Yinni Gusunɔn gɔro
kɑ win gɑri
61
1 Yinni Gusunɔn Hunde u kɑ mɑn wɑ̃ɑ.
Domi wiyɑ u mɑn gɔsɑ
n kɑ dɑm sɑrirugibu lɑbɑɑri geɑ nɔɔsiɑ,
kpɑ n be bɑ nuki sɑnkire nukuru yɛmiɑsiɑ,
kpɑ n yobu sɔ̃ mɑ bɑ koo bu yɑkiɑ,
kpɑ n mɑɑ pirisɔmbɑ sɔ̃ mɑ bɑ koo bu kɑrɑ.
2 N kpɑrɑ sɑɑ ye Yinni Gusunɔ u koo tɔmbu durom kuɑ,
n gere sɑɑ ye u koo win yibɛrɛbɑ mɔru kɔsie,
kpɑ n mɑɑ be bɑ gɔɔ sɔ̃ kpuro nukuru yɛmiɑsiɑ.
3 Bɑ gɔɔ sɔ̃ Siɔnin sɔ̃.
Adɑmɑ Gusunɔ u mɑn gɔsɑ
n kɑ ben nuku sɑnkirɑnu gɔsiɑ nuku dobu.
Bɑ ǹ mɑɑ torom wisimɔ wirɔ,
dɑwɑni burɑ bɑ koo bɔke.
Ben wuswɑɑ kun mɑɑ burisinɑmɔ,
yɑ ko n sɑ̃ɑwɑ nge be bɑ gum nubu durorugim sɑwɑgiɑ.
Bɑ koo ben yɑ̃ɑ wɔnwɔnduginu potɑ
bu tɔ̃ɔ bɑkɑ yɑ̃nu sebe.
Sɑɑ ye sɔɔrɑ bɑ ko n sɑ̃ɑ nge dɑ̃ɑ
ni nu Gusunɔn bɛɛrɛ sɔ̃ɔsimɔ,
ǹ kun mɛ nge gbee te tɑ win yiiko sɔ̃ɔsimɔ.
4 Bɑ koo bɑn gurusu seeyɑ,
kpɑ bu wuu si bɑ rɑɑ kɔsukɑ yellu sɔmɛ.
5 Bɛɛ Isirelibɑ, sɔbɑ koo nɑ bɛɛn mi,
bu bɛɛn yɑɑ sɑbenu kpɑrɑ,
kpɑ bu mɑɑ bɛɛ gbee sɔmɑ kuɑ.
6 Adɑmɑ bɑ koo bɛɛn tii sokuwɑ
Yinni Gusunɔn yɑ̃ku kowobu kɑ win sɔm kowobu.
I ko bwese tukunun ɑrumɑni gurɑ,
kpɑ i n kɑ woo kɑnɑmɔ.
7 Yinni Gusunɔ u nɛɛ,
bɑ bɛɛ sekuru doke tɑ kpɑ̃.
Tɔmbɑ bɛɛ yɑ̃ɑtɑm siemɔ,
yen sɔ̃nɑ seku ten ɑyerɔ
i ko n bɑɑ mɔ n kpɑ̃ tɔn ben temɔ,
kpɑ i n wɑ̃ɑ nuku dobu sɔɔ
bi bu ǹ kpeemɔ.
8 Wi, Yinni Gusunɔ, gemɑ u rɑ kɑ̃.
U dɑm dɔrebu kɑ kom kɔ̃sum tusɑ.
U koo win tɔmbu ben ɑre wɛ̃ dee dee,
kpɑ u kɑ bu ɑrukɑwɑni bɔke
ye yɑ ko n wɑ̃ɑ sere kɑ bɑɑdommɑɔ.
9 Bwesenu kpuro nu koo be kɑ ben
bibun bweserun gɑri nɔ,
kpɑ be bɑ bu wɑ kpuro bu giɑ
mɑ wiyɑ u bu domɑru kuɑ.
Siɑrɑbun womu
10 Yinni Gusunɔ sɔɔrɑ
Yerusɑlɛmu koo nuku dobu ko,
kpɑ yen gɔ̃ru gɑ n do win sɔ̃.
Domi wiyɑ u ye fɑɑbɑ kuɑ
u ye gem wɛ̃.
Mɑ win fɑɑbɑ ye kɑ win gem mɛ,
mu sɑ̃ɑ nge burɑ yɑ̃ɑ
ni kurɔ kpɑo kɑ win durɔ bɑ doke.
11 Nge mɛ tem mu rɑ de dĩɑ bweseru tu kpi,
nge mɛyɑ Yinni Gusunɔ u koo win tɔmbu fɑɑbɑ ko
u bu bɛɛrɛ wɛ̃, kpɑ bwesenu kpuro nu ye wɑ.