Gusunɔ u Isirelibɑ sɔ̃ɔwɑ
ye n koo koorɑ
48
1 I swɑɑ dɑkio i nɔ,
Isirelibɑ bɛɛ Yɑkɔbun yɛnugibu,
bɛɛ be i yɑrɑ Yudɑn bweserun di,
wee i bɔ̃rumɔ kɑ nɛ, Gusunɔ Isirelibɑn Yinnin yĩsiru,
mɑ i mɑn nɔɔgiru suemɔ,
ɑdɑmɑ n ǹ mɔ kɑ gem.
2 Bɛɛ be i Yerusɑlɛmun yĩsiru sɔɔwɑ,
mɑ i tɑ̃sɑ nɛ Gusunɔ, Isirelibɑn Yinni sɔɔ,
wi bɑ sokumɔ wɔllu kɑ tem Yinni,
i swɑɑ dɑkio i nɔ.
3 Sɑɑ yellun di, nɑ derɑ bɑ gɑ̃ɑ gbiikinun gɑri geruɑ.
Bɑ yi geruɑ i nuɑ.
Mɑ nɑ derɑ yi koorɑ subɑru sɔɔ.
4 Nɑ yɛ̃ i tɑu, mɑ i wĩiru bɔɔbu,
mɑ bɛɛn sirikɑnɑ dɑm mɔ nge sisu.
5 Yen sɔ̃nɑ nɑ bɛɛ yeni kpuro nɔɔsiɑ sɑɑ yellun di.
Nɑ bɛɛ ye nɔɔsiɑwɑ yu sere tunumɑ,
kpɑ i ku rɑ kɑ gere i nɛɛ,
bɛɛn bũuwɑ u ye koosiɑ.
Ǹ kun mɛ i nɛɛ,
bɛɛn bwɑ̃ɑroku ge i kuɑ kɑ sii gɑndu ǹ kun mɛ kɑ dɑ̃ɑ,
gerɑ gɑ yen woodɑ wɛ̃.
6 I nuɑ ye nɑ rɑɑ geruɑ.
I mɑɑ wɑ ye kpuro yɑ koorɑ.
I ǹ ko i ye wurɑ?
Wee, tɛ̃ nɑ bɛɛ gɑ̃ɑ kpɑɑnu nɔɔsiɑmɔ
ni nu beruɑ i ǹ nu yɛ̃.
7 Tɛ̃rɑ nu koo koorɑ, n ǹ mɔ ni nu rɑɑ koorɑ.
I ǹ dɑɑ nin gɑri nɔɔre mɑ n kun mɔ gisɔ,
kpɑ i ku rɑ kɑ gere i nɛɛ, i rɑɑ nu yɛ̃ kɔ.
8 Wee i ku rɑ mɑn swɑɑ dɑki.
I ku rɑ mɑɑ kɑ̃ bu bɛɛ gɑ̃ɑnu sɔ̃ɔsi,
domi sɑɑ yellun di, bɑ ǹ bɛɛ swɑɑ yɑbe.
Nɑ yɛ̃ mɑ i ko ko nɑɑnɛ sɑribɑ,
domi bu sere bɛɛ mɑ,
bɑ bɛɛ sokɑ be bɑ koo mɑn seesi.
9 Adɑmɑ yèn sɔ̃ nɑ sɑ̃ɑ Gusunɔ,
yen sɔ̃nɑ nɑ nɛn mɔru suresiɑ.
Mɑ nɑ nɛn tii nɛnuɑ nɛn yiikon sɔ̃,
kpɑ n ku rɑ kɑ bɛɛ kpeerɑsiɑ.
10 Nɑ bɛɛn lɑɑkɑri mɛɛrɑ,
ɑdɑmɑ n ǹ mɔ kɑ dɔ̃ɔ
nge mɛ bɑ rɑ sii geesu sɔwe.
Nɑ bɛɛ dokewɑ yibɛrɛbɑn suunu sɔɔ
bu kɑ bɛɛ sɛɛyɑsiɑ nge dɔ̃ɔ boko.
11 Nɛn kĩrun sɔ̃nɑ nɑ ye kuɑ.
Domi nɑ ǹ derimɔ nɛn yĩsiru tu bɛɛrɛ biɑ.
Nɑ ǹ mɑɑ nɛn yiiko goo wɛ̃ɛmɔ.
Wi u koo Yinni Gusunɔn
himbɑ yibiɑ
12 Yinni Gusunɔ u nɛɛ, bɛɛ Isirelibɑ,
bɛɛ be i sɑ̃ɑ Yɑkɔbun bweseru,
bɛɛ be nɑ sokɑ,
i swɑɑ dɑkio i nɔ.
Nɛnɑ nɑ sɑ̃ɑ gbiikoo kɑ dɑ̃ɑko.
13 Nɛnɑ nɑ tem kuɑ,
mɑ nɑ wɔllu tɛriɑ.
Yen bɑɑyeren yĩsirɑ nɑ sokɑ,
mɑ yɑ koorɑ yɑnde.
14 Bɛɛ kpuro i mɛnnɑmɑ, kpɑ i mɑn swɑɑ dɑki.
Nɑ goo mɔ wi nɑ kĩ.
Wiyɑ u koo nɛn kĩru ko u Bɑbiloni wɔri.
Kpɑ u nɔmɑ dɛmiɑ u yen tɔmbu nɛn dɑm sɔ̃ɔsi.
Bɛɛn goo kun yen gɑri gerure.
15 Nɛ, Yinni Gusunɔwɑ nɑ ye geruɑ.
Nɑ nùn sokɑ, u mɑɑ nɑ.
Mɑ nɑ derɑ win swɛɛ kpuro yi nùn kusiɑrɑ.
16 Mɑ Esɑi u nɛɛ,
i susimɑ nɛn bɔkuɔ kpɑ i nɔ.
Sɑɑ yellun di, nɑ bɛɛ ye sɔ̃ɔwɑwɑ kpɑsɑsɑ.
Sɑɑ yen toren diyɑ nɑ wɑ̃ɑ mi.
Wee, tɛ̃ Yinni Gusunɔ u mɑn gɔrimɑ kɑ win Hunde.
Isirelibɑ bɑ̀ n dɑɑ swɑɑ dɑki
17 Wi u sɑ̃ɑ bɛɛ Isirelibɑn Yinni Dɛɛro,
mɑ u bɛɛ yɑkiɑ u nɛɛ,
u rɑ bɛɛ sɔ̃ɔsi ye n ko n bɛɛ ɑrufɑɑni ko,
kpɑ u bɛɛ swɑɑ sɔ̃ɔsi ye yɑ weenɛ i swĩi.
18 Ì n dɑɑ win woodɑbɑ mɛm nɔɔwɑ,
ɑlɑfiɑ yɑ ko n bɛɛ wɑ̃ɑsiwɑ,
nge dɑɑ bɑkɑrun nim mɛ mu rɑ n tɛrie.
19 Bɛɛn bweseru tɑ koo dɑbiɑwɑ
nge yɑni sɛɛri.
Bɛɛn yĩsiru tɑ ǹ mɑɑ gbimɔ win wuswɑɑɔ.
I yɑrio Bɑbilonin di
20 I yɑrio Bɑbilonin di
i yen tɔmbu duki suurio.
I nɑsɑrɑn womusu koowo,
i kpɑrɑ hɑnduniɑn goonu nnɛ sɔɔ i nɛɛ,
wi, Yinni Gusunɔ u bɛɛ Yɑkɔbun bweseru yɑkiɑ,
bɛɛ be i sɑ̃ɑ win sɔm kowobu.
21 Nim nɔru gɑ ǹ bɛɛ mɔ̀
mi u koo bɛɛ kpɑrɑ gbɑburɔ,
domi u koo kperu bɛrɑ
kpɑ nim mu koku i nɔ.
22 Adɑmɑ kɔ̃sɑn kowobu bɑ ǹ bɔri yɛndu wɑsi. Wi, Yinni Gusunɔwɑ u yeni geruɑ.