Yoobu u weeweenu mɔ̀
3
3 bɔ̃rurɑrɑ tɔ̃ɔ tè sɔɔ bɑ mɑn mɑrɑ.
Bɔ̃rurɑrɑ wɔ̃ku tè sɔɔ bɑ nɛn gurɑ suɑ.
4 Yen tɔ̃ɔ te, tu ko yɑm wɔ̃kuru mɑm mɑm.
Gusunɔ u ku mɑɑ ten gɑri ko wɔllu mi.
U ku de yɑm bururɑm mu mɑɑ koorɑ te sɔɔ.
5 Gɔribun wɑ̃ɑ yerun yɑm wɔ̃ku bɑkɑru tu tu wukiri,
kpɑ guru wiru tɑ n tu wukiri.
Yen dɔmɑ te, suru kɑ sɔ̃ɔ bu mwɑɑnɑ kpɑ bɛrum mu n wɑ̃ɑ tem sɔɔ.
6 Gusunɔ u de wɔ̃ku te, tu tĩrɑ n bɑndɑ.
U ku mɑɑ tu gɑrisi wɔ̃ɔn tɔ̃nu sɔɔ.
U ku mɑɑ tu gɑrisi surun sɔ̃ɔ sɔɔ.
7 U de tɔ̃ɔ te, tɑ n sɑ̃ɑ tɔ̃ɔ bɑrukɑ sɑrirugiru,
kpɑ goo u ku rɑɑ nuku dobu ko te sɔɔ.
8 Sɔrobu bu tɔ̃ɔ te bɔ̃rusio.
Be bɑ wɑɑ bɑkɑn dweebu yɛ̃ bu tu bɔ̃rusio.
9 Kperi yi yi koo yɑri tɔ̃ɔ ten yokɑ yi ku bɑlli.
Tɑ̀ n yɑm bururɑm yĩiyɔ, tu mu biɑ.
Tu ku mɑɑ buruku sɔ̃ɔ wɑ.
10 Domi tɑ ǹ nɛn mɛron nukuru yinɑsie.
Tɑ derɑwɑ bɑ mɑn mɑrɑ n kɑ wɑhɑlɑ yeni wɑ.
11 Mbɑn sɔ̃nɑ nɑ ǹ gu nɛn mɛron nukurɔ.
Mbɑn sɔ̃nɑ nɑ ǹ gu sɑnɑm mɛ bɑ mɑn mɑrumɔ.
12 Mbɑn sɔ̃nɑ nɛn mɛro u mɑn mɑrɑ u tɑɑru swĩi.
Mbɑn sɔ̃nɑ u mɑn nɔɔri u bom kɑ̃.
13 Nɑ̀ n dɑɑ gu dɔmɑ te, nɑ ko n dɑɑ kpĩwɑ,
kpɑ nɑ n dò nɑ n wɛ̃re,
14 nge sinɑmbu kɑ ben bwisi kɛ̃ɔ be bɑ tii sinɑ kpɑɑnu bɑniɑ tem mɛ sɔɔ mɑ nu kuɑ bɑnsu.
15 Mɛyɑ nɑ ko n wɛ̃re nge sinɑ bii be bɑ ben diɑ wurɑ kɑ sii geesu yibiɑ,
mɑ bɑ gu.
16 Ǹ kun mɛ, nɑ n wɛ̃re nge bii wìn nukuru bɑ yɑrɑ,
ǹ kun mɛ, nge bii wi bɑ mɑrɑ mɑ u yɑnde gu u ǹ sɔ̃ɔ wɑ.
17 Nɑ ko n wɑ̃ɑ gɔriɔ mi tɔn kɔ̃sobun tii bɑ wɛ̃re,
kɑ sere mi be bɑ wɑsirɑ bɑ ǹ mɑɑ dɑm mɔ bɑ wɑ̃ɑ bɑ wɛ̃re.
18 Miyɑ pirisɔmbɑ bɑ wɛ̃re,
bɑ ǹ mɑɑ be bɑ bu dɑm dɔremɔn nɔɔ nɔɔmɔ.
19 Dɑmgibu kɑ bwɛ̃ɛbwɛ̃ɛbu bɑ wɑ̃ɑ mi sɑnnu.
Yobu bɑ̀ n dɑ mi, bɑ rɑ yɑkiɑrewɑ sɑɑ ben yinnin min di.
20 Mbɑn sɔ̃nɑ Yinni Gusunɔ u rɑ de tɔnu wi u wɑhɑlɑ mɔ̀ u yɑm sɑ̃reru wɑ.
Mbɑn sɔ̃nɑ u rɑ de wi u nuki sɑnkire u n wɑ̃ɑ.
21 Domi tɔn ben bweserɑ bɑ gɔɔ kĩ, ɑdɑmɑ bɑ ǹ nùn wɑsi.
Bɑ gɔɔ win binɛ mɔ n kere dukiɑ.
22 Bɑ ku rɑ n nuku dobu mɔ sere bɑ̀ n ben siki wɔru wɑ.
23 Adɑmɑ nɑ sɑ̃ɑwɑ wi u kun yɛ̃ mi u dɔɔ,
mɑ Yinni Gusunɔ u nɛn swɑɑ kɛnusi u kɑ sikerenɑ.
24 Weeweenun sɑɑbu, nɑ ku rɑ di.
Nɛn wuri kun nɔru mɔ nge nim mɛ mu kokumɔ.
25 Yèn bɛrum nɑ mɔ̀, yerɑ yɑ rɑ mɑn deemɛ.
Ye nɑ mɑɑ nɑsie, yerɑ yɑ rɑ mɑn wɔri.
26 Wee, nɑ ǹ wɑ̃ɑ sɛ̃ɛ, nɑ ǹ mɑɑ wɛ̃re.
Nɑ ǹ bɔri yɛndu mɔ, mɑ nɑ rɑ n burisinɛ.