Tɛsɑlonikɑ I 2

Sɔmbu te Pɔlu kuɑ

Tɛsɑlonikɑɔ

¹ Nɛgibu, bɛɛn tii i yɛ̃ mɑ bɛsɛn nɑɑru bɛɛn mi tɑ ǹ kue kɑm. ² I yɛ̃ mɑ bɑ sun nɔni sɔ̃ɔwɑ bɑ sun tɔ̃yɑ kuɑ Filipiɔ sɑ sere nɑ bɛɛn mi. Kɑ mɛ, Gusunɔ sun wɔrugɔru wɛ̃ sɑ kɑ win Lɑbɑɑri geɑ kpɑrɑ bɛɛn suunu sɔɔ, bɑɑ mɛ tɔn dɑbirɑ sun yinɑri. ³ Bɛsɛn wɑɑsu yɑ ǹ sɑ̃ɑ torɑrun gɑri, yɑ ǹ mɑɑ mɛnnɛ kɑ bwisiku kɔ̃sunu gɑnu ǹ kun mɛ kɑ tɑki. ⁴ Adɑmɑ, nge mɛ Gusunɔ sun nɑɑnɛ kuɑ u kɑ sun Lɑbɑɑri geɑ nɔmu sɔndiɑ, nge mɛyɑ sɑ kɑ ye kpɑrɑmɔ. Sɑ ǹ ye mɔ̀ nge mɛ yɑ koo kɑ tɔmbu dore mɑ n kun mɔ Gusunɔ wi u bɛsɛn gɔ̃rusu wɛ̃ɛrimɔ. ⁵ Domi bɛɛn tii i yɛ̃ sɑ̃ɑ sɑ̃ɑ mɑ sɑ ǹ bɛɛ kɔkurɑ kɑ gɑri dure, sɑ ǹ mɑɑ wɑɑsu kue su kɑ bɛɛn gobi wɑn sɔ̃. Gusunɔwɑ sɑ̃ɑ bɛsɛn seedɑ. ⁶ Sɑ ǹ mɑɑ bɛɛrɛ kɑsu bɛɛn mi ǹ kun mɛ gɑbun mi, ⁷ bɑɑ mɛ sɑ ko rɑɑ kpĩ su bɛɛ bɛsɛn dɑm sɔ̃ɔsi yèn sɔ̃ sɑ sɑ̃ɑ Kirisin gɔrobu. Adɑmɑ sɑ kuɑwɑ kpurɛ kpurɛ bɛɛn suunu sɔɔ nge mɛ bii mɛro rɑ win bibu nɔɔri. ⁸ Yèn sɔ̃ sɑ bɛɛ kĩ gem gem sɑ rɑɑ sɔɔru sɑ̃ɑ, n ǹ mɔ su kɑ bɛɛ Gusunɔn Lɑbɑɑri geɑ wɛ̃ tɔnɑ, ɑdɑmɑ kɑ mɑɑ bɛsɛn tiin wɑ̃ɑru, domi bɛɛn kĩrɑ sun nɛni. ⁹ Bɛsɛgibu, i bɛsɛn sɔmburu kɑ bɛsɛn wɑhɑlɑ yɑɑye ye sɑ wɑ. Sɑ sɔmburu kuɑ sɔ̃ɔ sɔɔ kɑ wɔ̃kuru yèn sɔ̃ sɑ ǹ kĩ su bɛɛn goo gɔngɛrɛ ko sɑnɑm mɛ sɑ Gusunɔn Lɑbɑɑri geɑ kpɑrɑmɔ bɛɛn suunu sɔɔ.

¹⁰ Bɛɛyɑ i sɑ̃ɑ bɛsɛn seedɑgibu kɑ mɑɑ Gusunɔn tii, mɑ bɛsɛn dɑɑ yɑ dɛɛre bɛɛ nɑɑnɛ dokeobun wuswɑɑɔ, yɑ mɑɑ sɑ̃ɑ dee dee, yɑ ǹ tɑɑrɛ gɑɑ mɔ. ¹¹ I mɑɑ yɛ̃ mɑ sɑ kɑ bɛɛ kuɑwɑ nge mɛ tundo u rɑ kɑ win bibu ko. ¹² Sɑ bɛɛ dɑm kɑ̃, sɑ mɑɑ bɛɛn gɔ̃rusu yɛmiɑsiɑ, sɑ mɑɑ bɛɛ suuru kɑnɑ i n kɑ sĩimɔ nge mɛ n weenɛ Gusunɔn wuswɑɑɔ, wi u bɛɛ sokumɔ i n kɑ bɔnu mɔ win yiiko sɔɔ mi u bɑndu swĩi.

¹³ Sɑ rɑ mɑɑ Gusunɔ siɑre bɑɑdommɑ yèn sɔ̃ sɑnɑm mɛ sɑ bɛɛ wɑɑsu kuɑ i ǹ gɑri yi gɑrisi tɔnugii, i yi wurɑwɑ mɑ yi sɑ̃ɑ Gusunɔgii. Mɛyɑ yi sɑ̃ɑ kɑ gem, mɑ yi sɔmburu mɔ̀ bɛɛ nɑɑnɛ dokeobu sɔɔ. ¹⁴ Nɛgibu, i kɑ Yesu Kirisin yigbɛnu weenɑ ni nu sɑ̃ɑ Gusunɔginu Yudeɑɔ, domi i nɔni swɑ̃ɑru wɑ sɑɑ bɛɛn temgibun min di nge mɛ tɔn ben tii bɑ wɑ Yuubɑn min di. ¹⁵ Yuu beyɑ bɑ Yinni Yesu kɑ Gusunɔn sɔmɔbu go, bɑ mɑɑ sun nɔni sɔ̃ɔwɑ. Ben dɑɑ kun Gusunɔ wɛ̃re, bɑ mɑɑ kɑ tɔmbu kpuro yibɛrɛ tɛɛru nɛni. ¹⁶ Bɑ mɑm yinɑmɔ su tɔn tukobu wɑɑsu kuɑ bu kɑ fɑɑbɑ wɑ. Nge mɛyɑ ben durum yɑ sosimɔ yɑ bɑndɑmɔ. Adɑmɑ Gusunɔn mɔru yɑ den sɑkɛ fuke ben wirɔ.

Pɔlu u kĩ u kpɑm

Tɛsɑlonikɑgibu wɑ

¹⁷ Nɛgibu, nge mɛ sɑ bɛɛ biɑ sɔ̃ɔ yiru wɑsi sɔɔ, n ǹ mɔ gɔ̃ru sɔɔ, sɑ bɛɛn bɛkɛ mɔ̀ gem gem sɑ sɛnde su kɑ bɛɛ wɑ. ¹⁸ Sɑ kĩɑ su wurɑmɑ bɛɛn mi. Nɛ Pɔlu nɑ kɑsu nge nɔn yiru n kɑ nɑ, ɑdɑmɑ Setɑm sun swɑɑ gɑnuɑ. ¹⁹ Dɔmɑ te Yinni Yesu koo wurɑmɑ, mbɑ n ko n sɑ̃ɑ bɛsɛn yĩiyɔbu kɑ bɛsɛn nuku dobu, mbɑ sɑ ko mɑɑ kɑ woo kɑnɑ win wuswɑɑɔ mɑ n kun bɛɛ. ²⁰ Geemɑ, bɛɛn sɔ̃nɑ sɑ woo kɑnɑmɔ, sɑ mɑɑ nuku dobu mɔ.