Yoobu u Sofɑɑ wisɑ u nɛɛ, Gusunɔ sɑ̃ɑwɑ Yinni wɔnwɔndu sɑrigii
12
1 Yoobu u Sofɑɑ wisɑ u nɛɛ,
2 mɛyɑ, bɛɛyɑ i tɔmbun yɛ̃ru kpuro mɔ.
Ì n gu, bwisi kpɑwɑ mi hɑnduniɑɔ.
3 Adɑmɑ nɛn tii nɑ mɑɑ bwisi mɔwɑ mi nge bɛɛ.
I ǹ mɑn bwisi kere.
Wɑrɑ kun yeni kpuro yɛ̃ ye i sɑɑrɑ mi.
4 Bɑɑ mɛ nɑ Gusunɔ kɑnɑ, u mɑn wisɑ,
nɛn kpɑɑsibɑ mɑn yɑɑkoru mɔ̀.
Bɑɑ mɛ nɑ ǹ tɑɑrɛ gɑɑ mɔ,
nɛn bɔrɔbɑ bɑ mɑn yɛ̃ɛmɔ.
5 Be bɑ wɑ̃ɑ bɔri yɛndu sɔɔ,
bɑ rɑ n wɔnwɔndobu kɑ be bɑ sɛllɑmɔ gɛmɑwɑ.
6 Gbɛnɔbun yɛnu gɑ rɑ n wɑ̃ɑ ɑlɑfiɑ sɔɔ.
Be bɑ Gusunɔ seesimɔ, bɑ rɑ n wɑ̃ɑ bɔri yɛndu sɔɔ.
Bɑ rɑ n ben tiin dɑm sɑ̃ɑmɔ.
7 A yɛɛ kɑ gunɔsu bikio, su koo nun sɔ̃.
8 A tem bikio, mu koo nun bwisi kɛ̃.
A de swɛ̃ɛ yi nun sɑɑriɑ.
9 Tɑkɑ koorɑ ye kpuro sɔɔ,
yen yerɑ̀ yɑ ǹ yɛ̃ mɑ Yinni Gusunɔwɑ u ye kpuro mɔ̀.
10 Wiyɑ u tɑkɑ koorɑ kpuro
kɑ hunde koni bɑɑyere kpuron wɑ̃ɑru nɛni.
11 Yen sɔ̃nɑ bɑ mɔndu kuɑ bɑ nɛɛ,
soowɑ gɑ rɑ gɑrin dobu wunɑnɛ,
kpɑ dɑro gu mɑɑ dĩɑnun dobu wunɑnɑ.
12 Wi u tɔkɔ kuɑ u rɑ n yɛ̃ru mɔ.
Wi u mɑɑ hunde dɛnyɑ u rɑ n bwisi mɔ.
13 Adɑmɑ Yinni Gusunɔwɑ u bwisi
kɑ lɑɑkɑri kɑ dɑm kpuro mɔ.
14 Ye u sɑnkɑ kpuro, goo kun kpɛ̃ u ye sɔmɛ.
Wi u mɑɑ mwɑ u pirisɔm doke, goo kun kpɛ̃ u yɛ̃ro yɑrɑ.
15 Ù n gurɑ yɔ̃rɑsiɑ, kpuro rɑ gberewɑ.
Ù n mɑɑ ye yɔ̃su, kpɑ tem mu sɑnkirɑ.
16 Wiyɑ u dɑm kɑ lɑɑkɑri mɔ.
Wiyɑ u mɑɑ tɔnu mɔ wi u torɑ kɑ wi u win winsim torɑsiɑ.
17 U rɑ be bɑ rɑ tem wunɑnɔsu ko mwɛɛri tereru.
Kpɑ u de siri kowobu bu gɔsiɑ wiirobu.
18 U rɑ sinɑmbu bɑndu yɑre,
kpɑ u bu ko yobu.
19 U rɑ yɑ̃ku kowobu mwɛɛri tereru,
kpɑ u ben dɑmgibu suriri.
20 U rɑ bèn nɔɔn gɑri bɑ rɑ nɑɑnɛ ko dɛre u kɔ̃,
kpɑ u durɔ tɔkɔnun lɑɑkɑri kpeerɑsiɑ.
21 U rɑ wirugibu sekuru doke,
kpɑ u sinɑmbun dɑm buɑ.
22 U rɑ ye yɑ beruɑ yɑm wɔ̃kuru sɔɔ kpuro terɑsie,
kpɑ u de yɑm bururɑm mu sɔ̃ɔsirɑ mi yɑm wɔ̃kurɑ rɑɑ wɑ̃ɑ.
23 Wiyɑ u rɑ bwesenu dɑbiɑsie,
kpɑ u mɑɑ nu kpeerɑsiɑ.
Wiyɑ u rɑ de nu tɛriɑ, kpɑ u mɑɑ nu kɑwɑ.
24 U rɑ bwesenun wirugibun bwisi wunɛ,
kpɑ u de bɑ n bɔsu gbɑburɔ, mi swɑɑ sɑri.
25 U rɑ de bɑ n bɑbi yɑm wɔ̃kuru sɔɔ,
kpɑ u de bɑ n bɔsu nge be tɑm mu goomɔ.