Yinni Gusunɔ
u koo win yibɛrɛbɑ sɛɛyɑsiɑ
65
1 Yinni Gusunɔ u nɛɛ,
nɑ sɔɔru kpeerewɑ n kɑ nɛn tɔmbun kɑnɑru mwɑ,
ɑdɑmɑ bɑ ǹ mɑn gɑ̃ɑnu bikie.
Nɑ sɔɔru sɑ̃ɑ n kɑ bu nɛn tii sɔ̃ɔsi,
ɑdɑmɑ bɑ ǹ mɑn kɑsu.
Mɑ nɑ nɛɛ, nɛ wee, bɑɑ mɛ bɑ ǹ mɑn sokɑ.
2 Nɑ tɔn be bɑ rɑ n mɑn seesimɔ nɔmɑ gɑ̃ri sɑɑ kpuro.
Tɔn be, swɑɑ kɔ̃sɑ sɔɔrɑ bɑ rɑ n sĩimɔ,
kpɑ bɑ n ben tii tiin bwisikunu swĩi.
3 Bɑ rɑ n nɛn mɔru seeyɑmɔwɑ kiri kiri.
Domi bɑ rɑ n bũu yɑ̃kunu mɔ̀wɑ dɑ̃ɑ konɔ,
bɑ n turɑre dɔ̃ɔ dokemɔ yɑ̃ku yenun wɔllɔ
ni bɑ kuɑ kɑ biriki.
4 Kpɑ bɑ n bikiɑru dɑɑmɔ sikɑɔ,
bɑ n wɑ̃ɑ mi wɔ̃kuru kpuro.
Bɑ rɑ n kurusɔ yɑɑ dimɔ
kɑ mɑɑ dĩɑ sesenuginu gɑnu,
5 kpɑ bɑ n sere gɑbu sɔ̃ɔmɔ bɑ n mɔ̀,
bu gɛsiro bu ku bu susi,
domi bɑ dɛɛre.
Adɑmɑ nɑ̀ n yenibɑ kpuro wɑ nɛn mɔru rɑ sewɑ
nge dɔ̃ɔ wi u ku rɑ gbi.
6 Bɛɛ nɛn tɔmbu, wee ye nɑ gɔ̃ru doke n ko tɛ̃.
Nɑ ǹ mɑrimɔ.
Kon dewɑ i bɛɛn kɔ̃sɑn ɑre kpuro sɔbe.
7 Kon de i bɛɛn durum sɔbe kɑ mɑɑ bɛɛn sikɑdobɑgiɑ,
be, be bɑ mɑn torɑri
bɑ bũnu turɑre dɔ̃ɔ dokeɑ guunu wɔllɔ.
Kon bɛɛ bɛɛn kookoo si i kuɑn ɑre kɔsiɑ.
8-10 Ì n resɛm swɑɑru wɑ te tɑ nim mɔ,
i rɑ nɛɛwɑ, bu ye derio mi,
bu ku ye sɑnku,
domi yɑ koo tɑm gem ko.
Nge mɛyɑ kon kɑ Isirelibɑ kɑ Yudɑbɑn sukum ko,
be bɑ gɔ̃ru gɔsiɑ bɑ mɑn kɑsu.
Kon bu gɔsi bu ko nɛn sɔm kowobu,
kpɑ n bu domɑru kuɑ bu mɑrurɑ,
kpɑ bu tem mɛ tubi di mi guunu wɑ̃ɑ,
bu ben wɑ̃ɑ yenu ko mi.
Kpɑ Sɑronin wɔwɑ yu ko ben yɑɑ sɑbenun kpɑrɑ yeru,
kpɑ Akɔɔn wɔwɑ yu ko nin sɔri yeru.
11 Adɑmɑ kon nɑ n bɛɛ deemɑ
bɛɛ be i nɛ, Yinni Gusunɔ deri,
mɑ i nɛn sɑ̃ɑ yee dɛɛrɑ te duɑri te tɑ wɑ̃ɑ guuru wɔllɔ,
i dɑ i dimɔ bũu wi bɑ mɔ̀ Gɑdin nuurɔ,
mɑ i bɛɛn nɔri tɑm yibiɑmɔ
bũu wi bɑ mɔ̀ Mɛnin sɔ̃.
12 Wee nɑ kɑ tɑkobi sisi.
Kon de i yiirɑ kpɑ bu bɛɛ sɑkiri,
domi nɑ bɛɛ sokɑ, ɑdɑmɑ i ǹ mɑn wurɑri.
Nɑ kɑ bɛɛ gɑri kuɑ, mɑ i ǹ mɑn swɑɑ dɑki.
I kuɑ ye yɑ ǹ wɑ̃ nɛn nɔni sɔɔ.
Mɑ i swɑɑ gɔsɑ ye nɛn gɔ̃ru gɑ ǹ kĩ.
13 Yen sɔ̃nɑ nɑ nɛɛ,
nɛn sɔm kowobu bɑ koo wɑ bu di kpɑ bu nɔ.
Adɑmɑ bɛɛ, gɔ̃ɔru kɑ nim nɔru sɔɔrɑ i ko i n wɑ̃ɑ.
Nɛn sɔm kowobu bɑ koo nuku dobu ko.
Adɑmɑ bɛɛ, i ko n wɑ̃ɑwɑ sekuru sɔɔ.
14 Wee, nɛn sɔm kowo be,
bɑ koo womusu ko kɑ nuku dobu.
Adɑmɑ bɛɛ, i ko kuuki kowɑ nuku sɑnkirɑnun sɔ̃,
kpɑ i n weeweenu mɔ̀.
15-16 Bɛɛn gɔɔn biru,
bɛɛn yĩsɑ nɛn sɔm kowobu bɑ ko n dɑ kɑ gɑbu bɔ̃rusi,
bu nɛɛ, Yinni Gusunɔ u de ɑ gbi nge wɑɑnɛ kɑsɑ.
Adɑmɑ yĩsiru gɑrɑ bɑ koo kɑ tɔmbu domɑru kuɑ.
Bɑ koo tu kowɑ kɑ nɛ, Yinni Gusunɔn yĩsiru,
nɛ wi nɑ sɑ̃ɑ gemgii.
Bɑ̀ n mɑɑ bɔ̃rumɔ bu kɑ ben gɑri sire,
kɑ nɛn yĩsi terɑ bɑ koo kɑ bɔ̃re.
Gusunɔ u koo tem kpɑm
kɑ wɔn kpɑɑru swĩi
Mɛyɑ yellun wɑhɑlɑ yɑ koo doonɑ.
Kpɑ tɔmbu bu yen gɑri duɑri.
17 Domi Yinni Gusunɔ u nɛɛ,
wee kon tem kpɑm kɑ wɔn kpɑɑru ko.
Bɑ ǹ mɑɑ yɑɑyɑmɔ ye yɑ rɑɑ koorɑ yellu.
Tɔmbɑ kun mɑɑ ye bwisikumɔ.
18 I yɛ̃ɛrio,
kpɑ i n wɑ̃ɑ nuku dobu sɔɔ sere kɑ bɑɑdommɑɔ
ye kon tɑkɑ kon sɔ̃.
Wee, nɑ Yerusɑlɛmu kpɑɑ bɑnimɔ
yè sɔɔ nuku dobu ko n wɑ̃ɑ,
kpɑ yen tɔmbu bu yɛ̃ɛri.
19 Nɛn tii kon yɛ̃ɛri Yerusɑlɛmu yen sɔ̃
kɑ nɛn tɔmbun sɔ̃.
Bɑ ǹ mɑɑ wuri kɑ weeweenu nɔɔmɔ mi.
20 Biin gɔɔ kun ko n mɑɑ wɑ̃ɑ mi,
ǹ kun mɛ durɔ tɔkɔ wi u kun win wɑ̃ɑrun tɔ̃ru yibɑ.
Wi u wɔ̃ɔ wunɔbu (100) turɑ u kɑ gu,
bɑ koo nùn gɑrisiwɑ ɑluwɑɑsi.
Wi u mɑɑ gu u ǹ wɔ̃ɔ wunɔbu (100) ye turɑ,
bɑ koo nɛɛwɑ, nɑ yɛ̃ro bɔ̃rusi.
21-22 Bɑ koo diɑ bɑni bɑ n wɑ̃ɑ ye sɔɔ.
Goo kun diru bɑnimɔ u kun wure te sɔɔ u sere gbi.
Bɑ koo resɛm dɑ̃ɑ duure kpɑ bu yen mɑrum di.
Goo kun dɑ̃ɑ duurumɔ u kun yen mɑrum di u sere gbi.
Domi nɛn tɔn be nɑ gɔsɑn wɑ̃ɑru
tɑ koo dɛnyɑ nge dɑ̃rugiru,
kpɑ bu ben nɔmɑn sɔmburun ɑre di.
23 Bɑ ǹ koo sɔmburu ko kɑm.
Ben bibɑ kun mɑɑ gbimɔ,
domi be kɑ ben bibu, bɑ sɑ̃ɑwɑ bwese
te nɛ, Yinni Gusunɔ nɑ domɑru kuɑ.
24 Bu sere kɑnɑru ko bu kpe,
ko nɑ n dɑ bu wisiwɑ.
25 Sɑɑ ye sɔɔ, purukɑnu kɑ yɑ̃ɑnu
koo yɑkɑsu di yɑm tem.
Mɛyɑ gbee sinɑnsu koo mɑɑ yɑkɑsu di nge kɛtɛbɑ,
kpɑ wɑɑ yɑ kun mɑɑ gɔbu.
Kɔ̃sɑ gɑɑ, ǹ kun mɛ ɑsɔrɔ gɑɑ kun ko n mɑɑ wɑ̃ɑ Siɔniɔ
nɛn guu dɛɛrɑ ten wɔllɔ.
Nɛ, Yinni Gusunɔwɑ nɑ geruɑ mɛ.