12
1 Ǹ n mɛn nɑ, ɑ wunɛn tɑkɑ kowo yɑɑyo wunɛn ɑluwɑɑsirun sɑɑ sɔɔ, nuku sɑnkirɑnun tɔ̃ru tu sere nɑ tè sɔɔ kɑɑ nɛɛ, ɑ ǹ mɑɑ wɑ̃ɑru kĩ. 2 Sɑɑ ye sɔɔ, kɑɑ n wɑ̃ɑ yɑm wɔ̃kuru sɔɔ nge sɑnɑm mɛ suru kɑ sɔ̃ɔ kɑ kperi, ye kpuro yɑ tĩrɑ ǹ kun mɛ nge sɑnɑm mɛ guru wiru tɑ wurɑmɑ gurɑ yɑ̀ n nɑ yɑ kpɑ. 3 Yen tɔ̃ɔ te sɔɔ, kɑɑ n sɑ̃ɑwɑ nge yɛnun kɔ̃so wi u diirimɔ bɛrum sɔ̃ ǹ kun mɛ nge dɑmgii wi u dɑm dwiiyɑ mɑ u yɑ̃ɑrɑ tɔkɔrun sɔ̃ ǹ kun mɛ nge kurɔ be bɑ som nɑmbu yɔ̃rɑ yèn sɔ̃ bɑ ǹ mɑɑ dɑbi ǹ kun mɛ nge kurɔ be bɑ kun kpɛ̃ bu mɑɑ yɑm wɑ sɑɑ fɛnɛntin di. 4 Wunɛn wɑ̃ɑru tɑ ko n sɑ̃ɑwɑ nge gɑmbo ye yɑ kɛnuɑ ǹ kun mɛ nge nɛɛru tèn wɔkinu dwiiyɑ ǹ kun mɛ nge gunɔbu ge gɑ swĩi mɑri ǹ kun mɛ nge womu ge bɑ mɑri. 5 Sɑɑ ye sɔɔ, kɑɑ n bɛrum mɔ̀ ɑ̀ n gunguru yɔɔmɔ kpɑ ɑ n wɑhɑlɑ mɔ̀ ɑ̀ n sĩimɔ. Wunɛn seri yi koo bururɑ nge dɑ̃ɑ wɛ̃su gɑsu. A ǹ mɑɑ kpɛ̃ ɑ yɔ̃ nge twee. Mɛyɑ kpee yɑ̃nun nuburɑ kun mɑɑ wunɛn binɛ seeyɑmɔ. Domi sɔ̃ɔ teeru bɑɑwure u koo dɑ win wɑ̃ɑ yee dɑ̃ɑkirɔ kpɑ wuri yi nɔɔrɑ bɑɑmɑ swɛɛ sɔɔ. 6 Sɑɑ yerɑ wɑ̃ɑru tɑ koo kɑsirɑ nge sii geesun yɔni ǹ kun mɛ tu kɔsirɑ nge boo wurɑguu ǹ kun mɛ nge bwɑ̃ɑru dɑɑrɔ, ǹ kun mɛ tu kɑsirɑ nge dɔkɔ kɑɑru dɔkɔ sɔɔ 7 kpɑ tɔnun tii u wurɑ temɔ mìn di u yɑrɑ kpɑ win hunde yu wurɑ Gusunɔ wi u rɑɑ nùn ye wɛ̃n mi.
8 Wɑɑsu kowo u nɛɛ, gɑ̃ɑnu kpuro nu tubum sɛ̃, nu mɑɑ sɑ̃ɑwɑ biti.
Gɑri yin wii goberu
9 Yen biru, wɑɑsu kowo u ǹ sɑ̃ɑ bwisigii tɔnɑ, u mɑɑ tɔmbu yɛ̃run keu sɔ̃ɔsi. U mɔn dɑbinu swɑɑ dɑki mɑ u nu wɛ̃ɛrɑ, u nu wunɑnɑ doo dookɑ. 10 U kookɑri kuɑ mɑ u gɑri dori wɑ u yoruɑ. Gɑri yi, yi sɑ̃ɑwɑ gɑri gee. 11 Bwisigiin gɑri yi sɑ̃ɑwɑ nge yɑbiri yi yi rɑ tɔnun lɑɑkɑri yɑmiɛ. Mɛyɑ yi mɑɑ sɑ̃ɑ nge sɔretii yi yi yɛ̃ru gɑbe. Yi weewɑ Gusunɔn min di wi u sɑ̃ɑ kpɑro geo. 12 Nɛn bii, ye n tie, yerɑ, ɑ de yi nun bwisi kɛ̃. Bɑ̀ n yin gɑri yorumɔ tirenu sɔɔ, tire ni, nu ǹ ko n geeru mɔ. Keu bɑkɑn kobu bu rɑ mɑɑ wɑsi wɑsirɑsiewɑ.