7
1 Yĩsi geeru tɑ turɑre nubu durorugiɑ kere. Tɔnun gɔɔn tɔ̃ru tɑ win mɑrubugiru kere. 2 N burɑm bo ɑ dɑ yɛnu mi bɑ gɔɔ sɔ̃ ye kɑɑ kɑ dɑ yɛnu mi bɑ tɔ̃ɔ bɑkɑru mɔ̀. Domi gɔɔwɑ u sɑ̃ɑ tɔnun wɑ̃ɑrun nɔru. Mɛyɑ wi u wɑsi, u koo yɑɑyɑ mɑ gɔɔ wee. 3 Nuku sɑnkirɑnu nu yɛ̃ɛsu kere. Domi bɑɑ tɔnun wuswɑɑ yɑ̀ n burisinɛ, kɑ mɛ, u koo kpĩ u n bɔri yɛndu mɔ gɔ̃ruɔ. 4 Bwisigiin gɔ̃ru gɑ rɑ n woowɑ yɛnu mi bɑ gɔɔ sɔ̃. Adɑmɑ gɑri bɔkɔn gɔ̃ru gɑ rɑ n woowɑ yɛnu mi bɑ nuku dobu mɔ̀. 5 N burɑm bo ɑ bwisigiin gerusibu swɑɑ dɑki ye kɑɑ kɑ gɑri bɔkɔn womusu swɑɑ dɑki. 6 Domi gɑri bɔkɔn yɛ̃ɛsu sɑ̃ɑwɑ nge gɑ̃ɑ ni nu kurɑmɔ dɔ̃ɔ sɔɔ. Yɑ mɑɑ sɑ̃ɑ kɑm dirum.
7 Dɑm dɔrebu bu rɑ bwisigii gɔsiewɑ gɑri bɔkɔ. Kɛ̃ru tɑ rɑ mɑɑ tɔnun gɔ̃ru sĩiyɛwɑ. 8 Gɑ̃ɑnun kpeeru tɑ burɑm bo n kere nin torubu. Suurugii u mɑɑ tii suo kere. 9 A ku de wunɛn mɔru yɑ n dɑ fuuku se. Domi gɑri bɔkɔn miyɑ mɔru yɑ rɑ n wɑ̃ɑ. 10 A ku gere ɑ nɛɛ, mbɑn sɔ̃nɑ yellu tɑ tɛ̃ dobu kere. Yeni yɑ ǹ sɑ̃ɑ bwisigiin bikiɑbu. 11 Bwisi yi sɑ̃ɑwɑ tubi geɑ, yi mɑm tubi kere tɔmbu kpuron mi. 12 Yi rɑ tɔnu kɔ̃suwɑ nge mɛ gobi yi rɑ tɔnu kɔ̃su. Adɑmɑ yi ɑrufɑɑni mɔ n kere gobi. Yi rɑ de wi u yi mɔ u n wɑ̃ɑ wɑ̃ɑru sɔɔ.
13 A Gusunɔn nɔmɑn sɔmɑ mɛɛrio. Ye u derɑ yɑ sikire, wɑrɑ u koo kpĩ u ye dɛmiɑ. 14 Doo nɔɔrun sɑɑ sɔɔ, ɑ nuku dobu koowo. Wɑhɑlɑn sɑɑ sɔɔ, kpɑ ɑ bwisiku mɑ Gusunɔwɑ u tɔ̃ɔ ni kpuro kuɑ, kpɑ tɔnu u ku kɑ giɑ ye yɑ koo koorɑ win gɔɔn biru. 15 Ye nɑ wɑ nɛn wɑ̃ɑrun tɔ̃ru sɔɔ n tubum sɛ̃, yerɑ gemgii u rɑ gbi win gem sɔɔ kpɑ tɔn kɔ̃son wɑ̃ɑru tu dɛnyɑ win nuku kɔ̃suru sɔɔ. 16 Ǹ n mɛn nɑ, ɑ ku tii gɑrisi gemgii. A ku mɑɑ sɔ̃ɔsi mɑ wunɑ ɑ bwisi bo. Mbɑn sɔ̃nɑ kɑɑ tii kɑm ko sɛkum. 17 A ku tii sure kɔ̃sɑ sɔɔ, ɑ ku mɑɑ wɔri gɑri bɑkɑ kookoosu sɔɔ. Mbɑn sɔ̃nɑ kɑɑ de ɑ gbi tumɑru. 18 Ye n weenɛ ɑ n yɑɑye kpɑ ɑ ku ye ɑtɑfiiru ko, yerɑ wi u Gusunɔ nɑsie, u rɑ yɑriwɑ kɑri bɑɑyeren di. 19 Bwisi yi rɑ bwisigii dɑm wɛ̃wɑ n kere kpɑrobu wɔkuru be bɑ wɑ̃ɑ wuu teu sɔɔ. 20 Geemɑ, hɑnduniɑ ye sɔɔ, goo sɑri wi u geɑ mɔ̀ kpɑ u kun torɑmɔ. 21 A ku gɑri kpuro dɑsɑbu doke yi tɔmbɑ gerumɔ kpɑ ɑ ku kɑ nɔ wunɛn sɔm kowo u wunɛn kɔ̃sɑ geruɑ. 22 Domi wunɛn gɔ̃ru gɑ koo nun sɔ̃ mɑ wunɛn tii ɑ gɑbu bɔ̃rusire.
23 Nɑ ye kpuro wɛ̃ɛrɑ kɑ bwisi mɑ nɑ nɛɛ, kon ko bwisigii. Adɑmɑ nɑ ǹ bwisi yi wɑ. Yi kɑ mɑn tondɑwɑ. 24 Ye n tomɑ kɑ ye yɑ duku, wɑrɑ u koo ye nɑɑ turi. 25 Nɑ kookɑri kuɑ nɑ tii doke n kɑ bwisi kɑ yɛ̃ru kɑ nuku kɔ̃surun kookoosu kɑ gɑri bɑkɑrun kookoosun sɑriɑ giɑ. 26 Tɔn kurɔ wìn gɔ̃ru gɑ sɑ̃ɑ nge yinɑ, mɑ win nɔmɑ yɑ sɑ̃ɑ nge tɑɑ u gɔɔ sɛ̃sɔ kere. Adɑmɑ tɔn durɔ wìn dɑɑ yɑ Gusunɔ wɛ̃re, u rɑ kurɔ wi kisirɑriwɑ. Durumgiiwɑ u rɑ wɔri kurɔ win nɔmɑɔ. 27 Ye nɛ wɑɑsu kowo nɑ wɑ ye nɑ gɑ̃ɑnu kpuro wɛ̃ɛrɑ tiɑ tiɑ n kɑ nin sɑriɑ giɑ, yerɑ, 28 nɑ tɔn durɔbu nɔrɔbu (1.000) sɔɔ turo wɑ wi bɑ koo bɛɛrɛ wɛ̃. Adɑmɑ tɔn kurɔbu kpuro sɔɔ, bɑɑ turo nɑ ǹ wɑ. N deemɑ nɑ kɑsu n tɛ, ɑdɑmɑ nɑ ǹ wɑ. 29 Ye nɑ tubɑ mi sɔɔ, yerɑ Gusunɔ u tɔmbu kuɑwɑ bɑ sɑ̃ɑ dee dee. Adɑmɑ ben tiiwɑ bɑ ben wɑ̃ɑru sɛ̃siɑsiɑ.