8
Yĩreru nɔɔbɑ yiruse
1 Sɑnɑm mɛ Yɑ̃ɑ kinɛ kpɛm te, tɑ yĩreru nɔɔbɑ yiruse kusiɑ, mɑ yɑm mɑri Gusunɔ wɔllɔ nge nɔni kpɑkinu tɛnɑn sɑkɑ. 2 Yen biru nɑ wɔllun gɔrɑdobɑ nɔɔbɑ yiru wɑ be bɑ rɑ n yɔ̃ Gusunɔn wuswɑɑɔ. Bɑ bu kɔbi nɔɔbɑ yiru wɛ̃.
3 Yen biru wɔllun gɔrɑdo goo nɑ u yɔ̃rɑ yɑ̃ku yerun bɔkuɔ u wurɑn bweebu nɛni ge gɑ turɑre mɔ. Bɑ nùn turɑre wɛ̃ yɑ kpɑ̃ u kɑ ye nɑɑnɛ dokeobun kɑnɑnu mɛnnɑ yɑ̃ku yee wurɑgirun wɔllɔ te tɑ wɑ̃ɑ Gusunɔn sinɑ kitɑrun wuswɑɑɔ. 4 Turɑre yen wiisu seewɑ wɔllɔ Gusunɔn wuswɑɑɔ kɑ nɑɑnɛ dokeobun kɑnɑnu sɑnnu sɑɑ gɔrɑdo win nɔmɑn di. 5 Yerɑ gɔrɑdo wi, u turɑren bweebu ge suɑ u gu dɔ̃ɔ yibiɑ sɑɑ yɑ̃ku yeru min di, mɑ u gu kɔ̃ɔmɑ temɔ. Sɑnɑm mɛ sɔɔrɑ guru gbɑ̃sukunu nɑ kɑ wurenu kɑ guru mɑɑkinu kɑ mɑɑ tem yĩiribu.
Kɔbi
6 Yen biru wɔllun gɔrɑdobɑ nɔɔbɑ yiru be bɑ kɔbi nɔɔbɑ yiru ye nɛni, bɑ sɔɔru kuɑ bu kɑ yi so.
7 Gɔrɑdo gbiikoo u win kɔbɑ so. Yerɑ guru kpenu kɑ dɔ̃ɔ kɑ yɛm sɑnnu n burinɑ, mɑ yɑ nɛɛrɑ kɑ dɑm sɑɑ wɔllun di. Mɑ tem bɔnu itɑse yɑ dɔ̃ɔ mwɑɑrɑ kɑ dɑ̃ɑn bɔnu itɑse kɑ mɑɑ yɑkɑ bekusu kpuro.
8 Mɑ gɔrɑdo yiruse u win kɔbɑ so. Mɑ gɑ̃ɑ ni nu sɑ̃ɑre nge guu bɑkɑru te tɑ dɔ̃ɔ mwɑɑmɔ, bɑ nu kɑsɑ kuɑ nim wɔ̃ku sɔɔ. Nim wɔ̃kun bɔnu itɑse yɑ gɔsirɑ yɛm, 9 mɑ hunde konibɑ kpuro be bɑ wɑ̃ɑ nim wɔ̃ku sɔɔn bɔnu itɑse bɑ gu, goo nimkusu kpuron bɔnu itɑse yɑ mɑɑ kɑm kuɑ.
10 Yen biru, gɔrɑdo itɑse u win kɔbɑ so. Yerɑ kperi bɑkɑ gɑɑ ye yɑ dɔ̃ɔ yɑbure nge wii bɔndu, yɑ wɔrumɑ wɔllun di dɑru kokin bɔnu itɑse sɔɔ kɑ mɑɑ bwii sɔɔ. 11 Wee, kperɑ yen yĩsirɑ sosubu. Mɑ nim mɛn bɔnu itɑse sosiɑ mɑ tɔn dɑbirɑ gu ye bɑ nim mɛ nɔrɑ yèn sɔ̃ mu sosiɑ.
12 Yen biru gɔrɑdo nnɛse u win kɔbɑ so. Yerɑ sɔ̃ɔn bɔnu itɑse kɑ surun bɔnu itɑse kɑ kperin bɔnu itɑse tĩrɑ, mɑ sɔ̃ɔ sɔɔn bɔnu itɑsen yɑm bururɑm kun mɑɑ wɑ̃ɑ, mɛyɑ mɑɑ wɔ̃kurun bɔnu itɑsen yɑm bururɑm.
13 Nɑ kpɑm mɛɛrɑ mɑ nɑ gunɔ bɑkerun swĩi nuɑ tɑ yɔ̃ɔwɑ sere sere Gusunɔ wɔllɔ tɑ gbɑ̃rɑmɔ too too tɑ mɔ̀, wɑiyo, wɑiyo, ɑmɔnɑ hɑnduniɑgibun nɔni swɑ̃ɑrɑ koo nɛrɑ sɑnɑm mɛ gɔrɑdobɑ itɑ be bɑ tie bɑ koo ben kɔbi so.