Gusunɔ u rɑ tɔn kɔ̃so deriwɑ u n mɔ̀ ye u kĩ
24
1 Yoobu u mɑɑ nɛɛ,
mbɑn sɔ̃nɑ Gusunɔ Dɑm kpurogii ku rɑ sɑɑ yi u kɑ tɔmbu siri.
Mbɑn sɔ̃nɑ be bɑ nùn mɛm nɔɔwɑmmɛ bɑ ku rɑ sɑɑ ye wɑ.
2 Domi wee, gɑbu bɑ gɑbun tem gbɛnimɔ bɑ kɑ begim mɛnnɑmɔ.
Mɑ gɑbu bɑ yɑ̃ɑnu kpɑre ni bɑ gbɛnɑ.
3 Gɑbɑ mɑɑ gobekubɑn kɛtɛkunu mwɛɛrimɔ.
Mɑ bɑ gɔminibun nɛɛ tɔrubɑ mwɑɑmɔ.
4 Bɑ wɔnwɔndobu dɑm dɔremɔ bɑ girɑmɔ swɑɑn di.
Mɑ sɑ̃ɑrobu bɑ swɑɑ kɑsu bu kuke.
5 Sɑ̃ɑro be, bɑ yɑɑyɑɑre mɔ̀ gbɑburɔ nge gbeeku kɛtɛku,
bɑ dĩɑnu kɑsu bu ben bibu wɛ̃.
6 Be wee bɑ yɑkɑsu gɛ̃ɛmɔ ben yɑɑ sɑbenun sɔ̃,
mɑ bɑ dĩɑnu kunɔnu mɔ̀ tɔn kɔ̃son gberɔ.
7 Adɑmɑ bɑ ǹ bekuru mɔ te bɑ koo wukiri wɔ̃kuru purɑn sɔ̃.
8 Be wee bɑ dɑ bɑ bɑkɑ kpee bɑɑbɑ sɔɔ
yèn sɔ̃ bɑ ǹ wɑ̃ɑ yeru mɔ.
Miyɑ gurɑ bu wɑɑyɑmɔ.
9 Tɔn kɔ̃so wi, u rɑ gobeku mwɛwɑ kɑ dɑm.
Kpɑ u sɑ̃ɑron yɑbe tee te u mɔ tɔrubɑ mwɑ.
10-11 Be wee, bɑ yɔ̃su bɑsi tɔn kɔ̃son kɑrɑ sɔɔ.
Bɑ doo bɔkɑ sɔɔwɑ, mɑ gɔ̃ɔrɑ bu mɔ̀.
Bɑ nùn gum kuɑmmɛ, bɑ resɛm gɑmɑmɔ.
Adɑmɑ bɑ ǹ kɑ̃kɔ bu ye nɔ,
bɑɑ mɛ nim nɔru gɑ bu mɔ̀.
12 Wuu mɑrosɔ gɑbɑ gɔɔ dɔɔ, bɑ wuri mɔ̀.
Be bɑ mɛɛrɑ kuɑ bɑ weeweenu mɔ̀.
Adɑmɑ Gusunɔ kun yen gɑɑ gɑrɑ.
13 Gɑbu bɑ yɑm bururɑm tusɑ.
Bɑ ku rɑ n wɑ̃ɑ mɛ sɔɔ.
Domi bɑ ǹ yɛ̃ mi mu kɑ bu dɔɔ.
14 Tɔn gowo u rɑ sewɑ buru buru yellu
kpɑ u sɑ̃ɑrobu go.
Wɔ̃kuru kpɑ u gbɛni.
15 Yɑm wɔ̃ku bere bererɑ sɑkɑrɑ kowo u rɑ n kɑsu.
U rɑ nɛɛwɑ, goo kun nùn wɑsi.
Kpɑ u win wuswɑɑ sɔnditiɑ wukiri.
16 Yɑm wɔ̃kuru sɔɔrɑ gbɛnɔ u rɑ diɑ kɔsuku.
Sɔ̃ɔ sɔɔ, kpɑ u tii kɛnusi win yɛnuɔ.
U ǹ yɑm bururɑm yɛ̃.
17 Ben mi, bururu tɑ sɑ̃ɑwɑ nge gɔɔn tiro.
Bɑ rɑ n nɑndewɑ.
18 Adɑmɑ bɛɛ i nɛɛ,
tɔn kɔ̃so u sɑ̃ɑ nge nim yɑkɑ.
Bɑ win tem bɔ̃rusi.
U ǹ mɑɑ dɔɔ win resɛm gbɑɑrɔ.
19 Nge mɛ tem mu rɑ nim nɔ gbeburun sɑɑ sɔɔ,
nge mɛyɑ gɔribun wɑ̃ɑ yeru tɑ rɑ durumgii mwɛ.
20 Wi u tɔn kɔ̃so mɑrɑ u rɑ nùn duɑriwɑ.
U koo kowɑ kɔkɔnun dĩɑ geenu.
Tɔmbu kpurowɑ bɑ koo nùn duɑri.
Kpɑ u wɔrumɑ u bɔɔrɑ nge dɑ̃ɑ.
21 Tɔnu win bweseru u rɑ kurɔ wĩron yɑ̃nu gurewɑ.
U ku rɑ gɔmini geɑ gɑɑ kue.
22 Adɑmɑ Gusunɔwɑ u dɑm mɔ u kɑ tɔn kɔ̃so ben wɑ̃ɑru yɔ̃rɑsiɑ.
Ù n bu wɔri, bɑ ku rɑ n mɑɑ yɛ̃ nge bɑ ko n wɑ̃ɑ.
23 Gɑsɔ u rɑ bu yĩiyɔbu wɛ̃,
bɑ n kɑ wɑ̃ɑ bɔri yɛndu sɔɔ.
Adɑmɑ u rɑ n ben sɑnu sɑnusu mɛɛrɑwɑ.
24 Bɑ̀ n kɑ tii yinɑ kpuro, subɑru sɔɔ, bɑ kpɑwɑ.
Bɑ rɑ wɔrumɛwɑ mii mii bu gbi nge tɔn diro.
Kpɑ bɑ n sɑ̃ɑ nge dobi yi bɑ burɑ.
25 Ye nɑ geruɑ mi, geemɑ.
Wɑrɑ u koo mɑn siri,
kpɑ u nɛɛ, nɛn gɑri yi, yi ǹ ɑsɑnsi gɑɑ mɔ.