3
I sun kɑnɑru kuo
1 Ye n tie nɛgibu, i sun kɑnɑru kuo kpɑ Yinnin gɑri yi wɑ yi kpɑrɑrɑ fuuku, kpɑ yi n yiiko mɔ nge mɛ yi kuɑ bɛɛn suunu sɔɔ. 2 I mɑɑ kɑnɑru koowo kpɑ Gusunɔ u sun wɔrɑ tɔn kɔ̃so wiru sɑribɑn nɔmɑn di, domi n ǹ tɔmbu kpuro bɑ gɑri yi nɑɑnɛ dokemɔ.
3 Adɑmɑ Yinni u sɑ̃ɑ bɔrɔkini. U koo bɛɛ tɑ̃sisiɑ kpɑ u bɛɛ kɔ̃su tɔn kɔ̃so win sɔ̃. 4 Yinni u derɑ sɑ bɛɛ nɑɑnɛ sɑ̃ɑ. Sɑ yɛ̃ mɑ i mɔ̀ ye sɑ bɛɛ yiire, mɛyɑ i ko n mɑɑ mɔ̀ i n dɔɔ.
5 Kpɑ Yinni u de bɛɛn bwisikunu nu n woo Gusunɔn kĩru giɑ kɑ mɑɑ Kirisin tɛmɑnɑbu sɔɔ.
N weenɛ tɔnu u sɔmburu ko
6 Nɛgibu, kɑ Yinni Yesu Kirisin yĩsiru sɑ bɛɛ yiiremɔ, i nɑɑnɛ dokeo bɑɑwure gɔwo wi u sɑ̃ɑ gɑru koo sɑri mɑ u ǹ sɔ̃ɔsinu swĩi ni sɑ bɛɛ wɛ̃. 7 Bɛɛn tii i yɛ̃ mɛ n weenɛ i bɛsɛn dɑɑ sɑɑri. Domi sɑ ǹ kue gɑru koo sɑribɑ bɛɛn suunu sɔɔ. 8 Sɑ ǹ goon dĩɑnu di sɑ kun nin gobi kɔsie, ɑdɑmɑ sɑ sɔm sɛ̃sɔgiru kuɑ bururu kɑ yokɑ sere sɑ wɑsirɑ kpɑ su ku kɑ ko goon sɔmunu. 9 N ǹ mɔ sɑ ǹ yen yiiko mɔ, ɑdɑmɑ sɑ kĩwɑ bɛsɛn tii su bɛɛ kom gem sɔ̃ɔsi mɛ i ko sɑɑri. 10 Sɑnɑm mɛ sɑ wɑ̃ɑ bɛɛn mi sɑ bɛɛ yiire sɑ nɛɛ, wi u kun kĩ u sɔmburu ko, n ǹ mɑɑ weenɛ yɛ̃ro u di.
11 Wee, sɑ nuɑ mɑ bɛɛn gɑbu bɑ sɑ̃ɑ yikurobu be bɑ kun gɑru mɔ̀ mɑ n kun mɔ gɑri wɔbiɑ wɔribu. 12 Sɑ tɔn ben bweseru yiiremɔ sɑ bu suuru kɑnɑmɔ Yinni Yesu Kirisin sɔ̃, bu de bu sɔmburu ko lɑɑkɑri sɔɔ kpɑ bu ben tii diisiɑ.
13 Adɑmɑ bɛɛ nɛgibu, i ku wɑsirɑ kɑ geɑn kobu. 14 Goo ù n yinɑ u gɑri yi mɛm nɔɔwɑ yi sɑ yoruɑ tire teni sɔɔ, i n nùn lɑɑkɑri sɑ̃ɑ kpɑ i kun mɑɑ gɑ̃ɑnu mɔɔsinɛ kɑ wi, n wɑ sekuru tu nùn mwɑ. 15 I ku nùn gɑrisi nge yibɛrɛ, ɑdɑmɑ i nùn swɑɑ sɔ̃ɔsio mɛro bisi bisikum.
Domɑru kɑ tɔbiribu
16 Yinni wi u rɑ ɑlɑfiɑ wɛ̃ u bɛɛ ɑlɑfiɑ kɛ̃ sɑɑ bɑɑyere ye n bɛɛ deemɑ kpuro sɔɔ kpɑ u n kɑ bɛɛ kpuro wɑ̃ɑ.
17 Kɑ nɛn tiin nɔmuwɑ nɑ yeni yoruɑ. Nɛ Pɔlu nɑ bɛɛ tɔburɑ. Yerɑ n sɑ̃ɑ nɛn yĩreru nɛn tirenu kpuro sɔɔ.
18 Nɛn yorɑ mi. Kpɑ bɛsɛn Yinni Yesu Kirisin durom mu n kɑ bɛɛ kpuro wɑ̃ɑ._