Sunɔ kpɑo koo yɑri
Dɑfidin bweserun di
11
1 Nge mɛ bɑ̀ n dɑ̃ru burɑ,
ten nuurun di kpii pɔturɑ rɑ yɑri,
nge mɛyɑ goo u koo yɑri u bɑndu di Isɑin bweseru sɔɔ.
2 Gusunɔn Hunde u ko n dɑ n wɑ̃ɑ kɑ wi.
Hunde wi, u koo nùn bwisi kɑ dɑm kɛ̃
u kɑ win tɔmbu kpɑrɑ,
kpɑ u Gusunɔn kĩru giɑ u nùn nɑsiɑ.
3 U koo nùn mɛm nɔɔwɑwɑ kɑ kĩru.
Mɛyɑ u ǹ tɔnu sirimɔ kɑ sɛndɑru,
ǹ kun mɛ, bɑ nɛɛn sɔ̃.
4 U koo sɑ̃ɑrobu siriɑwɑ dee dee,
kpɑ u bwɛ̃ɛbwɛ̃ɛbu ben gem wɛ̃.
Win gɑri yi ko n sɑ̃ɑwɑ nge bokuru
te u koo kɑ tɔmbu sɛɛyɑsiɑ,
kpɑ yi n sɑ̃ɑ nge tɑkobi
ye yɑ koo tɔn kɔ̃sobu go.
5 Win gem kɑ win bɔrɔkinirɑ ko n sɑ̃ɑwɑ
nge kpɑkɑ ye u sɛ̃ke pɔrɑɔ
u n kɑ win tɔmbu kpɑrɑmɔ.
6 Yɛɛ gɔbi kɑ yɑ̃ɑnu nu ko n wɑ̃ɑ yɑm tem,
kpɑ gbeeku musukunu kɑ boo binu nu kpunɑ sɑnnu.
Mɛyɑ mɑɑ gbee sunɔ binu kɑ kɛtɛ binu nu ko n wɑ̃ɑ sɑnnu,
kpɑ bii piibu u nu kpɑrɑ.
7 Kɛtɛbɑ kɑ gbeeku bɔ̃nu nu koo di sɑnnu,
kpɑ nin binu nu n wɑ̃ɑ yɑm tem.
Gbee sinɑnsu su koo yɑkɑsu di nge nɛɛ.
8 Bibu bɑ koo kpĩ bu kɑ surɔkɔnu dwee,
kpɑ bu ben nɔmu kpɛ̃ɛ wɑɑ gɔsɔnun wɔrusɔ.
9 Bɑɑwure u ko n Yinni Gusunɔn yɛ̃ru yibɑwɑ
nge mɛ nim wɔ̃ku gɑ nim yibɑ.
Yen sɔ̃nɑ be bɑ koo dɑ bu Yinni Gusunɔ sɑ̃
win guurɔ te u tii gɔsiɑ Yerusɑlɛmuɔ,
ben goo kun win winsim kɔ̃sɑ kuɑmmɛ.
10 Sɑɑ ye sɔɔ, goo u koo yɑri Isɑin
bweserun di nge dɑ̃ɑ kpii pɔturɑ,
kpɑ u n sɑ̃ɑ nge gidi bɔrɑ bwesenu kpuron sɔ̃.
Bwese ni, nu koo gɔsirɑmɑ win mi.
Kpɑ win wɑ̃ɑ yeru tɑ n Gusunɔn yiiko sɔ̃ɔsi.
Isireli be bɑ rɑɑ yɑrinɛ
bɑ koo wurɑmɑ
11 Sɑɑ ye sɔɔ, Yinni Gusunɔ u koo mɑɑ win dɑm sɔ̃ɔsi
u kɑ win tɔn be bɑ tie yɑkiɑ
be bɑ yɑrinɛ bɑ wɑ̃ɑ Asiriɔ kɑ Egibitiɔ
kɑ Pɑturɔsiɔ kɑ Etiopiɔ
kɑ Elɑmuɔ kɑ Bɑbiloniɔ kɑ Hɑmɑtiɔ Sirin temɔ,
kɑ sere be bɑ wɑ̃ɑ nim wɔ̃kun goonɔ.
12 U koo gidi bɔrɑ girɑ
u kɑ sɔ̃ɔsi mɑ u koo Isirelibɑ mɛnnɑ
be bɑ rɑɑ yoru mwɛɛrɑ,
kpɑ u Yudɑ be bɑ rɑɑ yɑrinɛ hɑnduniɑn goonu nnɛ sɔɔ mɛnnɑ.
13 Efɑrɑimubɑ bɑ ǹ mɑɑ kɑ Yudɑbɑ nisinu mɔ̀.
Yudɑbɑ bɑ ǹ mɑɑ kɑ Efɑrɑimubɑ yibɛrɛ tɛɛru mɔ̀.
14 Bɑ koo mɛnnɑ bu Filisitibɑ wɔriwɑ
sɔ̃ɔ duu yeru giɑ,
kpɑ bu Filisiti be ko ben yobu.
Mɛyɑ bɑ koo mɑɑ mɛnnɑ bu sɔ̃ɔ yɑri yerugibu wɔri.
Bɑ koo Edɔmu kɑ Mɔɑbubɑ dɑm dɔre,
kpɑ bu Amɔnibɑ tɑɑre.
15 Yinni Gusunɔ u koo de Egibitin dɑɑrun nim mu gberɑ.
U koo tu nɔmu dɛmiɛ u wom wure kɑ dɑm,
kpɑ u tu bɔnu ko kɛri nɔɔbɑ yiru,
kpɑ win tɔmbu bu tu tɔburɑ kɑ nɑɑsu.
16 U koo swɑɑ yɑrɑ win tɔn be bɑ tien sɔ̃,
be bɑ wɑ̃ɑ Asiriɔ.
U koo bu swɑɑ yɑrɑ nge mɛ u rɑɑ bu kuɑ
sɑnɑm mɛ u bu yɑrɑ Egibitin di.