3
Kurɔbu kɑ ben durɔbun
wɑ̃ɑsinɑɑ
1 Bɛɛ mɑɑ kurɔbu, i bɛɛn durɔbu wiru kpĩiyɔ, kpɑ bɑɑ ben gɑbu bɑ̀ kun Gusunɔn gɑri nɑɑnɛ doke, bɛɛn dɑɑ yu de bu nɑɑnɛ doke. N ǹ mɑɑ tilɑsi i gɑri gere, 2 domi bɑ koo wɑ mɑ bɛɛn wɑ̃ɑrɑ dɛɛre i mɑɑ tɔnun bɛɛrɛ yɛ̃. 3 I ku kɑsu i tii ko kurɔ burɑbu kɑ bɛɛn serin tɑrɑ, kɑ wurɑbɑ, kɑ yɑ̃ɑ burɑnu. 4 Adɑmɑ i de bɛɛn burɑru tɑ n sɑ̃ɑ sɔɔkiru te tɑ ǹ kpeemɔ, teyɑ dɑɑ duudwiɑ. Yeniwɑ gɑ̃ɑ bɛɛrɛginu Gusunɔn wuswɑɑɔ. 5 Nge mɛyɑ yellun tɔn kurɔ be bɑ Gusunɔ sɑ̃ɑmɔ mɑ bɑ nùn yĩiyɔ, bɑ rɑ rɑɑ tii sɔmɛ, mɑ bɑ ben durɔbu wiru kpĩiyɑ. 6 Mɛyɑ Sɑɑrɑɑ u kuɑ, u Aburɑhɑmu mɛm nɔɔwɑ sere u nùn sokɑ yinni. Tɛ̃, bɛɛ ì n geɑ mɔ̀ mɑ bɛrum kun bɛɛ mɔ̀, i sɑ̃ɑwɑ win bii tɔn kurɔbu.
7 Bɛɛ mɑɑ durɔbu, i n wɑ̃ɑsinɛ kɑ bɛɛn kurɔbu i n yɑɑye mɑ bɑ ǹ bɛɛ dɑm turɑ. I bu bɛɛrɛn kookoosu kuo, domi Gusunɔ u koo mɑɑ bu wɑ̃ɑru kɛ̃ kɑ bɛɛ sɑnnu. I n mɔ̀ mɛ kpɑ gɑ̃ɑnu gɑnu nu ku bɛɛn kɑnɑru gbɑrɑ.
Nɔni swɑ̃ɑru gem sɑɑbu
8 Ye kpuron biru i n bwisiku teenu kɑ kĩi teeru mɔ. I n kĩɑnɛ nge mɑɑbu kɑ wɔnɔbu. I n wɔnwɔndu mɔɔsinɛ kɑ tii kɑwɑbu. 9 I ku kɔ̃sɑ kɔsienɑ, i ku wɔnnɑ, ɑdɑmɑ i domɑru kuɑnɔ, domi Gusunɔ u bɛɛ sokɑwɑ i kɑ ko mɛ kpɑ i domɑru wɑ. 10 Nge mɛ Gusunɔn gɑri gerumɔ,
<<Wi u kĩ u wɑ̃ɑ geeru di,
kpɑ u n nuku dobu mɔ tɔ̃ru bɑɑtere,
u kɔ̃sɑn gerubu de kpɑ u win nɔɔ kpĩ kɑ weesu.
11 U de u kɔ̃sɑ suuri kpɑ u geɑ ko,
kpɑ u n ɑlɑfiɑ nɑɑ gire.
12 Domi gemgibɑ Yinni Gusunɔ u nɔni wɛ̃ɛ.
Mɑ u ben kɑnɑru swɑɑ dɑki.
Adɑmɑ u kɔ̃sɑn kowobu nɔni mɛnimɔ.>>
13 Wɑrɑ u koo bɛɛ nɔni sɔ̃ ì n hɑniɑ mɔ̀ i kɑ geɑ ko. 14 Bɑɑ ì n nɔni swɑ̃ɑru wɑ gem sɔ̃, doo nɔɔrugibɑ bɛɛ. I ku tɔmbun bɛrum ko, i ku mɑɑ wururɑ. 15 Adɑmɑ i de Kirisi u n sɑ̃ɑ Yinni bɛɛn gɔ̃ruɔ. I n sɔɔru sɑ̃ɑ i kɑ bu wisi be bɑ bɛɛ bɛɛn yĩiyɔbun ɑsɑnsi bikiɑmɔ. 16 Adɑmɑ i bu wisio tɛɛru kɑ bɛɛrɛ. I de bɛɛn gɔ̃ru gɑ n dɛɛre kpɑ be bɑ bɛɛn dɑɑ geɑ ye yɑ wee Kirisin min di kɔ̃sɑ gerusimɔ bu sekuru wɑ sɑnɑm mɛ bɑ bɛɛ nɔɔ mɑni. 17 Domi n sɑnɔ tɔnu u nɔni swɑ̃ɑru wɑ geɑn kobun sɔ̃, ǹ n sɑ̃ɑ Gusunɔn kĩru, n kere u tu wɑ kɔ̃sɑn kobun sɔ̃. 18 Nɔn teerɑ Kirisi u gu gem sɑrirugibun durum sɔ̃, wi, wi u sɑ̃ɑ gemgii, kpɑ u kɑ bɛɛ dɑ Gusunɔn mi. Bɑ nùn go, u guwɑ nge mɛ tɔmbɑ rɑ gbi, ɑdɑmɑ bɑ nùn seeyɑ kɑ Hunde Dɛɛron dɑm. 19 Kɑ Hunde win dɑmɑ u dɑ u gɔribu wɑɑsu kuɑ be bɑ nɛni gɔriɔ, 20 be bɑ ǹ dɑɑ Gusunɔ mɛm nɔɔwɛ sɑnɑm mɛ u tɛmɑnɛ sere Nɔwɛ u kɑ goo nimkuu dɑ̃kɑ u kpɑ. Goo nimkuu ge sɔɔ, tɔmbu fiikowɑ bɑ duɑ nge be nɔɔbɑ itɑ, mɑ bɑ fɑɑbɑ wɑ sɑɑ nim di. 21 Nim mɛ, mu rɑɑ sɑ̃ɑwɑ bɑtɛmun weenɑsiɑ ye yɑ bɛɛ fɑɑbɑ mɔ̀ tɛ̃. N ǹ mɔ yɑ wɑsin disinu wɔkɑmɔ, ɑdɑmɑ yɑ sɑ̃ɑwɑ seedɑ mɑ sɑ tii Gusunɔ wɛ̃ kɑ gɔ̃ru dɛɛrɔ Yesu Kirisin seebun sɔ̃, 22 wi u dɑ wɔllɔ mɑ u wɑ̃ɑ Gusunɔn nɔm geuɔ. Miyɑ Gusunɔn gɔrɑdobɑ kɑ wɔllun yiikogibu kɑ dɑmgibu bɑ nùn wiru kpĩiyɛ.