́ ká-pɨ́ nzɨkámɨ ʉbalɨaga wé Dhipóbho ndyasɨ ɛ́tɛ́lɛ́lɨ́, no bhombi bhobhomu-mbá bhásɨ́ Bhayuda bhɔ́kɨ́. Nòmbológǐ kɨ́sɨkɔ́ nɔkʉ wé simba. 18 Ngámá animboisobhá kísikó mopóbho mobhomu mówówo, na anibhólolobhá ké dhikúmú ndyasɨ dhá tʉ́bǎ. Kʉ́kasɨ́ ékí dhɨ́bɨba kɛ́ bhɨzɛzɛ nɛ bhɨzɛzɛ. Oyí.
Ǔpènege wá bhalʉwa na salǎmʉ
19 Salǎmʉ nzíke Pilisila na Akilab, no bhombi bhá ndabhʉ nzíko Onesifolo*. 20 Ɛlastɔ* etígelí kɔ́ gbɔ̌tɔ́ wo Kolito, nè'bií Tolofimo* nɛ ngbɛmɨ kɔ́ gbɔ̌tɔ́ we Mileto. 21 Zǎ ʉkpɛ́ kódiko mámʉsá yɛ́ nɛ́dhɛngɛ wɔ bhɔdɨ̌-mbʉkpɔ́wɔ.
Eubǔlo* ókutísiiní salǎmʉ, kâ Pude*, ne Lino, no nómósú wo'kólúwo Kolodǐa, no bhonómósú bhobhomu.
22 Ngámá ékí palěmotí na mʉlʉ́ma mbwakʉ.
Ngasa nzɨ́ka Azapana ékí nebhónú.