TIRE GBIIKII
TE PIƐƐ U YORUA
1
Tɔbiribu
1-2 Bɛɛ be Gusunɔ u gɔsɑ mɑ i yɑrinɑ i sɑ̃ɑ sɔbu Pontuɔ kɑ Gɑlɑtiɔ kɑ Kɑpɑdosiɔ kɑ Asiɔ kɑ Bitiniɔ, Gusunɔ Bɑɑbɑ u bɛɛ gɔsɑ nge mɛ u rɑɑ gɔ̃ru doke u ko. Mɑ i kuɑ wigibu win Hunden sɑɑbu, kpɑ i kɑ Yesu Kirisi mɛm nɔɔwɑ, kpɑ win yɛm mu bɛɛ dɛɛrɑsiɑ. Nɛ Piɛɛ, Yesu Kirisin gɔrowɑ, nɑ bɛɛ tire teni yoruɑmmɛ.
Durom kɑ ɑlɑfiɑ n bɛɛ sosiɑ.
Yĩiyɔ bi sɑ mɔ Yesu sɔɔ
3 Su Gusunɔ siɑrɑ, bɛsɛn Yinni Yesu Kirisin Bɑɑbɑ. Win wɔnwɔn bɑkɑru sɔɔrɑ u sun mɑrɑ nɔn mɛɛruse Yesu Kirisin seebu gɔrin din sɔ̃ kpɑ sɑ n kɑ yĩiyɔ wɑ̃ɑrugibu mɔ 4 kpɑ su kɑ tubi di ye Gusunɔ u wigibu yiiye. Tubi ye, yɑ ǹ sɑnkirɑmɔ, yɑ ǹ disinu mɔ̀, yen burɑm kun mɑɑ kpeemɔ. Yerɑ bɑ bɛɛ yiiye wɔllɔ, 5 bɛɛ be Gusunɔn dɑm mu kɔ̃su nɑɑnɛ dokebun sɑɑbu i kɑ fɑɑbɑ wɑ ye yɑ sɔɔru sɑ̃ɑ yu kɑ sɔ̃ɔsirɑ sɑnɑm dɑ̃ɑkim sɔɔ.
6 Yen sɔ̃nɑ i nuku doo bɑkɑbu mɔ, bɑɑ mɛ nuku sɑnkirɑnu nu kuɑ tilɑsi tɛ̃ sɑɑ fiiko sɔɔ, lɑɑkɑri mɛɛri bwese bwesekɑn sɔ̃. 7 Lɑɑkɑri mɛɛri bi, bu bɛɛn nɑɑnɛ dokebu wɛ̃ɛrimɔ. Nge mɛ bɑ rɑ wurɑ mɛɛri kɑ dɔ̃ɔ, bɑɑ mɛ yɑ koo kɑm ko, nge mɛyɑ bɑ bɛɛn nɑɑnɛ dokebu mɛɛrimɔ, bi bu wurɑ bɛɛrɛ kere gem gem, bu kɑ bin dɑm giɑ. Kpɑ i siɑrɑbu kɑ yiiko kɑ bɛɛrɛ wɑ sɑnɑm mɛ Kirisi koo kurɑmɑ. 8 I nùn kĩ bɑɑ mɛ i ǹ nùn wɑɑre. I nùn nɑɑnɛ doke bɑɑ mɛ i ǹ ginɑ nùn wɑ. Mɑ i nuku doo bɑkɑbu mɔ bi bu ǹ kɑ nɔɔ gerurɔ. 9 Domi i bɛɛn nɑɑnɛ dokebun ɑre wɑɑmɔ, yeyɑ bɛɛn hunden fɑɑbɑ.
10 Gusunɔn sɔmɔbu bɑ fɑɑbɑ yen gɑri mɛɛrɑ, bɑ yen sɑriɑ kɑsu, mɑ bɑ durom mɛn gɑri geruɑ mɛ Gusunɔ u bɛɛ yiiye. 11 Domi Kirisin hunde wi u wɑ̃ɑ be sɔɔ u bu sɔ̃ɔwɑ yellu mɑ Kirisi u koo nɔni swɑ̃ɑru wɑ, yen biru u koo mɑɑ yiiko wɑ. Mɑ bɑ hɑniɑ kuɑ bu kɑ giɑ sɑnɑm mɛrɑ̀ kɑ swɑɑ yerɑ̀ u kɑ yɑ̃. 12 Gusunɔ u win sɔmɔ be sɔ̃ɔsi mɑ gɑri yi u bu nɔmu sɔndiɑ, yi ǹ sɑ̃ɑ ben tiigii, mɑ n kun mɔ bɛɛgii. Tɛ̃ i gɑri yi nuɑ. Lɑbɑɑri geɑn wɑɑsu kowobɑ bɛɛ yi nɔɔsiɑ. Bɑ gɑri geruɑ kɑ Hunde Dɛɛron dɑm wi u nɑ wɔllun di. Mɑ Gusunɔn gɔrɑdobɑn tii bɑ kĩ bu gɑri yin sɑriɑ giɑ.
Tii nɛnubu dɛɛrɑru sɔɔ
13 Yen sɔ̃, i de i n tii sɛ. I ku dom yĩbiri, kpɑ i n durom mɛ yĩiyɔ kɑm kɑm mɛ bɑ koo bɛɛ wɛ̃ sɑnɑm mɛ Yesu Kirisi koo kurɑmɑ. 14 I koowo bii mɛm nɔwɔbu kpɑ i ku de bɛɛn wɑ̃ɑrun dɑɑ yu kɑ kɔdɛ mɛnnɑ ye i rɑɑ mɔ sɑnɑm mɛ i ǹ gɑ̃ɑnu yɛ̃. 15 Adɑmɑ i de i n dɛɛre bɛɛn sɑnu sɑnusu kpuro sɔɔ nge mɛ Gusunɔ wi u bɛɛ sokɑ u dɛɛre. 16 Mɛyɑ Gusunɔ u geruɑ win gɑri sɔɔ u nɛɛ, <<I n dɛɛre domi nɛn tii nɑ dɛɛre.>>
17 Bɛɛn kɑnɑru sɔɔ i Gusunɔ sokumɔ Bɑɑbɑ. Wee, wiyɑ u tɔmbu kpuro kɑ siri teebu sirimɔ nge mɛ bɑɑwure u kuɑ. Yen sɔ̃, sɑɑ ye yɑ bɛɛ tie hɑnduniɑ sɔɔ, i ye dio kɑ win nɑsiɑru. 18 Bɛɛn tii i yɛ̃ ye bɑ kɑ bɛɛ yɑkiɑ sɑɑ bɛɛn wɑ̃ɑ kɑmgirun di te i tubi di bɛɛn sikɑdobɑn min di. N ǹ mɔ kɑ gɑ̃ɑ ni nu koo sɑnkirɑ, nge sii geesu ǹ kun mɛ wurɑ. 19 Kɑ Kirisin yɛm bɛɛrɛgimɑ bɑ kɑ bɛɛ yɑkiɑ wi u kɑ yɑ̃ɑ kinɛ kpɛndu weenɛ te tɑ ǹ ɑlebu ǹ kun mɛ disinu gɑnu mɔ. 20 Gusunɔ u Kirisi wi gɔsɑ u yi bɑ sere hɑnduniɑ tɑkɑ kuɑ, mɑ u sɔ̃ɔsirɑ bɛɛn ɑrufɑɑnin sɔ̃ sɑnɑm dɑ̃ɑkim mɛni sɔɔ. 21 Sɑɑ win min diyɑ i Gusunɔ nɑɑnɛ doke wi u nùn seeyɑ gɔrin di mɑ u nùn yiiko wɛ̃. Nge mɛyɑ i bɛɛn nɑɑnɛ kɑ bɛɛn yĩiyɔbu doke Gusunɔ sɔɔ.
22 Tɛ̃ ye i tii sɑ̃rɑsiɑ sɑnɑm mɛ i gem mɛm nɔɔwɑ, mɑ i bɛɛn nɑɑnɛ dokeosibu kĩ murɑfitiru sɑriru sɔɔ, ǹ n mɛn nɑ, i n kĩɑnɛ gem gem kɑ bɛɛn gɔ̃ru kpuro. 23 Domi bɑ ǹ bɛɛ mɑrɑ nɔn mɛɛruse kɑ bwese te tɑ koo gbi. Bɑ bɛɛ mɑrɑwɑ kɑ bwese te tɑ ǹ gbimɔ te tɑ sɑ̃ɑ Gusunɔn gɑri yi yi wɑsi yi yi ku rɑ kpe. 24 Nge mɛ Gusunɔn gɑri gerumɔ,
<<Tɔmbu kpuro bɑ sɑ̃ɑwɑ nge yɑkɑsu.
Mɑ ben bɛɛrɛ kpuro sɑ̃ɑ nge sin wɛ̃su.
Yɑkɑsu rɑ gbere, kpɑ sin wɛ̃su dɛrurɑ.
25 Adɑmɑ Yinni Gusunɔn gɑri ko n wɑ̃ɑwɑ kɑ bɑɑdommɑ.>>
Gɑri yi, yi sɑ̃ɑwɑ Lɑbɑɑri geɑ ye bɑ bɛɛ wɑɑsu kuɑ.