Yinni Gusunɔ u koo Tiri
kɑ Sidoni kpeerɑsiɑ
23
1 Gɑri wee yi yi kɑ Tiri yɑ̃.
Bɛɛ be i wɑ̃ɑ goo nimkuu bɑkɑsu sɔɔ,
i wuri koowo, domi bɛɛn wuu gɑ kɑm kuɑ.
Yɛnusu kun mɑɑ wɑ̃ɑ, duu yeru mɑɑ sɑri.
Sɑɑ Kitimun tem diyɑ sɑ yen lɑbɑɑri nuɑ.
2 I mɑrio bɛrum sɔ̃,
bɛɛ be i wɑ̃ɑ nim wɔ̃kun gooru giɑ
mi Sidonin tenkubɑ bɑ rɑ sɑre.
3 Egibitigibu bɑ dobi yeemɔ dɑɑ te mɔ̀ Niluɔ
mɑ tenkubɑ bɑ ye dwemɔ bɑ dɔrɑmɔ
mɑ bɑ ɑre bɛkɛ dimɔ.
Mɑ yɑm mi, n kuɑ bwesenu kpuron yɑburu.
4 Sidoni, kɑɑ sekuru wɑ,
domi Tiri, nim wɔ̃kun wuu dɑmguu, gɑ geruɑ gɑ nɛɛ,
gɑ ǹ mɑrubun wɑhɑlɑ gɑɑ wɑɑre, gɑ ǹ mɑɑ mɑrure.
Gɑ ǹ bii ɑluwɑɑsi bɔm kɛ̃ɛre,
gɑ ǹ mɑɑ bii wɔndiɑ seeyɑre.
5 Egibitigibu bɑ̀ n nuɑ mɑ Tiri yɑ wɔrumɑ,
bɑ koo diiri.
6 Bɛɛ be i wɑ̃ɑ nim wɔ̃kun gooru giɑ,
i wuri koowo i kɑ dɑ Tɑɑsisiɔ.
7 Bɛɛn wuu ge gɑ wɑ̃ɑ sɑɑ yellun di
gè sɔɔ i rɑ nuku dobu ko, gerɑ mi?
Tiri yerɑ mi?
Yèn tɔmbu bɑ dɑ bɑ tem tukumgibu kɑmiɑ?
8 Wɑrɑ u ye kpuron himbɑ yi Tirin sɔ̃,
ye, ye yɑ rɑ yen wirugibu swĩi tem tukumɔ.
Yen tenkubɑ bɑ kuɑ sinɑ bibu.
Mɑ bɑ bɛɛrɛ mɔ hɑnduniɑ kpuro sɔɔ.
9 Gusunɔ, wɔllu kɑ tem Yinniwɑ u ye yi,
u kɑ be bɑ tii sue kɑwɑ tem mɛ sɔɔ,
kpɑ bu be bɑ rɑɑ bɛɛrɛ wɛ̃ɛmɔ gɛm.
10 Bɛɛ Tɑɑsisigibu i tɛrio bɛɛn tem sɔɔ
nge mɛ dɑɑ te bɑ mɔ̀ Nilu tɑ̀ n nim yibɑ mu rɑ tɛrie.
Domi yoo sɔmɑ kpɑ.
11 Yinni Gusunɔ u win nɔmɑ dɛmiɑ nim wɔ̃kun berɑ giɑ.
Mɑ u derɑ sinɑmbɑ diirɑ.
U derɑ Kɑnɑnin gbɑ̃rɑ dɑmginu nu wɔrukɑ.
12 U mɑɑ nɛɛ, bɛɛ Sidonigibu i ǹ mɑɑ nuku dobu wɑsi.
Domi bɑ bɛɛ dɑm dɔre nge wɔndiɑ wi u kun durɔ yɛ̃.
Bɑɑ ì n seewɑ i dɑ Kitimun temɔ,
min tii i ǹ wɛ̃rɑbu wɑsi.
13 I Bɑbilonigibu mɛɛrio.
Bɑ ǹ mɑɑ wɑ̃ɑ.
Asirigibu bɑ bu kpeerɑsiɑ.
Nge mɛyɑ bɑ Tiri wɔri bɑ tɑrusi,
bɑ yen sinɑ kpɑɑnu kɔsukɑ,
mɑ ye kpuro yɑ kuɑ bɑnsu.
14 I wuri koowo bɛɛ be i wɑ̃ɑ goo
nimkuu bɑkɑsu sɔɔ.
Domi Tirin wuu dɑmguu ge, gɑ wɔrumɑ.
15 Bɑ koo Tirin gɑri duɑri n kɑ ko wɔ̃ɔ wɑtɑ kɑ wɔkuru nge sinɑ boko turon bɑndun tɛɛbun sɑkɑ. Adɑmɑ yen biru yɑ ko n sɑ̃ɑwɑ nge kurɔ sɑkɑrɑ wi bɑ womu doke bɑ mɔ̀,
16 ɑ mɔrɔku suo ɑ n soomɔ ɑ kɑ wuu sikerenɑ,
wunɛ wi ɑ sɑ̃ɑre kurɔ sɑkɑrɑ wi bɑ duɑri.
A gu soowo nge mɛ wunɛn yɛ̃rɑ nɛ,
ɑ n kɑ womu dɑbi dɑbinu mɔ̀,
kpɑ bu wunɛn gɑri yɑɑyɑ.
17 Wɔ̃ɔ wɑtɑ kɑ wɔku ten biru, Yinni Gusunɔ u koo de Tiri yu mɑɑ wurɑ yen yellun tenkuru sɔɔ te bɑ mɔ̀ kɑ tɑki. Kpɑ yu kɑ hɑnduniɑn tɔmbu kpuro ɑrukɑwɑni bɔke. 18 Adɑmɑ bɑ ǹ yen ɑrumɑni kɑ yen ɑre yi bɑ wɑ kɑ tɑki gurɑmɔ bu mɛnnɑ ben tiin sɔ̃. Bɑ koo ye kpuro Yinni Gusunɔ yiiyɑwɑ kpɑ yɑ n sɑ̃ɑ be bɑ nùn sɑ̃ɑmɔgiɑ, kpɑ bu dĩɑnu wɑ bu di bu debu, kpɑ bu yɑ̃ɑ burɑnu wɑ bu doke.