5
Dukiɑgibun kirɔ
1 Tɛ̃ bɛɛ dukiɑgibu, i mɑn swɑɑ dɑkio. I swĩiyɔ kpɑ i n ɑrɑru mɔ̀ wɑhɑlɑ ye yɑ bɛɛ sisien sɔ̃. 2 Bɛɛn dukiɑ sɑnkirɑ, mɑ gɛmi bɛɛn yɑ̃nu di. 3 Bɛɛn wurɑ kɑ bɛɛn sii geesu wururɑ diirɑ. Wururɑ yerɑ yɑ koo bɛɛ ɑre kɔ̃suru diiyɑ, kpɑ yu bɛɛn wɑsin yɑɑ bɑɑsi di nge dɔ̃ɔ. I dukiɑ gurɑ i tɑɑsinɛ sɑnɑm dɑ̃ɑkim mɛni sɔɔ. 4 Wee, i ǹ sɔm kowobu ben gobi kɔsie be bɑ kɑ bɛɛ dĩɑnu gurɑ gberɔ, mɑ gobi yi, yi wuri mɔ̀. Dĩɑ guro ben wuri mɑɑ dumɔ wɔllu kɑ tem Yinnin swɑɑ sɔɔ. 5 I bɛɛn wɑ̃ɑru di hɑnduniɑ sɔɔ kɑ dukiɑ bɑkɑ kɑ yɛ̃ɛribu. I dimɔ i bɔriɑmɔ nge yɑ̃ɑ sɑkɑ yɑ̃ɑru. 6 I geegii tɑɑrɛ wɛ̃ i go, u ǹ mɑɑ kɑ bɛɛ gɑbirinɛ.
Tɛmɑnɑbu kɑ kɑnɑru
7 Yen sɔ̃, nɛgibu, i tɛmɑnɔ sere Yinni u kɑ wurɑmɑ. I mɛɛrio nge mɛ gbee wuko rɑ n suuru sɑ̃ɑ u n kɑ tem mɑrɑ mu nùn dĩɑ geenu mɑruɑ. U rɑ n guri gbiikii kɑ dɑ̃ɑki mɑrɑ. 8 Bɛɛn tii mɑɑ, i n suuru sɑ̃ɑ, i n yɔ̃ dim dim domi Yinnin nɑɑru tɑ turuku koomɑ.
9 Nɛgibu, i ku gɔburu wɑɑnɑ kpɑ bu ku rɑɑ bɛɛ tɑɑrɛ wɛ̃n sɔ̃. Wee siri kowo u yɔ̃ dii kɔnnɔwɔ. 10 Nɛgibu, i Gusunɔn sɔmɔbu yɑɑyo be bɑ gɑri geruɑ kɑ Yinnin yĩsiru. I ben suuru sɑɑrio ye bɑ kuɑ nɔni swɑ̃ɑru sɔɔ. 11 Wee, sɑ bu sokumɔ doo nɔɔrugibu yèn sɔ̃ bɑ yɔ̃rɑ dim dim. I Yoobun tɛmɑnɑbun bɑɑru nuɑ, i mɑɑ yɛ̃ ye Yinni Gusunɔ u nùn kuɑ yen biru. Domi Yinni u rɑ wɔnwɔndu kɑ tɔn geeru ko.
12 Ye n kpuro kere nɛgibu, i ku kɑ wɔllu bɔ̃re, ǹ kun mɛ kɑ tem, ǹ kun mɛ kɑ gɑ̃ɑnu gɑnu. I gesi geruo mɛyɑ sɑnɑm mɛ n sɑ̃ɑ mɛ, kpɑ i gere ɑɑwo, n ǹ mɛ, sɑnɑm mɛ n ǹ mɛ, kpɑ i ku kɑ wɔri Gusunɔn siribu sɔɔ.
13 Nɔni swɑ̃ɑrɑ bɛɛn goo deemɑwɑ? U kɑnɑru koowo. Goon nukurɑ tɑ do? U Gusunɔ siɑro kɑ womusu. 14 Bɛɛn goowɑ bɑrɔ? U Yesun yigbɛ tɔnwerobu sokusio. Berɑ bɑ koo nùn gum tɑ̃re kɑ Yinnin yĩsiru kpɑ bu nùn kɑnɑru koosi. 15 Kɑnɑ nɑɑnɛgii te, tɑ koo bɑrɔ wi fɑɑbɑ ko. Yinni Gusunɔ u koo nùn bwɑ̃ɑ dobu wɛ̃. Ù n dɑɑ mɑɑ torɑ, bɑ koo nùn suuru kuɑ. 16 Ǹ n mɛn nɑ, i bɛɛn durum tuubɑ kuɑnɔ, kpɑ i n kɑnɑru kuɑnɑmmɛ, kpɑ i kɑ wɑ i bɛkurɑ. Gemgiin kɑnɑru tɑ dɑm ɑrufɑɑnigum mɔ n kpɑ̃. 17 Eli, tɔnuwɑ nge bɛsɛ. U kɑnɑru kuɑ gem gem gurɑ yu ku nɛ, mɑ gurɑ kun nɑ sere wɔ̃ɔ itɑ kɑ suru nɔɔbɑ tiɑ. 18 Yen biru u kpɑm kɑnɑru kuɑ, mɑ Gusunɔ u gurɑ nɛɛsiɑ mɑ u derɑ dĩɑnu kpiɑ temɔ.