Nɛɛmi 2

Aɑtɑsɛsi u wurɑ

Nɛɛmi u gɔsirɑ Yerusɑlɛmuɔ

¹ Ye Aɑtɑsɛsi u kuɑ wɔ̃ɔ yɛndu bɑndu sɔɔ, wɔ̃ɔn suru gbiikoon tɔ̃ru gɑru, u sɔ̃ u dimɔ, mɑ nɑ tɑm suɑ nɑ nùn wɛ̃. Adɑmɑ sɑɑ ye sɔɔ, nɑ nuki sɑnkire too. Nɑ ǹ nuki sɑnkirɑre nge mɛ. ² Yerɑ sinɑ boko u mɑn bikiɑ u nɛɛ, ɑmɔnɑ nɛn wuswɑɑ yɑ kɑ burisinɛ mɛ. Nɑ bɑrɔwɑ? Nuku sɑnkirɑ nirɑ̀ nɑ mɔ mɛ.

Yerɑ nɑ nɑndɑ too. ³ Adɑmɑ kɑ mɛ, nɑ kpĩɑ nɑ nùn sɔ̃ɔwɑ nɑ nɛɛ, yinni, wunɛn wɑ̃ɑru tu dɑkɑɑ dɑ. Nɑ ǹ kpɛ̃ nɑ kun nuki sɑnkire. Domi wuu gèn mi bɑ nɛn sikɑdobɑ sikɑ gɑ kuɑ bɑnsu. Mɑ gen gbɑ̃rɑrun gɑmbobɑ bɑ dɔ̃ɔ mwɑɑkirɑ.

⁴ Sinɑ boko u mɑn bikiɑ u nɛɛ, mbɑ nɑ kĩ u mɑn kuɑ.

Yerɑ nɑ yɑnde Wɔrukoo kɑnɑ. ⁵ Mɑ nɑ nùn wisɑ nɑ nɛɛ, yinni, ɑ̀ n kɑ mɑn nɔnu geu mɛɛrɑ, ɑ de n wurɑ Yudɑbɑn temɔ wuu gèn mi bɑ nɛn sikɑdobɑ sikɑ kpɑ n gu bɑni n seeyɑ.

⁶ N deemɑ sinɑ boko kɑ win kurɔwɑ bɑ sɔ̃ dɔmɑ te. Yerɑ u mɑɑ mɑn bikiɑ u nɛɛ, sɔ̃ɔ nyewɑ kon ko mi. Sɑɑ yerɑ̀ kon wurɑmɑ.

Mɑ nɑ nùn sɔ̃ɔwɑ sɑɑ ye kon wurɑmɑ. Mɑ u wurɑ n dɑ. ⁷ Yen biru, nɑ nɛɛ, sinɑ boko, nɑ nun kɑnɑmɔ, ɑ mɑn tireru wɛ̃ɛyɔ tem yɛ̃ro be bɑ wɑ̃ɑ Efɑrɑtin sɔ̃ɔ duu yeru giɑn sɔ̃ bu kɑ mɑn deri n turi Yudɑɔ. ⁸ Mɛyɑ nɑ mɑɑ kĩ ɑ mɑn tireru gɑru wɛ̃ Asɑfun sɔ̃ wi u sɑ̃ɑ sinɑ bokon dɑ̃ɑ kɔ̃so kpɑ u mɑn dɑ̃ɑ kɛ̃ n kɑ dii te tɑ wɑ̃ɑ sɑ̃ɑ yerun bɔkuɔn gɑmbobɑ ko kɑ wuu gen gbɑ̃rɑrun gɑmbobɑ kɑ sere diru mi nɛn tii ko nɑ n wɑ̃ɑ.

Yerɑ sinɑ boko u mɑn tire ni kpuro wɛ̃. Domi Gusunɔ u wɑ̃ɑ kɑ nɛ. ⁹ Mɑ u tɑbu sinɑmbu kɑ mɑɑsɔbu gɔsɑ bu kɑ mɑn yɔ̃siri. Yerɑ nɑ seewɑ nɑ dɑ nɑ tem yɛ̃ro be deemɑ be bɑ wɑ̃ɑ sɔ̃ɔ duu yeru giɑ mi. Mɑ nɑ bu sinɑ bokon tire ni wɛ̃. ¹⁰ Sɑnɑm mɛ Sɑmbɑlɑ wi u sɑ̃ɑ Horoni kɑ win sɔm kowo Tobiyɑ wi u sɑ̃ɑ Amɔni bɑ nuɑ mɑ nɑ wee n kɑ Isirelibɑ geɑ kuɑ, yerɑ ben nuki sɑnkirɑ too.

Nɛɛmi u mɛɛrimɔ

mi gbɑ̃rɑrɑ sɑnkirɑ

¹¹ Sɑnɑm mɛ nɛ Nɛɛmi nɑ tunumɑ Yerusɑlɛmuɔ, nɑ sinɑwɑ ginɑ sɔ̃ɔ itɑ. ¹² Nɑ ǹ goo sɔ̃ɔwɑ ye Gusunɔ nɛn Yinni u mɑn sɔ̃ɔwɑ n ko Yerusɑlɛmun sɔ̃. Yen biru, nɑ seewɑ wɔ̃kuru kɑ tɔmbu gɑbu. Nɑ ǹ yɑɑ sɑberu gɑru sue mɑ n kun mɔ kɛtɛku ge nɑ sɔni. ¹³ Wɔ̃ku suunu sɔɔ, nɑ yɑrɑ sɑɑ kɔnnɔ ge gɑ wɑ̃ɑ wɔwɑ giɑn di nɑ dɑ bwiɑɔ ye bɑ mɔ̀ Yɑɑ gɔbɑ kɑ mɑɑ sere kɔnnɔwɔ mi bɑ rɑ kubɑnu yɑri. Mɑ nɑ Yerusɑlɛmun gbɑ̃rɑ te mɛɛrɑ mɛɛrɑ, nɑ wɑ tɑ kurunu mɔ. Mɑ ten gɑmbobɑ bɑ dɔ̃ɔ mwɑɑkirɑ. ¹⁴ Mɑ nɑ dɑ kɔnnɔ ge gɑ wɑ̃ɑ bwiɑ ye bɑ gbɑn bɔkuɔ kɑ sere sinɑ bokon bwiɑɔ. Adɑmɑ ɑyeru gɑru sɑri mi nɛn kɛtɛku gɑ koo kɑ sɑrɑ. ¹⁵ Mɑ nɑ kpɑ kɑ Sedoronin wɔwɑ giɑ nɑ kɑ gbɑ̃rɑ te mɛɛri mɛɛrimɔ sere nɑ kɑ tunumɑ kɔnnɔ ge gɑ wɑ̃ɑ wɔwɑ giɑɔ mìn di nɑ rɑɑ kɑ yɑrɑ.

¹⁶ Sɑɑ ye sɔɔ, wuun siri kowobu bɑ ǹ yɛ̃ mi nɑ dɑ kɑ ye nɑ mɔ̀. Domi nɑ ǹ Yuu goo gɑ̃ɑnu sɔ̃ɔwɑ bɑɑ kɑ yɑ̃ku kowobu kɑ wuun bukurobu kɑ sere tem mɛn kpɑrobu. ¹⁷ Adɑmɑ ye nɑ wurɑmɑ nɑ bu sɔ̃ɔwɑ nɑ nɛɛ, bɛɛn tii i wɑ nge mɛ Yerusɑlɛmu yɑ sɑ̃ɑ. Wee yɑ bɑnsu kuɑ. Mɑ yen gbɑ̃rɑrun gɑmbobɑ bɑ dɔ̃ɔ mwɑɑkirɑ. Yen sɔ̃, su yen gbɑ̃rɑ te seeyɑ kpɑ sɑ kun mɑɑ wɑ̃ɑ sekuru sɔɔ.

¹⁸ Mɑ nɑ bu sɔ̃ɔwɑ nge mɛ Gusunɔ nɛn Yinni u mɑn kɔ̃su kɑ ye sinɑ boko Aɑtɑsɛsi u mɑn kuɑ. Yerɑ be kpuro bɑ yɑnde nɔɔgiru suɑ bɑ nɛɛ, su se su gbɑ̃rɑ te bɑni.

Mɑ bɑ dɑm kɛ̃ɛnɑ kɑ gɑri yi. ¹⁹ Adɑmɑ Sɑmbɑlɑ wi u sɑ̃ɑ Horoni kɑ win sɔm kowo Tobiyɑ wi u sɑ̃ɑ Amɔni kɑ Gesɛmu wi u sɑ̃ɑ Dɑɑrubu bɑ yen lɑbɑɑri nuɑ. Yerɑ bɑ sun yɑɑkoru toruɑ. Mɑ bɑ sun bikiɑ kɑ gɛndu mbɑ sɑ mɔ̀ mi. Sɑ kɑsuwɑ su sinɑ boko seesi?

²⁰ Mɑ nɑ bu wisɑ nɑ nɛɛ, Yinni wi u wɑ̃ɑ wɔllɔ wiyɑ u koo sun nɑsɑrɑ wɛ̃. Bɛsɛ win sɔm kowobu sɑ ko sewɑ su wuu ge bɑni. Adɑmɑ bɛɛ, i ǹ bɑɑ mɔ ge sɔɔ, i ǹ mɑɑ gɑ̃ɑnu mɔ i gere mi. I ǹ ko mɑm bweseru gɑru deri tèn sɔ̃ bɑ koo bɛɛ yɑɑyɑ.