2
Gɑri yi bɑ Efesugibu sɔ̃ɔwɑ
1 Kirisi u Yohɑnu sɔ̃ɔwɑ u nɛɛ, ɑ Efesun Yesun yigbɛrun gɔrɑdo yoruo ɑ nɛɛ, nɛ wi nɑ kperi nɔɔbɑ yiru ye nɛni nɛn nɔm geuɔ, mɑ nɑ sĩimɔ dɑbu wurɑginu nɔɔbɑ yiru yen suunu sɔɔ nɑ nɛɛ, 2 nɑ win kookoosu yɛ̃ kɑ win sɔmɑ kɑ win tɛmɑnɑ bi u mɔ. Nɑ yɛ̃ mɑ u ǹ kpɛ̃ u kɑ tɔn kɔ̃sobu tɛmɑnɑ, mɑ u ben lɑɑkɑri mɛɛrɑ be bɑ tii sokumɔ gɔrobu, ɑdɑmɑ bɑ ǹ sɑ̃ɑ mɛ, u deemɑ wee kowobɑ bɑ sɑ̃ɑ. 3 U suuru mɔ, u kɑ nɔni swɑ̃ɑru tɛmɑnɑ nɛn yĩsirun sɔ̃, u ǹ mɑɑ wɑsire. 4 Adɑmɑ ye nɑ nùn wɑɑsi wee, u ǹ mɑɑ mɑn kĩ nge yellu. 5 Ǹ n mɛn nɑ, u yɑɑyo mìn di u wɔrumɑ kpɑ u gɔ̃ru gɔsiɑ u ko nge mɛ u rɑ rɑɑ ko. Ù kun kue mɛ, kon nɑ n win dɑbu suɑ gen ɑyerun di. 6 Kɑ mɛ, u gɑ̃ɑ teenu mɔ ni nu wɑ̃. U Nikolɑitigibun kookoosu tusɑ nge mɛ nɛn tii nɑ su tusɑ.
7 Bɑɑwure wi u swɑɑ mɔ u nɔɔwɔ ye Hunde Dɛɛro u Yesun yigbɛnu sɔ̃ɔmɔ.
Wi u tɑbu di, kon de u dɑ̃ɑ wɑ̃ɑrugii te tɑ wɑ̃ɑ Gusunɔn wɑ̃ɑ yerɔn binu di.
Gɑri yi bɑ Simiinigibu sɔ̃ɔwɑ
8 Kirisi u mɑɑ nɛɛ, ɑ Simiinin Yesun yigbɛrun gɔrɑdo yoruo ɑ nɛɛ, nɛ wi nɑ sɑ̃ɑ gbiikoo kɑ dɑ̃ɑko, nɛ wi nɑ rɑɑ gu mɑ nɑ seewɑ nɑ wɑsi, nɑ nɛɛ, 9 nɑ win nɔni swɑ̃ɑru yɛ̃, nɑ mɑɑ win sɑ̃ɑru yɛ̃. Kɑ mɛ, u sɑ̃ɑ ɑtɑsiri. Nɑ yɛ̃ kɔ̃sɑ ye bɑ nùn gerusimɔ be bɑ tii sokumɔ Yuubɑ ɑdɑmɑ bɑ ǹ sɑ̃ɑ mɛ, Setɑm tɔmbɑ bɑ sɑ̃ɑ. 10 U ku bɛrum ko nɔni swɑ̃ɑ te tɑ nùn sisien sɔ̃. Wee, Setɑm u koo de bu ben gɑbu pirisɔm doke u kɑ ben lɑɑkɑri mɛɛri. Bɑ koo wɑhɑlɑ wɑ sere sɔ̃ɔ wɔkuru. U de u n sɑ̃ɑ bɔrɔkini sere kɑ gɔɔwɔ, kpɑ n nùn wɑ̃ɑru wɛ̃ nge sinɑ furɔ.
11 Bɑɑwure wi u swɑɑ mɔ u nɔɔwɔ ye Hunde Dɛɛro u Yesun yigbɛnu sɔ̃ɔmɔ.
Wi u tɑbu di, gɔɔ yiruse kun nùn wɑsi.
Gɑri
yi bɑ Pɛɛgɑmugibu sɔ̃ɔwɑ
12 Kirisi u mɑɑ nɛɛ, ɑ Pɛɛgɑmun Yesun yigbɛrun gɔrɑdo yoruo ɑ nɛɛ, nɛ wi nɑ tɑkobi nɔɔ durorɑ ye bɑ dɛ̃ɛrɑ biru kɑ wuswɑɑ nɛni nɑ nɛɛ, 13 nɑ win wɑ̃ɑ yeru yɛ̃ mi Setɑm sinɑ kpɑɑrɑ wɑ̃ɑ. U nɛn yĩsiru wure, u ǹ win nɑɑnɛ ye u mɑn sɑ̃ɑ fɛ̃re, bɑɑ sɑnɑm mɛ bɑ nɛn seedɑ dio nɑɑnɛgii Antipɑsi go ben mi, mi Setɑm wɑ̃ɑ yerɑ wɑ̃ɑ. 14 Adɑmɑ kɑ mɛ, gɑ̃ɑnu fiiko ni nɑ nùn wɑɑsi wee, gɑbɑ nùn wɑ̃ɑsi be bɑ Bɑlɑmun sɔ̃ɔsiru swĩi. Bɑlɑmu wi, u rɑ n Bɑlɑki sɔ̃ɔsimɔ nge mɛ u koo ko u kɑ Isirelibɑ torɑsiɑ, kpɑ bu bũu sɑ̃ɑ dĩɑnu di, kpɑ bu kɔ̃ɔ mɛnnɑ tɑntɑnɑru sɔɔ. 15 Nge mɛyɑ gɑbɑ nùn wɑ̃ɑsi be bɑ Nikolɑitigibun sɔ̃ɔsiru swĩi. 16 Ǹ n mɛn nɑ, u gɔ̃ru gɔsio. Ù kun kue mɛ, kon nùn nɑɑ swĩimɑ tɛ̃, kpɑ n kɑ bu tɑbu ko kɑ tɑkobi ye yɑ yɑrimɔ nɛn nɔɔn di.
17 Bɑɑwure wi u swɑɑ mɔ u nɔɔwɔ ye Hunde Dɛɛro u Yesun yigbɛnu sɔ̃ɔmɔ.
Wi u tɑbu di, wiyɑ kon mɑnnɑ ye yɑ beruɑ wɛ̃ u di. Kon nùn kpee kpikiru wɛ̃ tè sɔɔ bɑ yĩsi kpɑɑru yoruɑ te goo kun yɛ̃ mɑ n kun mɔ wi bɑ tu wɛ̃.
Gɑri yi bɑ Tiɑtirɑgibu sɔ̃ɔwɑ
18 Kirisi u mɑɑ nɛɛ, ɑ Tiɑtirɑn Yesun yigbɛrun gɔrɑdo yoruo ɑ nɛɛ, nɛ Gusunɔn Bii wìn nɔni sɑ̃ɑ nge dɔ̃ɔ yɑrɑ mɑ nɛn nɑɑsu bɑllimɔ nge sii gɑn te bɑ yɑniɑ bɑ teɑ, nɑ nɛɛ, 19 nɑ win kookoosu yɛ̃. Nɑ win kĩru yɛ̃, kɑ win bɔrɔkiniru, kɑ win tɔn geeru kɑ mɑɑ win tɛmɑnɑbu. Nɑ yɛ̃ mɑ win sɔm dɑ̃ɑkiru tɑ gbiikiru kere. 20 Adɑmɑ ye nɑ nùn wɑɑsi wee. Kurɔ wi bɑ mɔ̀ Yesɑbɛli wi u tii sokumɔ Gusunɔn sɔmɔ, u derɑ u nɛn sɔm kowobu swɑɑ nim wiɑ kɑ win sɔ̃ɔsiru bu kɑ kɔ̃ɔ mɛnnɑ tɑntɑnɑru sɔɔ kpɑ bu bũu sɑ̃ɑ dĩɑnu di. 21 Nɑ nùn ɑyeru wɛ̃ u kɑ gɔ̃ru gɔsiɑ ɑdɑmɑ u ǹ kĩ u win kom bɛrɛtɛkɛ deri. 22 Yen sɔ̃nɑ kon nùn kpĩ kɑ bɑrɑru kpɑ n be bɑ kɑ nùn sɑkɑrɑru kuɑ kpɛ̃ɛ nɔni swɑ̃ɑ bɑkɑru sɔɔ bɑ̀ kun gɔ̃ru gɔsie bɑ kom kɔ̃sum deri mɛ u bu sɔ̃ɔsi. 23 Yen biru kon win bibu go. Sɑɑ yerɑ Yesun yigbɛnu kpuro nu koo giɑ mɑ nɛnɑ nɑ tɔmbun bwisikunu kɑ ben gɔ̃rusu yɛ̃. Kon ben bɑɑwure kɔsie nge mɛ win kookoosu nɛ.
24 Adɑmɑ be bɑ tie Tiɑtirɑ sɔɔ, be bɑ ǹ sɔ̃ɔsi kɔ̃su ni swĩi, bɑ ǹ gie ye gɑbɑ sokumɔ Setɑm ɑsiri bɑkɑ, nɑ bu sɔ̃ɔmɔ, nɑ ǹ kon mɑɑ bu sɔmunu gɑnu sɔbi. 25 Adɑmɑ ye bɑ mɔ bu ye nɛnuɔ sim sim sere n kɑ tunumɑ. 26-27 Wi u tɑbu di mɑ u mɔ̀ ye nɑ kĩ sere kɑ nɔrɔ, wiyɑ kon yiiko ye wɛ̃ ye nɑ mwɑ nɛn Bɑɑbɑn min di. Kon nùn yiiko ye wɛ̃ bwesenu kpuron wɔllɔ u n bu kpɑre kɑ sii bokuru kpɑ u bu so u kɔsuku nge wekenu. 28 Nɑ kon mɑɑ nùn yɑm sɑ̃rerun kperɑ wɛ̃.
29 Bɑɑwure wi u swɑɑ mɔ u nɔɔwɔ ye Hunde Dɛɛro u Yesun yigbɛnu sɔ̃ɔmɔ.