Sofɑɑ u Yoobu wisɑ u nɛɛ, u wurɑmɑ Gusunɔn mi
11
1 Sofɑɑ Nɑɑmɑgii u Yoobu wisɑ u nɛɛ,
2 ɑ tɑmɑɑ wunɛn gɑri dɑbi nini kpuro nu ǹ koo wisibu wɑ?
A tɑmɑɑ tɔnu u ko n sɑ̃ɑ gemgii win gɑri yɛ̃run sɔ̃?
3 Wunɛn gɑri sɑɑri nini nu koo de tɔmbɑ kun nun gɑ̃ɑnu wisɑ?
Kɑɑ yɑɑko gɑri gere goo u kun nun tɑɑrɛ wɛ̃?
4 A geruɑ ɑ nɛɛ, ye ɑ geruɑ kpuro yɑ rɑ n sɑ̃ɑwɑ gem,
ɑ mɑɑ dɛɛre Gusunɔn wuswɑɑɔ.
5 Nɑ rɑ n kĩwɑ Gusunɔ u nɔɔ wukiɑ,
kpɑ u nun wisi.
6 U nun win bwisi bɛkɛn ɑsiri sɔ̃ɔsi,
kpɑ ɑ giɑ mɑ u ku rɑ nun sɛɛyɑsie nge mɛ̀n nɔɔ wunɛn torɑnu nɛ.
7 A tɑmɑɑ kɑɑ kpĩ ɑ Gusunɔn bwisikunu tubu?
A tɑmɑɑ kɑɑ kpĩ ɑ wi, Dɑm kpurogii giɑ mɑm mɑm?
8 Win yɛ̃ru tɑ wɔllu gunum kere.
Ǹ n mɛn nɑ, mbɑ kɑɑ ko.
Tɑ mɑɑ gɔribun wɑ̃ɑ yeru dukum kere.
Ǹ n mɛn nɑ, mbɑ kɑɑ tubu mi.
9 Tɑ tem kpɑ̃ɑru kere,
tɑ mɑɑ nim wɔ̃ku yɑsum kere.
10 Gusunɔ ù n sɑrɔ,
mɑ u tɔn kɔ̃so mwɑ u kɑ dɑ siri yerɔ,
wɑrɑ u koo nùn ye yinɑri.
11 Domi u tɔnu kɑm yɛ̃.
U rɑ mɑɑ tɔn kɔ̃sobu tubu mii mii.
12 Adɑmɑ tɔnu u rɑ bwisikuwɑ nge gɑri bɔkɔ,
domi bɑ nùn mɑrɑwɑ nge kɛtɛku gbeekun buu.
13 Yen sɔ̃, wunɛ, ɑ wunɛn gɔ̃ru wesio Yinni Gusunɔn mi giɑ.
Kpɑ ɑ nɔmɑ yiiyɑ ɑ nùn kɑnɑ.
14 A kɔ̃sɑ derio,
kpɑ yɑ kun mɑɑ wɑ̃ɑ wunɛn yɛnuɔ.
15 Sɑɑ ye sɔɔrɑ kɑɑ wiru seeyɑ ɑ n dɛɛre.
Kɑɑ n tɑ̃sɑ, kpɑ ɑ kun mɑɑ gɑ̃ɑnun bɛrum mɔ.
16 A ǹ mɑɑ wunɛn wɑhɑlɑ yeni yɑɑyɑmɔ,
yɑ koo doonɑwɑ nge nim mɛ mu kokɑ.
17 Wunɛn wɑ̃ɑrɑ koo wurɑmɑwɑ
nge sɔ̃ɔ wii wɔllun sɔ̃ɔ.
Kpɑ yɑm wɔ̃ku te tɑ rɑɑ nun wɑ̃ɑsi, tu gɔsiɑ yɑm bururɑm.
18 Kɑɑ n sɔ̃ kɑ toro sindu domi kɑɑ n yĩiyɔbu mɔ.
Kpuro koo nun koorɑ dee dee kpɑ ɑ wɛ̃rɑ bɔri yɛndu sɔɔ.
19 À n kpĩ, goo kun nun bɑɑsimɔ.
Tɔmbu kpuro bɑ koo wunɛn nɔnu geu kɑsu.
20 Adɑmɑ tɔn kɔ̃sobu bɑ koo nɔni swɑ̃ɑru wɑ.
Bɑ ǹ kuku yeru wɑsi.
Gɔɔ bɑɑsi, bɑ ǹ ko n mɑɑ gɑ̃ɑnu gɑnu yĩiyɔ.