4
1 Ye nɑ gerumɔ wee. Bii wi u koo win bɑɑn tubi di, sɑnɑm mɛ u ginɑ sɑ̃ɑ bii, u ǹ yoo sɑnɔ gɑɑ kere, bɑɑ mɛ kpuro sɑ̃ɑ wigiɑ. 2 Sɑɑ ye u sɑ̃ɑ bii, tɔmbɑ wɑ̃ɑ be bɑ nùn nɛni, bɑ mɑɑ win wunɑnɔsu mɔ̀ sere sɑɑ ye win bɑɑbɑ u nùn yiiyɑ. 3 Nge mɛyɑ n sɑ̃ɑ kɑ bɛsɛ. Sɑ rɑɑ sɑ̃ɑ hɑnduniɑn bũnun yobu. 4 Adɑmɑ sɑnɑm mɛ sɑɑ yɑ turɑ, Gusunɔ u win bii gɔrimɑ. Tɔn kurɔwɑ nùn mɑrɑ, u mɑɑ nùn mɑrɑwɑ woodɑn nɔmɑ sɔɔ, 5 kpɑ u kɑ bu yɑkiɑ be bɑ wɑ̃ɑ woodɑn nɔmɑɔ kpɑ su ko Gusunɔn bibu.
6 Gusunɔ u win Biin Hunde gɔrimɑ bɛsɛn gɔ̃rusu sɔɔ u kɑ sɔ̃ɔsi mɑ win bibɑ bɛsɛ sɑ sɑ̃ɑ. Hunde win sɑɑbuwɑ sɑ nùn sokumɔ, bɑɑbɑ. 7 Ǹ n mɛn nɑ, ɑ ǹ mɑɑ sɑ̃ɑ yoo, ɑ kuɑ bii. Tɛ̃ ye ɑ kɑ sɑ̃ɑ bii, Gusunɔ u mɑɑ nun kuɑ tubi dio.
Gɑlɑtigibun gɑri Pɔlu nɛni
8 Yellu i ǹ Gusunɔ yɛ̃, mɑ i sɑ̃ɑ gɑ̃ɑnun yobu ni nu ǹ sɑ̃ɑ Gusunɔ. 9 Adɑmɑ tɛ̃ nge mɛ i Gusunɔ wurɑ, nge n mɑm nɛɛre, Gusunɔ u bɛɛ wurɑ, ɑmɔnɑ i kɑ kĩ i gɔsirɑ hɑnduniɑn bũnun mi, ni nu ǹ dɑm kɑ bɛɛrɛ mɔ. Mbɑn sɔ̃nɑ i kĩ i mɑɑ ko nin yobu. 10 I tɔ̃nu gɑnun sɑriɑ swĩi, kɑ suru kɑ tɔ̃ɔ bɑkɑnu kɑ wɔ̃su. 11 Tɛ̃ bɛrum mɑn mɔ̀ nɛn sɔmburu kpuro tu ku rɑɑ ko kɑm te nɑ kuɑ bɛɛn sɔ̃.
12 Nɑ bɛɛ kɑnɑmɔ nɛgibu, i bɛɛn tii dokeo nɛn ɑyerɔ, domi nɑ nɛn tii doke bɛɛn ɑyerɔ. I ǹ mɑn gɑ̃ɑnu tore. 13 Nge mɛ i yɛ̃, kɑ wɑsin bɑrɑrɑ nɑ bɛɛ Lɑbɑɑri geɑ wɑɑsu kuɑ nɔn gbiikiru. 14 Adɑmɑ i ǹ mɑn gɛmɑ, i ǹ mɑɑ mɑn yinɛ, bɑɑ mɛ nɛn bɑrɑru tɑ bɛɛ wɑɑbu tusɑ. I mɑn mwɑwɑ nge mɛ i ko Gusunɔn gɔrɑdo mwɑ, ǹ kun mɛ Yesu Kirisi win tii. 15 I rɑɑ nuku dobu mɔ. Tɛ̃, mbɑ n bɛɛ kuɑ. Nɑ kon kpĩ n bɛɛ seedɑ diiyɑ mɑ, ǹ n koo rɑɑ koorɑ i ko i bɛɛn nɔni wukɑ i mɑn kɛ̃. 16 Nɑ kuɑ bɛɛn yibɛrɛ yèn sɔ̃ nɑ bɛɛ gem sɔ̃ɔwɑ?
17 Tɔn be, bɑ bɛɛn kĩru kɑsu, ɑdɑmɑ n ǹ kɑ yɑɑsi geɑ. Bɑ kĩ bu bɛɛ gɔwɑ bɛsɛn min di, kpɑ i n ben kĩru kɑsu. 18 Tɔnu ù n bɛɛn kĩru kɑsu kɑ yɑɑsi geɑ, gɑ̃ɑ geenɑ bɑɑdommɑ, n ǹ mɔ sɑnɑm mɛ nɑ wɑ̃ɑ kɑ bɛɛ tɔnɑ. 19 Nɛn bii kĩnɑsibu, nɑ kpɑm mɑɑ wɑhɑlɑ mɔ̀ nge tɔn kurɔ wi u mɑrumɔ, sere Kirisin dɑɑ yu kɑ koorɑ bɛɛ sɔɔ. 20 Nɑ kĩ nɑ n wɑ̃ɑ kɑ bɛɛ tɛ̃ kpɑ n nɛn gere kɔsi. Nɑ wɑ̃ɑ bitɑni sɔɔ bɛɛn sɔ̃.
Agɑɑ kɑ Sɑɑrɑɑ
bɑ sɑ̃ɑ gɑri yin weesinɑɑ
21 I de n bɛɛ bikiɑ, bɛɛ be i kĩ i n wɑ̃ɑ woodɑn nɔmɑɔ, i ǹ nuɑ ye woodɑ yɑ gerumɔ? 22 Bɑ yoruɑ mɑ Aburɑhɑmu u bii tɔn durɔbu yiru mɑrɑ, turo kɑ kurɔ wi u sɑ̃ɑ yoo, turo kɑ kurɔ wi u sɑ̃ɑ tii mɔwɔ. 23 Yoo wi, u win bii mɑrɑ nge mɛ tɔmbu kpuro bɑ rɑ mɑ, ɑdɑmɑ tii mɔwɔ wi, u win bii mɑrɑwɑ kɑ Gusunɔn nɔɔ mwɛɛru. 24 Gɑri yini yi kuɑ weesinɑɑ. Kurɔ be yiru bɑ kɑ nɔɔ mwɛɛnu yiru weenɛ. Teeru, te tɑ bibu mɑrumɔ yoru sɔɔ, tɑ nɑɑmɔ sɑɑ Sinɑin guurun di, teyɑ tɑ kɑ Agɑɑ weenɛ. 25 Agɑɑ wi, u sɑ̃ɑre nge Sinɑin guuru, Dɑɑrububɑn tem sɔɔ. U mɑɑ sɑ̃ɑ nge Yerusɑlɛmu ye yɑ wɑ̃ɑ tɛ̃, domi yɑ wɑ̃ɑ yoru sɔɔ kɑ yen tɔmbu kpuro. 26 Adɑmɑ Yerusɑlɛmu ye yɑ wɑ̃ɑ wɔllɔ, yɑ tii mɔ, yɑ mɑɑ sɑ̃ɑ bɛsɛn mɛro. 27 Domi bɑ yoruɑ,
<<A gɔ̃ru doro, kurɔ wunɛ wi ɑ ǹ mɑrure.
A gbɑ̃ro ɑ kuukɑ ko kɑ nuku dobu,
wunɛ wi ɑ ǹ mɑrubun wɑhɑlɑ koore.
Domi kurɔ wi bɑ rɑɑ deri,
u koo bibu mɑ n kere kurɔ wi u wɑ̃ɑ kɑ durɔ.>>
28 Tɛ̃ bɛɛ nɛgibu, i sɑ̃ɑ Gusunɔn nɔɔ mwɛɛrun bibu nge mɛ Isɑki u sɑ̃ɑ. 29 Sɑnɑm mɛyɑ bii wi bɑ mɑrɑ nge bɑɑwure, u wi bɑ mɑrɑ kɑ Gusunɔn Hunden dɑm nɔni sɔ̃ɔwɑ. Mɛyɑ mɑɑ n sɑ̃ɑ tɛ̃. 30 Adɑmɑ mbɑ Gusunɔn gɑri yi gerumɔ. Yi nɛɛwɑ, <<A yoo wi giro kɑ win bii sɑnnu, domi win bii wi, u ǹ tubi dimɔ kɑ tii mɔwɔn bii sɑnnu.>> 31 Nge mɛyɑ nɛgibu, sɑ ǹ sɑ̃ɑ yoon bibu. Sɑ sɑ̃ɑwɑ tii mɔwɔn bibu.