Bɑbiloni yɑ koo wɔrumɑ
21
1-2 Gɑri yiniwɑ Yinni Gusunɔ u geruɑ Bɑbilonin sɔ̃. U mɑn kɑ̃si nɑnumgiru sɔ̃ɔsi.
Nɑ wɑ yibɛrɛbɑ bɑ wee sɑɑ tem mɛ bɑ nɑsien di
nge mɛ woo gunɑ yɑ rɑ nɛ sɑɑ sɔ̃ɔ yɛ̃sɑn nɔm dwɑru giɑn di.
Wi u rɑ dɑm dɔre, u dɑm dɔrɑmɔ.
Wi u rɑ mɑɑ kpeerɑsie, u kpeerɑsiɑmɔ.
Elɑmun tɑbu kowobu, i seewo.
Mɛdibɑ, i wuu ge tɑrusio.
Domi Yinni Gusunɔ u derɑ Bɑbiloni ye,
yɑ ǹ mɑɑ tɔmbu weeweenu koosimɔ.
3 Ye nɑ wɑ kɑ ye nɑ nuɑ kɑ̃si te sɔɔ,
yɑ derɑ nɛn tororɑ kɑrɑ.
Mɑ wuriribu mɑn wɔri nge tɔn kurɔ wi u yiire u kĩ u mɑ.
Tirerɑbu derɑ nɑ ǹ mɑɑ gɑri nɔɔmɔ.
Mɑ diiribu derɑ nɑ ǹ yɑm wɑɑmɔ.
4 Nɛn lɑɑkɑri yɑ burisinɑ,
mɑ nɑ diirimɔ bɛrum sɔ̃.
Yokɑ yè sɔɔ nɑ nuku dobu yĩiyɔ,
ye sɔɔrɑ bɛrum mɑn deemɑ.
5 Kɑ̃si te sɔɔ, nɑ mɑɑ wɑ bɑ dĩɑnu yii
bɑ kɔnnɔ kɔsu, bɑ dimɔ bɑ nɔrumɔ.
Yerɑ goo u nɛɛ, i seewo tɑbu sinɑmbu,
i bɛɛn tɛrɛnu gum tɛɛni.
6 Mɑ Yinni Gusunɔ u mɑn sɔ̃ɔwɑ u nɛɛ,
n doo n wuu kɔ̃so yi kpɑ u mɑn sɔ̃ ye u koo wɑ.
7 Mɑ nɑ kuɑ mɛ.
Yerɑ u mɑɑsɔbu wɑ bɑ sĩimɔ yiru yiru.
Gɑbu bɑ kɛtɛkunu sɔni, gɑbu mɑɑ yooyoosu.
Mɑ u ye kpuro mɛɛrɑ kɑ lɑɑkɑri.
8 Yerɑ wuu kɔ̃so wi,
u gbɑ̃rɑ nge gbee sunɔ u nɛɛ,
gbɑ̃rɑ kɔnnɔ miyɑ u yɔ̃ sɑɑ kpuro,
sɔ̃ɔ sɔɔ kɑ wɔ̃kuru.
9 Mɑ u mɑɑsɔbu wɑ bɑ sĩimɔ yiru yiru.
Mɑ u wɑ Bɑbiloni yɑ wɔrumɑ birem.
Mɑ bwɑ̃ɑroku ni bɑ kuɑ ben bũnun sɔ̃
nu wɔrukɑ temɔ nu bɔɔkirɑ.
10 Bɛɛ nɛn tɔmbu Isirelibɑ,
bɛɛ be bɑ so nge dobi doo soo yerɔ,
yeniwɑ nɑ nuɑ Gusunɔ bɛɛn Yinnin min di,
wi, wi u sɑ̃ɑ wɔllu kɑ tem Yinni.
Yerɑ nɑ bɛɛ ye nɔɔsiɑmɔ.
Gɑri yi Gusunɔ u geruɑ
Edɔmun sɔ̃
11 Wee ye Yinni Gusunɔ u mɑn sɔ̃ɔsi Edɔmun sɔ̃.
Nɑ nɔɔ gɑgu nuɑ Seirin di gɑ nɛɛ,
wuu kɔ̃so, sɑɑ yerɑ̀ wɔ̃kuru tɑ koo kpe.
12 Mɑ wuu kɔ̃so u wisɑ u nɛɛ,
bururu tɑ koo nɑ, yen biru wɔ̃kuru tɑ koo mɑɑ nɑ.
Ì n kĩ i mɑɑ mɑn gɑri bikiɑ, i wurɑmɑ i bikiɑ.
Gɑri yi Gusunɔ u geruɑ
Dɑɑrububɑn tem sɔ̃
13 Wee ye Yinni Gusunɔ u geruɑ Dɑɑrububɑn tem sɔ̃.
Dedɑnigibu, i doo i n wɑ̃ɑ yɑkɑsu sɔɔ wɔ̃kuru.
14 Bɛɛ be i wɑ̃ɑ Temɑɔ i kɑ be nim nɔru gɑ mɔ̀ nim dɑɑwo,
kpɑ i kɑ kpikobu dĩɑnu dɑɑwɑ.
15 Domi tɑbu swĩɑ mɑ tɔmbɑ duki mɔ̀ tɑkobi kɑ tɛndun sɔ̃.