2
1 Yen sɔ̃nɑ nɑ gɔ̃ru doke n ku kɑ dɑ bɛɛn mi kpɑm kɑ nuku sɑnkirɑnu. 2 Domi nɑ̀ n bɛɛ nukuru sɑnkɑ, wɑrɑ koo mɑɑ mɑn nukuru dorɑsiɑ mɑ n kun mɔ bɛɛ be nɑ nuki sɑnkɑ. 3 Yenin sɔ̃nɑ nɑ bɛɛ tireru yoruɑ nge mɛ nɑ kuɑ. Nɑ ǹ kĩ n turi bɛɛn mi kpɑ bu mɑn nuki sɑnku be n weenɛ bu mɑn nuku dobu wɛ̃. Nɑ bɛɛ kpuro nɑɑnɛ sɑ̃ɑ mɑ nɛn nukuru tɑ̀ n dorɑ, bɛɛ kpuron nuku dobɑ. 4 Mɛyɑ nɑ bɛɛ tireru yoruɑ kɑ nɔni swɑ̃ɑru kɑ nuku sɑnkirɑnu kɑ mɑɑ yĩresu, n ǹ mɔ n kɑ bɛɛ nuki sɑnku. Nɑ kĩwɑ i giɑ nge mɛ nɑ bɛɛ kĩ n nɛ.
Bu toro suuru kuo
5 Goo ù n kɑ nuku sɑnkirɑnu nɑ, n ǹ mɔ nɛnɑ u nuki sɑnkɑ, bɛɛ kpurowɑ, ǹ kun mɛ bɛɛn gɑbu, kpɑ n ku gere n kɑ tondɑ. 6 Sɛɛyɑsiɑ bi bɛɛn dɑbinu durɔ wi sɛɛyɑsiɑ, bu nùn nuɑ. 7 Yen sɔ̃ tɛ̃, n weenɛ i nùn suuru kuɑ i nùn dɑm kɛ̃ kpɑ nuku sɑnkirɑ bɑkɑnu nu ku rɑɑ de u kom yɑɑ biɑ. 8 Yen sɑɑbu nɑ bɛɛ kɑnɑmɔ, i nùn kuo mɛ u ko n kɑ yɛ̃ mɑ i nùn kĩ. 9 Domi nɑ mɑɑ bɛɛ tireru yoruɑ n kɑ bɛɛn lɑɑkɑri mɛɛri n wɑ ì n sɑ̃ɑ mɛm nɔwɔbu kpuro sɔɔ. 10 Ì n goo nùn win torɑru suuru kuɑ, nɑ mɑɑ yɛ̃ro suuru kuɑ. Gɑ̃ɑnu nù n wɑ̃ɑ ni nɑ suuru kuɑ, bɛɛn sɔ̃nɑ nɑ kuɑ Kirisin wuswɑɑɔ. 11 Kpɑ Setɑm u ku kɑ sun kɑmiɑ domi sɑ win bwisikunu yɛ̃ sɑ̃ɑ sɑ̃ɑ.
Pɔlun lɑɑkɑri seebu Torɑsiɔ
12 Ye nɑ turɑ Torɑsiɔ n kɑ Kirisin Lɑbɑɑri Geɑ kpɑrɑ, nɑ wɑ kɑ Yinnin durom mɑ swɑɑ mɑn kusiɑrɑ n kɑ sɔmburu ko mi. 13 Adɑmɑ nɛn lɑɑkɑri kun kpunɛ sɛ̃ɛ yèn sɔ̃ nɑ ǹ nɛgii Titu wɑ. Yen sɑɑbuwɑ nɑ Torɑsigibu nɔɔ kɑnɑ mɑ nɑ doonɑ Mɑsedɔni giɑ.
Nɑsɑrɑ Yesu Kirisi sɔɔ
14 Su Gusunɔ siɑrɑ. Domi u rɑ n sun gbiiye kɑ nɑsɑrɑ yèn sɔ̃ sɑ gbinnɛ kɑ Kirisi. U sun dendimɔ u kɑ tɔmbu Kirisi giɑsiɑ yɑm kpuro nge turɑre yèn nuburu tɑ pusɑ bɑɑmɑ. 15 Geemɑ, bɛsɛ sɑ sɑ̃ɑwɑ nge turɑre nubu durorugiɑ ye Kirisi u Gusunɔ wɛ̃ɛmɔ. Mɑ yɑ pusɑ be bɑ fɑɑbɑ wɑɑmɔn mi, kɑ mɑɑ be bɑ kɑm kobu dɔɔn mi. 16 Be bɑ kɑm kobu dɔɔn mi, nubu gɔɔgirɑ te tɑ gɔɔ mɑrumɔ. Be bɑ mɑɑ fɑɑbɑ wɑɑmɔn mi, nubu wɑ̃ɑrugirɑ te tɑ wɑ̃ɑru wɛ̃ɛmɔ. Wɑrɑ turɑ u kɑ sɔmbu ten bweseru ko. 17 Sɑ ǹ sɑ̃ɑ nge gɑbu be bɑ kɑ Gusunɔn gɑri tenkuru mɔ̀. Adɑmɑ, yèn sɔ̃ Gusunɔwɑ u sun gɔrimɑ, yen sɔ̃nɑ sɑ gɑri gerumɔ kɑ murɑfiti sɑriru win wuswɑɑɔ nge Kirisin sɔmɔbu.