6
1 Bɛsɛ be sɑ sɔmburu mɔ̀ kɑ Gusunɔ sɑnnu, sɑ bɛɛ kɑnɑmɔ i ku de durom mɛ i mwɑ win mi, mu kɑm ko. 2 Domi Gusunɔ u nɛɛ,
<<Nɑ nun swɑɑ dɑki sɑnɑm mɛ nɑ tɔmbu durom kuɑmmɛ.
Nɑ nun somi fɑɑbɑn tɔ̃ru.>>
Wee, tɛ̃rɑ n weenɛ i Gusunɔn durom mwɑ, gisɔrɑ fɑɑbɑn tɔ̃ru.
3 Sɑ ǹ kĩ goo u bɛsɛn sɔmburu tɑɑrɛ wɛ̃. Yen sɔ̃nɑ sɑ ǹ gɑ̃ɑnu mɔ̀ ni nu koo tɔnu torɑsiɑ. 4 Adɑmɑ bɛsɛn kookoosu kpuro sɔɔ sɑ tii sɔ̃ɔsimɔ geegibu nge mɛ n kɑ Gusunɔn sɔm kowobu weenɛ. Sɑ tɛmɑnɑ gem gem nɔni swɑ̃ɑru sɔɔ kɑ yɑ̃ɑru sɔɔ kɑ wɑhɑlɑ sɔɔ. 5 Bɑ sun sɛni so bɑ kpɛ̃ɛ pirisɔm sɔɔ. Tɔn dɑbinu sun seesi. Sɑ sɔmɑ kuɑ sere sɑ wɑsirɑ. Sɑ dom serɑ. Sɑ nɔɔ bɔkuɑ. 6 Sɑ sɔ̃ɔsimɔ mɑ sɑ sɑ̃ɑ Gusunɔn sɔm kowobu kɑ bɛsɛn wɑ̃ɑ dɛɛrɑru kɑ bɛsɛn yɛ̃ru kɑ bɛsɛn suuru kɑ bɛsɛn tɔn geeru kɑ Hunde Dɛɛro, kɑ kĩru te tɑ ǹ murɑfitiru mɔ, 7 kɑ gem gɑri kɑ mɑɑ Gusunɔn dɑm. Gem mu sɑ̃ɑ bɛsɛn tɑbu yɑ̃nu su kɑ sɑnnɑ, su mɑɑ kɑ tii yinɑ. 8 Gɑbɑ sun bɛɛrɛ wɛ̃ɛmɔ, gɑbɑ mɑɑ sun funɛ wunɑmɔ. Gɑbɑ bɛsɛn geɑ gerumɔ, gɑbɑ mɑɑ bɛsɛn kɔ̃sɑ gerumɔ. Bɑ sun mɛɛrɑ nge wee kowobu bɑɑ mɛ sɑ gem gerumɔ. 9 Bɑ sun mɛɛrɑ nge be goo kun yɛ̃, ɑdɑmɑ Gusunɔ u sun yɛ̃ sɑ̃ɑ sɑ̃ɑ. Bɑ sun mɛɛrɑ nge be bɑ wɑsikirɑmɔ, ɑdɑmɑ wee sɑ wɑ̃ɑ sɑ wɑsi. Bɑ sun mɛɛrɑ nge be bɑ sɛɛyɑsiɑ, ɑdɑmɑ sɑ ǹ gu. 10 Bɑ sun mɛɛrɑ nge nuku sɑnkirobu, ɑdɑmɑ sɑ rɑ n nuku dobu mɔ. Sɑ sɑ̃ɑ nge sɑ̃ɑrobu, ɑdɑmɑ sɑ tɔn dɑbinu dukiɑ wɛ̃ɛmɔ. N sɑ̃ɑre nge sɑ ǹ gɑ̃ɑnu mɔ, ɑdɑmɑ sɑ kpuro mɔ.
11 Sɑ bɛɛ gɑri bururɑsiɑ, bɛɛ Korintigibu. Bɛsɛn gɔ̃ru gɑ bɛɛn kĩru mɔ. 12 Sɑ ǹ bɛɛ bɛsɛn kĩru berue, bɛɛyɑ i sun bɛɛgiru beruɑ. 13 Ǹ n mɛn nɑ, nɑ kɑ bɛɛ gɑri mɔ̀ nge nɛn bibu, i sun kuo nge mɛ sɑ bɛɛ kuɑ. I de bɛɛn gɔ̃ru gɑ n bɛsɛn kĩru mɔ.
Kirɔ bũu sɑ̃ɔbun sɔ̃
14 I ku tii gbinnɑ kɑ nɑɑnɛ doke sɑrirugibu domi i ǹ kɑ bu weenɛ. Amɔnɑ geɑ kɑ kɔ̃sɑ yɑ ko n wɑ̃ɑsinɛ. Nge ɑmɔnɑ yɑm bururɑm kɑ yɑm wɔ̃kurɑ ko n mɛnnɛ. 15 Amɔnɑ Kirisi kɑ Setɑm bɑ koo kɑ nɔɔsinɑ. Nge mbɑ nɑɑnɛ dokeo kɑ nɑɑnɛ doke sɑrirugii bɑ mɔɔsinɛ. 16 Amɔnɑ Gusunɔn sɑ̃ɑ yeru kɑ bũnu ko n kɑ nɔɔ tiɑ sɑ̃ɑ. Domi bɛsɛrɑ sɑ sɑ̃ɑ Gusunɔ, Yinni wɑson wɑ̃ɑ yeru nge mɛ win tii u geruɑ,
<<Kon sinɑ nɑ n wɑ̃ɑ ben suunu sɔɔ.
Kon ko ben Yinni, kpɑ bu ko nɛn tɔmbu.>>
17 Yen sɔ̃nɑ Yinni u nɛɛ,
<<I yɑrio bwese tukunun suunu sɔɔn di.
I ku gɑ̃ɑnu bɑbɑ ni nu disi mɔ.
Kon bɛɛ wurɑ.
18 Kon ko bɛɛn Bɑɑbɑ.
Bɛɛ mɑɑ kpɑ i ko nɛn bii tɔn durɔbu kɑ tɔn kurɔbu.
Yeyɑ Yinni dɑm kpurogii u geruɑ.>>