Yinni Gusunɔ
u koo hɑnduniɑgibu sɛɛyɑsiɑ
24
1 Wee Yinni Gusunɔ u koo tem kpuro kpeerɑsiɑ
mu ko bɑnsu.
U koo mɛn tɔmbu kpuro yɑrinɑsiɑ,
2 yɑ̃ku kowobu kɑ tɔn dirobu,
yinnibu kɑ yobu,
wi u dɔrɑmɔ kɑ wi u dwemɔ,
wi u mɔ bɑ bɔkurɑmɔ kɑ wi u bɔkurɑmɔ,
wìn dibu bɑ nɛni kɑ wi u dibu nɛni.
3 Bɑ koo tem kpuro wɔri,
kpɑ bu mɛn yɑ̃nu gurɑ,
kpɑ mu ko bɑnsu.
Mu ǹ mɑɑ gɑ̃ɑnu kpiisiɑmɔ.
Mɛn tɔmbu bɑ ko n wɑsikirɑmɔ bɑ n gɔɔ dɔɔ.
Mɛn wirugibu bɑ ǹ ko n mɑɑ dɑm mɔ.
5 Domi mɛn tɔmbu bɑ mu disi doke,
bɑ Yinni Gusunɔn woodɑbɑ kɑ win yiirebu yinɑ.
Mɑ bɑ ɑrukɑwɑni nɔru sɑrigiɑ
ye u rɑɑ kɑ bu bɔkuɑ kusiɑ.
6 Yen sɔ̃nɑ bɔ̃ri yi koo tem mɛ di,
kpɑ mɛn tɔmbu bu nɔni sɔ̃ɔrɑ
kɔ̃sɑ ye bɑ kuɑn sɔ̃.
Bɑ koo bu kpeerɑsiɑ.
Be bɑ koo tiɑrɑ bɑ ǹ ko n mɑɑ dɑbi.
7 Ben resɛm gbɑɑnu nu koo gberɑ,
kpɑ ben tɑm durom mu kpe.
Be bɑ rɑɑ nuku dobu mɔ̀,
bɑ koo weeweenu ko.
8 Bɑ ǹ mɑɑ bɑrɑnu kɑ mɔrɔkunu soomɔ,
ni bɑ rɑ kɑ nuku dobu ko.
Nuku dobun kuuki yi koo kpe.
9 Bɑ ǹ mɑɑ tɑm nɔrumɔ bɑ n kɑ womusu koosimɔ.
Tɑm bɔɔbɔm mu koo sosiɑ be bɑ mu nɔrumɔn mi.
10 Wuu ge, gɑ koo ko bɑnsu.
Yɛnusu su ko n wɑ̃ɑ dirisu.
Goo kun mɑɑ duɔ mi.
11 Bɑ ko n weeweenu mɔ̀ swɛɛ sɔɔ,
yèn sɔ̃ tɑm sɑri.
Nuku dobu koo doonɑ ben tem di.
12 Wuu ge, gɑ ko n sɑ̃ɑwɑ bɑnsu,
kpɑ gen duu yenu nu n wɔrukɑ,
13 kpɑ tɔmbu bɑ n kɔ̃ɔkire tiɑ tiɑ tem mɛ sɔɔ,
nge dɑ̃ɑ bii ni nu tiɑrɑ
sɑnɑm mɛ bɑ dɑ̃ru sirɑ,
ǹ kun mɛ nge resɛm ye bɑ kunɔnu mɔ̀.
Bɑ nuku dobu kuɑ kɑm
14 Be Yinni Gusunɔ u koo deri bɑ n wɑsi
bɑ ko n kuuki mɔ̀ kɑ nuku dobu.
Be bɑ wɑ̃ɑ sɔ̃ɔ duu yeru giɑ,
bɑ koo Yinni Gusunɔ tɔmɑ win kpɑ̃ɑrun sɔ̃,
bɑ n mɔ̀,
15 bɛɛ be i wɑ̃ɑ sɔ̃ɔ yɑri yeru giɑ
kɑ be bɑ wɑ̃ɑ nim wɔ̃kun gooru giɑ,
i Gusunɔ Isirelibɑn Yinni bɛɛrɛ wɛ̃ɛyɔ.
16 Sɑ ko nɔ bɑ womusu mɔ̀ bɑɑmɑ
hɑnduniɑn goonu nnɛ sɔɔ
bɑ mɔ̀, i gemgii bɛɛrɛ wɛ̃ɛyɔ.
Adɑmɑ nɛ, kon nɔɔgiru suɑ nɑ n mɔ̀,
gberɑ mɑn di, nɑ kɑm kuɑ,
domi yibɛrɛbɑ bɑ hɑniɑ mɔ̀ bɑ yɑ̃nu gurɑmɔ.
17 Bɛɛ tem mɛn tɔmbu i ko i bɛrum soorɑ
domi bɑ bɛɛ yɛ̃ri kɑ suuri bɛrie,
18 wi u dukɑ mɔ̀ bɛrum sɔ̃,
kpɑ u suurɑ wɔri.
Wi u mɑɑ yɑriɔ suurɑn di,
kpɑ u yinɑ mwɑɑrɑ.
Domi gurɑ bɑkɑ koo kindɑmɑ wɔllun di.
Kpɑ tem kpɛɛkpɛɛku gu diiri.
19 Tem mu koo yĩiri kpɑ mu beu ko,
kpɑ mu bɛsikirɑ.
20 Mu ko n bɑ̃ɑrimɔ nge tɑm nɔro,
kpɑ mu n yĩirumɔ nge kuu te woo gɑ sweemɔ.
Mɛn durum yɑ ko n mu buniɛ,
kpɑ mu wɔrumɑ mu kpɑnɑ mu se.
Bɑnnun kpeeru
21 Sɑɑ ye sɔɔ, Yinni Gusunɔ u koo kperi sɛɛyɑsiɑ wɔllɔ. U koo sinɑmbu sɛɛyɑsiɑ tem mini, 22 kpɑ bu bu yoru mwɑ bu bu tɑɑsi wɔrusɔ nge pirisɔmbɑ. Sɔ̃ɔ dɑbi dɑbirun biru, kpɑ bu bu sɛɛyɑsiɑ.
23 Sɔ̃ɔ kɑ suru bɑ koo sekuru wɑ.
Gusunɔ, wɔllu kɑ tem Yinni,
u ko n win bɑndu diiwɑ Siɔnin guurɔ, Yerusɑlɛmuɔ,
kpɑ win tɔmbun guro gurobu bu win yiiko wɑ.