Yuubɑ bɑ Yerusɑlɛmun
gbɑ̃rɑrun bɑnɑ seewɑ
3
1 Yerɑ yɑ̃ku kowo tɔnwero Eliɑsibu u seewɑ kɑ yɑ̃ku kowo be bɑ tie, bɑ kɔnnɔ ge bɑ mɔ̀ Yɑ̃ɑnun gɑni seeyɑ. Mɑ bɑ yi sɑ̃rɑsiɑ bɑ yi nɛnɛm kɑ yɑ̃ku yɑ̃ki. Yen biruwɑ bɑ yen gɑmbobɑ doke. Sɑɑ min di, bɑ mɑɑ gbɑ̃rɑru sɔnwɑ Mɛɑn kɔ̃su yerun di sere n kɑ girɑri kɔ̃su yee te bɑ mɔ̀ Hɑnɑnɛɛliɔ. Mɑ bɑ mɑɑ ten tii sɑ̃rɑsiɑ. 2 Yerɑ Yerikogibu kɑ Sɑkuri Imirin bii bɑ sɔmburu kuɑ Eliɑsibun bɔkuɔ. 3 Senɑɑgibu bɑ bu somi bɑ kɑ kɔnnɔ ge bɑ mɔ̀ Swɛ̃ɛ bɑnɑ. Bɑ gen kɑdiribɑ kuɑ kɑ gen kɔkɔrɔbɑ. Mɑ bɑ ye kpuro doke gɑmbo ye sɔɔ. 4 Ben bɔkuɔ Mɛremɔtu, Urin bii, Hɑkɔtun debubu, u mɑɑ somi sɔmbu te sɔɔ. Ben bɔkuɔ mɑɑ Mɛsulɑmu, Berekiɑn bii, Mɛsesɑbɛlin debubu u mɑɑ somi sɔmbu te sɔɔ. Ben bɔkuɔ, Sɑdɔku, Bɑɑnɑn bii u mɑɑ somi sɔmbu te sɔɔ. 5 Ben bɔkuɔ, Tekoɑgibu bɑ mɑɑ nɑ bu kɑ somi sɔmbu te sɔɔ. Adɑmɑ ben wirugibɑ yinɑ bu sɔmbu ten kpɑrobu wiru kpĩiyɑ.
6 Yoyɑdɑ Pɑseɑkin bii kɑ Mɛsulɑmu Besodiɑn bii bɑ kɔnnɔ ge bɑ mɔ̀ Yesɑnɑ sɔnwɑ bɑ bɑnɑ. Bɑ gen kɑdiribɑ kuɑ kɑ gen kɔkɔrɔbɑ kɑ sere mɑɑ gen sɛ̃retii. 7 Be bɑ mɑɑ sɔmburu kuɑ ben bɔkuɔ be wee, Mɛlɑtiɑ Gɑbɑonigii kɑ Yɑdoni Mɛronɔtugii kɑ Gɑbɑonigibu kɑ Misipɑgibu. Beyɑ bɑ bɑnɑ n kɑ girɑri tem yɛ̃ron dirɔ wi Bɑbilonin sinɑ boko u yi mi. 8 Ben bɔkuɔ be bɑ mɑɑ somi wee, Usiɛli, Hɑrɑyɑn bii wi u sɑ̃ɑ wurɑn sɔm kowobun turo kɑ Hɑnɑniɑ wi u sɑ̃ɑ turɑre kowobun turo. Bɑ ben sɔmburu kuɑ bɑ kɑ dɑ sere mi Yerusɑlɛmun gbɑ̃rɑru tɑ yɑsum sosi. 9 Ben bɔkuɔ Refɑyɑ, Hurin bii wi u sɑ̃ɑ Yerusɑlɛmun bee tiɑn kpɑro u mɑɑ somi sɔmbu te sɔɔ. 10 Benin bɔkuɔ mɑɑ, Yedɑyɑ, Hɑrumɑfun bii u gbɑ̃rɑru sɔnwɑ u bɑnɑ te tɑ wɑ̃ɑ win yɛnun dee deeru. Yen biru Hɑtusi, Hɑsɑniɑn bii u bɑnɑ u swɛɛsi. 11 Mɑɑkiyɑ, Hɑrimun bii kɑ Hɑsubu, Pɑsɑti Mɔɑbun bii bɑ mɑɑ gbɑ̃rɑ ten gɑm sɔnwɑ kɑ kɔ̃su yee te bɑ mɔ̀ Pɛ̃ɛn dɔ̃ɔ sɔ̃ru yeru. 12 Benin bɔkuɔ Sɑlumu, Hɑlosɛsin bii wi u Yerusɑlɛmun wɔɔ beri tiɑ kpɑre u mɑɑ somi kɑ win bii wɔndiɑbɑ. 13 Hɑnuni kɑ Sɑnɔɑgibu bɑ kɔnnɔ ge gɑ wɑ̃ɑ wɔwɑ giɑ sɔnwɑ bɑ gu bɑnɑ bɑ gen kɑdiribɑ kɑ gen kɔkɔrɔbɑ kɑ gen sɛ̃retii doke. Mi bɑ bɑnɑ mi, n kuɑwɑ gɔm soonu nɔrɔbu (1.000) bɑ kɑ girɑri kɔnnɔ gèn min di bɑ rɑ kubɑnu yɑri. 14 Mɑɑkiyɑ Rekɑbun bii wi u sɑ̃ɑ Bɛti Hɑkerɛmun berɑn tem yɛ̃ro u kɔnnɔ gèn min di bɑ rɑ kubɑnu yɑri sɔnwɑ. Mɑ u gen kɑdiribɑ kuɑ u doke kɑ gen kɔkɔrɔbɑ kɑ sere mɑɑ gen sɛ̃retii.
15 Sɑluni, Kolohose Hoseen bii, Misipɑn tem yɛ̃ro u kɔnnɔ gèn mi giɑ bwiɑ wɑ̃ɑ sɔnwɑ u gen kɑdiribɑ kuɑ kɑ gen kɔkɔrɔbɑ kɑ gen sɛ̃retii. Yen biru u Siloen yɛrun gɑnɑ bɑnɑ u kɑ nɑ sere sinɑ bokon sɑɑdiɛ̃n gɑnɑn bɔkuɔ kɑ yɔɔtiɑ ye bɑ kuɑ bɑ rɑ kɑ de sinɑ boko Dɑfidin wuu giɑ. 16 Win bɔkuɔ Nɛɛmi Asibukun bii, wi u Bɛti Surin bee tiɑ kpɑre u gbɑ̃rɑru sɔnwɑ u kɑ dɑ sere Dɑfidi kɑ wigibun siku yerɔ kɑ mi bɑ bwii gbɑ kɑ sere mi tɑbu durɔbun dirɑ wɑ̃ɑ. 17 Win bɔkuɔ Lefibɑn bweseru tɑ mɑɑ bɑnɑ sɑɑ min di. Wi u sɑ̃ɑ ben wirugii wiyɑ Rehumu, Bɑnin bii. Yen biru Hɑsɑbiɑ wi u sɑ̃ɑ Keilɑn bee tiɑn kpɑro u mɑɑ sɔnwɑ ye yɑ wɑ̃ɑ win berɑ giɑ. 18 Ben bɔkuɔ win mɛro bisibu bɑ mɑɑ suɑ min di. Wi u bu kpɑre wiyɑ Bɑfɑi, Henɑdɑdin bii. Wiyɑ u mɑɑ Keilɑn berɑ ye yɑ tie kpɑre. 19 Ben bɔkuɔ Esɛɛ, Yosuen bii, Misipɑn sunɔ u mɑɑ suɑ min di u kɑ dɑ sere mi bɑ rɑ tɑbu yɑ̃nu bere gbɑ̃rɑrun goo gɔmkirɔ. 20 Win bɔkuɔ Bɑruku, Sɑbɑin bii u mɑɑ suɑ min di u bɑnɑ sɑɑ goo gɔmkii ten min di n kɑ girɑri yɑ̃ku kowo tɔnwero Eliɑsibun dii kɔnnɔwɔ. U sɔmbu te kuɑ kɑ kĩru. 21 Sɑɑ min di, Mɛremɔtu, Urin bii, Hɑkɔtun debubuwɑ u mɑɑ bɑnɑ sɑɑ Eliɑsibun dirun kɔnnɔn di sere kɑ dii ten berɑ giɔ.
22 Win bɔkuɔ yɑ̃ku kowo be bɑ wɑ̃ɑ Yerusɑlɛmun bɑru kpɑɑnɔ bɑ mɑɑ begiɑ bɑnɑ. 23 Ben bɔkuɔ Bɛnyɑmɛɛ kɑ Hɑsubu bɑ mɑɑ sɔnwɑ bɑ bɑnɑ ben diɑn dee deeru. Mɑ Asɑriɑ Mɑɑseyɑn bii, Anɑniɑn debubu u mɑɑ bɑnɑ win dirun bɔkuɔ. 24 Ben bɔkuɔ Binui, Henɑdɑdin bii u mɑɑ bɑnɑ sɑɑ Asɑriɑn dirun di sere kɑ gbɑ̃rɑ ten goo gɔmkirɔ. 25 Pɑlɑ, Usɑin biiwɑ u mɑɑ sɔnwɑ goo gɔmkii ten dee deerun di n kɑ dɑ wuu kɔ̃sobun dirɔ te tɑ sinɑ kpɑɑru mɛɛrɑ pirisɔm dirun bɔkuɔ. Min diyɑ Pedɑyɑ, Pɑreɔsin bii u mɑɑ sɔnwɑ. 26 Nɛtini be bɑ wɑ̃ɑ gungunɔ bɑ mɑɑ sɔnwɑ bɑ bɑnɑ bɑ kɑ dɑ kɔnnɔwɔ ge gɑ wɑ̃ɑ nim giɑ sɔ̃ɔ yɑri yeru giɑ wuu kɔ̃sobun dirun dee deeru. 27 Ben bɔkuɔ Tekoɑgibu bɑ mɑɑ sɔnwɑ bɑ bɑnɑ wuu kɔ̃sobun dii bɑkɑrun dee deerun di n kɑ dɑ gɑnɑ ye yɑ wɑ̃ɑ gungurɔ.
28 Kɔnnɔ gèn min di dumi rɑ kɑ du, yɑ̃ku kowo ben bɑɑwurewɑ u mi sɔnwɑ u bɑnɑ win dirun dee deeru. 29 Ben bɔkuɔ Sɑdɔku, Imɛrin bii u sɔnwɑ u bɑnɑ win dirun dee deeru. Mɑ Semɑyɑ, Sekɑniɑn bii wi u sɑ̃ɑ kɔnnɔ ge gɑ wɑ̃ɑ sɔ̃ɔ yɑri yeru giɑn kɔ̃so u mɑɑ sɔnwɑ u bɑnɑ. 30 Win bɔkuɔ Hɑnɑniɑ, Selemiɑn bii kɑ Hɑnuni, Sɑlɑfun bii nɔɔbɑ tiɑse be, bɑ mɑɑ seewɑ bɑ gbɑ̃rɑ ten gɑm sɔnwɑ. Mɑ Mɛsulɑmu, Berekiɑn bii u mɑɑ sɔnwɑ win dirun dee deeru. 31 Win bɔkuɔ Mɑɑkiyɑ wurɑn sɔm kowobun turo u mɑɑ sɔnwɑ u kɑ dɑ Nɛtinibɑ kɑ tenkubɑn yɛnusɔ Mifukɑdin kɔnnɔn dee deeru sere kɑ dii tɛɛrɑ ye yɑ wɑ̃ɑ gbɑ̃rɑrun goo gɔmkirɔ. 32 Wurɑn sɔm kowo be, kɑ tenku be, bɑ mɑɑ sɔnwɑ dii tɛɛrɑ yen min di sere n kɑ dɑ kɔnnɔwɔ ge bɑ mɔ̀ Yɑ̃ɑnu.
Yibɛrɛbɑ
bɑ kĩ bu sɔmbu te yɔ̃rɑsiɑ
33 Sɑnɑm mɛ Sɑmbɑlɑ kɑ wigibu bɑ nuɑ mɑ bɛsɛ Yuubɑ sɑ gbɑ̃rɑ te bɑnimɔ, yerɑ bɑ mɔru seewɑ kɑ dɑm. 34 Mɑ bɑ sun yɑɑkoru mɔ̀ Sɑmɑrin tɑbu kowobun wuswɑɑɔ bɑ mɔ̀, mbɑ Yuu wɔnwɔndo beni bɑ mɔ̀. Sɑ ko bu deriwɑ bu ben sɔmbu te ko? Sɑ ko bu deriwɑ bu Gusunɔ ben Yinni yɑ̃kuru kuɑ? Sɑ ko wurɑ bu sɔmbu te wiru go? Sɑ ko wurɑwɑ bu mɑɑ bɑn si seeyɑ sìn kpenu dɔ̃ɔ mwɑɑkirɑ kpuro mi?
35 Tobiyɑ wi u sɑ̃ɑ Amɔni u wɑ̃ɑ win bɔkuɔ. Mɑ u nɛɛ, bɑnɑ yeren bweserɑ bɑ mɔ̀ mɛ. Gɑnɑ ye dɛmɑku gɑ̀ n yɔɔwɑ yɑ koo wɔrumɑ mi?
36 Yerɑ nɛ Nɛɛmi nɑ nɔɔgiru suɑ nɑ nɛɛ, Gusunɔ bɛsɛn Yinni, ɑ swɑɑ dɑkio ɑ nɔ nge mɛ bɛsɛn yibɛrɛbɑ bɑ sun yɑɑkoru mɔ̀. A de ben yɑɑko ten ɑre yi wɔri ben wiru wɔllɔ. A de bu ben yɑ̃nu gurɑ bu bu yoru mwɛɛri bu kɑ dɑ tem tukumɔ. 37 A ku bu ben durum wɔkɑ, domi bɑ sun wɔnwɑ gbɑ̃rɑ te sɑ bɑnimɔn sɔ̃.
38 Nge mɛyɑ sɑ kɑ gbɑ̃rɑ te kpuro bɑnɑ sere ten gunum bɔnun sɑkɑ. Be bɑ sɔmbu te kuɑ, bɑ tu kuɑwɑ kɑ nuku tiɑ.