5
Gusunɔn yɑ̃ɑ gɔ̃ɔn nɔɔribu
1 Yesun yigbɛ guro guro be bɑ wɑ̃ɑ bɛɛn suunu sɔɔ, berɑ nɑ kɑ yɑ̃. Nɛn tii nɑ sɑ̃ɑwɑ yigbɛ guro guro nge be, nɑ mɑɑ sɑ̃ɑ Kirisin nɔni swɑ̃ɑrun seedɑ dio mɑ nɑ bɔnu mɔ yiiko ye yɑ koo sɔ̃ɔsirɑ sɔɔ. 2 Nɑ bɛɛ kɑnɑmɔ, i Gusunɔn tɔn be bɑ wɑ̃ɑ bɛɛn suunu sɔɔ kpɑro kɑ kĩru nge mɛ Gusunɔ u kĩ, n ǹ mɔ kɑ tilɑsi ǹ kun mɛ kɔsiɑ bɑkɑrun sɔ̃, ɑdɑmɑ i tii wɛ̃ɛyɔ bɛɛn sɔmburu sɔɔ. 3 I ku bu dɑm dɔre be bɑ bɛɛ nɔmu sɔndiɑ i kɔ̃su, ɑdɑmɑ i bu kom gem sɔ̃ɔsio mɛ bɑ koo swĩi. 4 Mɑ sɑnɑm mɛ kpɑrobun wirugii koo kurɑmɑ, i ko ɑre yiikogii mwɑ yìn burɑm kun kpeemɔ.
5 Mɛyɑ mɑɑ, bɛɛ ɑluwɑɑsibɑ, i yigbɛ guro gurobu wiru kpĩiyɔ. Bɛɛ kpuro i tii kɑwɑbu sebuo nge yɑberu bɛɛn wɑ̃ɑsinɑɑ sɔɔ, domi Gusunɔn gɑri gerumɔ, <<Gusunɔ kun wɑ̃ɑ be bɑ tii suen biruɔ, ɑdɑmɑ u tii kɑwobu durom kuɑmmɛ.>> 6 Ǹ n mɛn nɑ, i tii kɑwo kpɑ i tii deri Gusunɔn nɔm dɑmguuɔ, kpɑ u bɛɛ suɑ wɔllɔ sɑɑ ye u yi yɑ̀ n turɑ. 7 I bɛɛn wɑhɑlɑ kpuro sɔbio win mi, u koo bɛɛ nɔɔri.
8 I seewo i yɔ̃rɑ kpɑ i n tii sɛ, domi Setɑm, bɛɛn yibɛrɛ u bɔsu u wuri mɔ̀ nge gbee sunɔ u kɑsu wi u koo go u tem. 9 I kɑ tii yinɔ win wuswɑɑɔ kɑ toro sindu nɑɑnɛ dokebun sɔ̃ kpɑ i n yɛ̃ mɑ nɔni swɑ̃ɑ tenin bweserɑ tɑ bɛɛgibu wɑ̃ɑsi be bɑ yɑrinɛ hɑnduniɑ sɔɔ. 10 Gusunɔ durom kpurogii, wi u bɛɛ sokɑ i n kɑ bɔnu mɔ win yiiko nɔru sɑri sɔɔ, bɛɛ kɑ Kirisin gbinnɑɑn sɑɑbu, wiyɑ u koo bɛɛ ko tɔn yebunu kpɑ u bɛɛ yɔ̃rɑsiɑ sim sim, kpɑ u bɛɛ dɑm kɛ̃, kpɑ u bɛɛ tɑ̃sisiɑ, sɑnɑm mɛ i nɔni swɑ̃ɑru wɑ sɑɑ fiiko sɔɔ i kpɑ. 11 Wiyɑ ko n bɑndu dii sere kɑ bɑɑdommɑɔ. Ami.
Tɔbiri dɑ̃ɑkibu
12 Kɑ Silɑsi, bɛsɛgii wi nɑ nɑɑnɛ sɑ̃ɑn somirɑ nɑ kɑ bɛɛ gɑri fiiko ye yoruɑ n kɑ bɛɛ dɑm kɛ̃ kpɑ n seedɑ di mɑ Gusunɔn durom mɛ̀ sɔɔ i yɔ̃ sim sim, mu sɑ̃ɑwɑ gem.
13 Yesun yigbɛ te tɑ wɑ̃ɑ Bɑbiloniɔ, te Gusunɔ u gɔsɑ nge bɛɛ, tɑ bɛɛ tɔburɑ, mɛyɑ mɑɑ Mɑɑku nɛn bii u bɛɛ tɔburɑ. 14 I tɔbirinɔ kɑ kĩru.
Kpɑ ɑlɑfiɑ yɑ n kɑ bɛɛ wɑ̃ɑ bɛɛ be i sɑ̃ɑ Kirisigibu._