Esɑi 62

Yerusɑlɛmu kpɑɑ

¹ Yinni Gusunɔ u nɛɛ,

wunɛ Yerusɑlɛmu, wunɛn kĩrun sɔ̃ nɑ ǹ mɑrimɔ.

Nɑ ǹ mɑɑ wɛ̃rɑmɔ sere n kɑ nun fɑɑbɑ ko,

kpɑ yu sɔ̃ɔsirɑ nge bururun sɔ̃ɔ,

ǹ kun mɛ, nge wii bɔn te tɑ dɔ̃ɔ yɑbure,

² kpɑ bwesenu kpuro nu wɑ

mɑ nɑ nun fɑɑbɑ kuɑ,

kpɑ sinɑmbu bɑ n wunɛn yiiko mɛɛrɑ.

Yĩsi kpɑɑrɑ bɑ koo kɑ nun soku

te nɛ, Yinni Gusunɔ kon nun kɛ̃.

³ Kpɑ ɑ n sɑ̃ɑ nge furɔ bɛɛrɛguu

ge gɑ bɑllimɔ nɛ, Gusunɔ wunɛn Yinnin nɔmɑ sɔɔ.

⁴ Bɑ ǹ mɑɑ nun sokumɔ wuu ge nɑ deri.

Bɑ koo nun sokuwɑ nɛ, Yinni Gusunɔn nuku dobu.

Domi wunɛ sɔɔrɑ nɛn nuku dobu wɑ̃ɑ.

Bɑ ǹ mɑɑ wunɛn tem sokumɔ bɑnsu.

Bɑ koo mu sokuwɑ kurɔ kpɑo,

domi kon mu durɔ kɛ̃.

⁵ Nge mɛ bii durɔbu gɑ koo kɑ gen kurɔ gbinnɑ,

nge mɛyɑ wunɛn bibu bɑ koo kɑ nun gbinnɑ.

Nge mɛ ɑluwɑɑsi u rɑ n nuku dobu mɔ win kurɔ kɛ̃ɛron sɔ̃,

nge mɛyɑ ko nɑ n nuku dobu mɔ wunɛn sɔ̃.

⁶ Wunɛ Yerusɑlɛmu,

nɑ derɑ gɑbɑ sɑ̃ɑ nge wuu kɔ̃sobu

be bɑ rɑ n yɔ̃ gbɑ̃rɑru wɔllɔ,

bɑ ǹ nɔɔ mɑrimɔ sɔ̃ɔ sɔɔ kɑ wɔ̃kuru.

Bɛɛ wuu kɔ̃sobu,

bɛɛ be i nɛ, Yinni Gusunɔ Yerusɑlɛmun gɑri yɑɑyɑsiɑmɔ,

i ku wɛ̃rɑ.

⁷ I ku de n wɛ̃rɑ sere n kɑ Yerusɑlɛmu swĩi,

kpɑ yɑ n bɛɛrɛ mɔ hɑnduniɑ sɔɔ.

⁸ Nɛ, Yinni Gusunɔ, nɑ bɔ̃ruɑ kɑ nɛn dɑm, nɑ nɛɛ,

nɑ ǹ mɑɑ wunɛn ɑlikɑmɑ yibɛrɛbɑ wɛ̃ɛmɔ bu di.

Mɛyɑ sɔbu bɑ ǹ mɑɑ wunɛn tɑm nɔrumɔ,

mɛ mu sɑ̃ɑ wunɛn sɔmburun ɑre.

⁹ Adɑmɑ be bɑ ɑlikɑmɑ gɑ̃ bɑ koo ye di,

kpɑ bu nɛ, Yinni Gusunɔ siɑrɑ.

Be bɑ mɑɑ ben resɛmbɑ sɔrɑ

bɑ koo yen tɑm nɔ nɛ, Yinni Gusunɔn sɑ̃ɑ yerɔ.

¹⁰ Bɛɛ Yerusɑlɛmugibu,

i yɑrio sɑɑ wuun di,

i bɛɛn tɔn be bɑ wee swɑɑ sɔnwɑ,

i yen kpenu wunɑ i nɔɔ nɛrɑsiɑ.

I gidi bɔrɑ yɔ̃rɑsio ben berɑ giɑ.

¹¹ Wee ye nɛ, Yinni Gusunɔ, nɑ hɑnduniɑn tɔmbu kpuro sɔ̃ɔmɔ.

Nɑ nɛɛ, i Yerusɑlɛmugibu sɔ̃ɔwɔ i nɛɛ,

wee, nɛ, ben fɑɑbɑ kowo, nɑ sisi

kɑ ben tɔn be bɑ rɑɑ yoru mwɛɛrɑ.

¹² Bɑ koo bu soku bwese te nɑ gɔsɑ nɑ yɑkiɑ.

Wunɛ mɑɑ Yerusɑlɛmu, bɑ ǹ mɑɑ nun sokumɔ wuu ge nɑ deri.

Bɑ koo nun sokuwɑ wuu ge nɑ kĩ.