16
Pɔlu u tɔmbu tɔbirimɔ
1 Nɑ bɛɛ bɛsɛgii Fɛbe tusiɑmɔ wi u sɑ̃ɑ Sɑnkeren Yesun yigbɛrugibun sɔm kowo. 2 I kurɔ wi mɔɔ Yinnin yĩsirun sɔ̃ nge mɛ n weenɛ nɑɑnɛ dokeobun suunu sɔɔ. Kpɑ i n nùn somimɔ kɑ bukɑtɑ kpuro ye u mɔ bɛɛn mi. Domi u tɔn dɑbiru somi, kɑ mɑɑ nɛn tii.
3 I Pirisilɑ kɑ Akilɑsi tɔbiri, be bɑ sɑ̃ɑ nɛn sɔm kowosibu Yesu Kirisi sɔɔ. 4 Bɑ ben wɑ̃ɑru wɛ̃ bu kɑ nɛn wɑ̃ɑru wɔrɑ. N ǹ nɛ turo nɑ bu siɑrɑmɔ, kɑ mɑɑ tɔn tuko Yesun yigbɛnugibu kpurowɑ bɑ bu siɑrɑmɔ. 5 I mɑɑ Yesun yigbɛru te tɑ rɑ mɛnnɛ ben yɛnuɔ tɔbiri. I nɛn kĩnɑsi Epɑnɛti tɔbiri wi u gbiɑ u gɔ̃ru gɔsiɑ Kirisin mi Asin tem sɔɔ. 6 I Mɑɑri tɔbiri wi u sɔmburu kuɑ gem gem bɛɛn sɔ̃. 7 I mɑɑ nɛn temgibu Andoniku kɑ Yuniɑ tɔbiri kɑ be sɑ pirisɔm kuɑ sɑnnu. Bɑ bɛɛrɛ bɑkɑ mɔ gɔrobun suunu sɔɔ. Bɑ mɑm gbiɑ bɑ kuɑ Yesugibu nɑ sere kuɑ Yesugii.
8 I Ampilɑtu tɔbiri wi u sɑ̃ɑ nɛn kĩnɑsi Yinni sɔɔ. 9 I bɛsɛn sɔm kowosi Kirisi sɔɔ Urubɛni tɔbiri, kɑ Sɑtɑki nɛn kĩnɑsi. 10 I Apelɛsi tɔbiri wi u tii sɔ̃ɔsi nɑɑnɛ dokeo geo lɑɑkɑri mɛɛribun sɑɑ sɔɔ. I Aritobun yɛnugibu tɔbiri. 11 I nɛn temgii Herodio tɔbiri. I Nɑɑsisin yɛnugibu tɔbiri be bɑ sɑ̃ɑ Yinnigibu. 12 I Tirifɛni kɑ Tirifosi tɔbiri, kurɔ be bɑ sɑ̃ɑ Yinnin sɔm kowobu. I Pɛɛsidi bɛsɛn kĩnɑsi tɔbiri wi u sɔmburu kuɑ gem gem Yinnin sɔ̃. 13 I mɑɑ Rufusi tɔbiri wi u sɑ̃ɑ nɑɑnɛ dokeo geo, kɑ win mɛro wi nɑ gɑrisi nɛn mɛro. 14 I Asɛnkiti tɔbiri kɑ Felegoni, kɑ Herimɛsi kɑ Pɑtobɑsi, kɑ Herimɑsi kɑ bɛsɛgibu be bɑ wɑ̃ɑ kɑ be. 15 I Filolɔgu kɑ Yuli tɔbiri kɑ Nɛre, kɑ win sesu, kɑ Olimpɑ, kɑ nɑɑnɛ dokeobu kpuro be bɑ kɑ bu wɑ̃ɑ.
16 I tɔbirinɔ kɑ kĩru. Kirisin yigbɛnu kpuro nu bɛɛ tɔburɑ.
Kirɔ dɑ̃ɑkɑ
17 Nɛgibu, nɑ bɛɛ kɑnɑmɔ i n dɑ n tii sɛ kɑ be bɑ kɑrɑnɑɑ dokemɔ, kɑ ye n koo bɛɛ wɔrumɑsiɑ. I dɛsiro ben min di, domi bɑ sɔ̃ɔsiru sikimɔwɑ te i nuɑ kɔ. 18 Domi tɔn ben bweseru bɑ ǹ sɑ̃ɑ be bɑ Kirisi bɛsɛn Yinnin wɑ̃ɑru wɑ̃ɑ, ben nukurugiɑ bɑ mɔ̀. Kɑ gɑri dori kɑ kɔkiribɑ, bɑ kɑ tɑki sɑrirugibu swɑɑ nim wiɑmɔ. 19 Ǹ n bɛɛn sɔ̃n nɑ, tɔmbu kpuro bɑ bɛɛn mɛm nɔɔbu yɛ̃ kɔ. Yen sɔ̃nɑ nɛn nukurɑ do kɑ bɛɛ. Adɑmɑ nɑ kĩ i n sɑ̃ɑ bwisigibu geɑn kobu sɔɔ, kpɑ i n sɑ̃ɑ be bɑ kun kɔ̃sɑn kobu yɛ̃. 20 Gusunɔ wi u ɑlɑfiɑ wɛ̃ɛmɔ, u koo bɛɛ Setɑm dɑm kɔrɑ ǹ n sosi bɛɛn nɑɑsun temɔ.
Bɛsɛn Yinni Yesun durom mu n wɑ̃ɑ kɑ bɛɛ.
21 Timɔte, nɛn sɔm kowosi, u bɛɛ tɔburɑ, kɑ mɑɑ nɛn temgibu Lusiu kɑ Yɑsoni, kɑ Sosipɑti.
22 Nɑ bɛɛ tɔburɑ Yinni sɔɔ, nɛ Teritiu, nɛ wi nɑ tire te yorumɔ.
23 Gɑyusi nɛn kpɑɑ yɛ̃ro kɑ yigbɛru kpuron kpɑɑ yɛ̃ro, u bɛɛ tɔburɑ. Erɑsutu wi u rɑ wuun gobi bere, u bɛɛ tɔburɑ, kɑ mɑɑ bɛsɛgii Kɑɑtusi.
Siɑrɑ dɑ̃ɑkibu
25 Su Gusunɔ siɑrɑ wi u dɑm mɔ u kɑ bɛɛ tɑ̃sisiɑ kɑ nɛn Lɑbɑɑri geɑ ye nɑ wɑɑsu mɔ̀ nɑ kɑ Yesu Kirisin gɑri kpɑrɑmɔ, yi yi ɑsiri sɔ̃ɔsimɔ ye yɑ rɑɑ wukiri sɑɑ toren di. 26 Adɑmɑ tɛ̃ yɑ terɑ sɑɑ Gusunɔn sɔmɔbun yorin di, nge mɛ Gusunɔ u yiire, wi, wi u ko n wɑ̃ɑ sere kɑ bɑɑdommɑɔ. Mɑ bɑ bwesenu kpuro ye giɑsiɑ nu kɑ nɑɑnɛ doke kpɑ nu kɑ gɑri yi mɛm nɔɔwɑ.
27 Yen sɔ̃, bu Gusunɔ wi u sɑ̃ɑ bwisigii wi turo, bɛɛrɛ wɛ̃ɛyɔ sɑɑ Yesu Kirisin min di sere kɑ bɑɑdommɑɔ. Ami._